١٦ی ئۆكتۆبەر خیانەتێك لە نەتەوە و نیشتمان

١٦ی ئۆكتۆبەر خیانەتێك لە نەتەوە و نیشتمان

ئا/ رێبین رواندزی 

رەشید زرار، فەرماندەیەكی سەربازییەو دانیشتووی قەزای رواندزە، بەڵام ئەركی سەربازی لە سنووری مەخموور جێبەجێ دەكات، پێشمەرگەیەكی كۆنی سەردەمانی شاخ و شارە و لە دەیان داستانی بەرگری بەشداری كردووە، چەندینجار لە لێواری مەرگ گەڕاوەتەوە، ئەو لە رووداوەكانی 16ی ئۆكتۆبەر لە سنووری كەركووك و مەخموور بووە، باسی رووداوەكانی ئەو رۆژە دەكات و بەدەم هەناسە ساردییەوە دەڵێت " ئەگەر ئەو خیانەتە نەكرابایە و هاوشێوەی ئەو شەڕی بەرگرییەی لە پردێ و سەحێلا كرا لە كەركووك كرابایە ئەو ناوچانەمان لەدەست نەدەچوون".
ئەم فەرماندەیە باسی دوو مانگ پێش رووداوەكانی 16ی ئۆكتۆبەر دەكات و ئاماژەی بە جوولەی گوماناوییەكانی هێزەكانی عێراقی كە لە حەویجە هەبووە كرد، لەبەر ئەوەی ناو حەویجە ژمارەیەكی زۆری داعش هەبوون، بەڵام ئەوان هێرشیان بۆ نەدەكرد، داعشەكانیش هیچ كاردانەوەیان لە ئاست ئەو هێزەی عێراق و حەشد نەبوو، زانیمان پیلانێكی مەترسیدار لە ئارادایە، زیاتر گووتی " لە كاتی شەڕی داعش هێزەكانی پێشمەرگە بە هەموو توانایانەوە بەرگریان لە خاكی كوردستان و بەتایبەتی لە كەركووك كرد، تەواوی ناوچەكانمان لە داعش پاك كردەوە و سەدان شەهید و بریندار و كەمئەندامان بەخشی، دوای نەمانی داعش لە هەموو ناوچەكان، هێزێكی زۆر لە دەورووبەری حەویجە كۆ ببوونەوە، ئەو شارۆچكەیە داعشی تێدا مابوو، ئەوەی جێگەی گومان بوو، هێنانی هێزی زۆری عێراقی بە هەموو پێكهاتەكانەوە بۆ دەورووبەری حەویجە و هێرش نەكردنە سەریان، ئەمە بووە مایەی درووستبوونی گومان، گومانەكانیش بەو ئاراستەیە بوون كە بیانەوێت هێرش بكەنە سەر كەركووك و دوبز، رۆژانە ژمارەی هێز زیاتر و جۆری چەكەكانیان هەمە چەشنتر دەكرد".
 زیاتر گووتی " زۆر بە زەقی دیار بوو ئەوان پیلانی خۆیان هەبوو نەك بۆ حەویجە بەڵكو بۆ كەركووك، لەبەر ئەوەی حەویجە گەمارۆ درابوو بە هێزێكی زۆر و داعشەكان هیچ كاریگەریان نەمابوو، بەڵام ئێمەش لە ئامادەباشیدا بووین، دەمانزانی شتێكی نامۆ لە ئارادایە و ناوچەكە بەرەو شەڕێكی دیكەی قوڕس پەڵكێش دەكرێت، بۆیە هەموو دەم لە چاودێری كردن و جوڵەی هێزەكانی عێراقیدا بووین، سەركردایەتی و سەرووی خۆمان لە دۆخ و گومانەكان ئاگادار كردەوە".
رەشید زرار، كە ئەزموونێكی زۆری لەشەڕ هەیە و خاوەن رابردوویەكی زۆرە، بەدەم هەناسەیەكی قوڵەوە بە شێوەی تەنز گووتی " نازانم بۆ خەیاڵم بۆ خیانەت و خاك فرۆشی و سەفەقاتی سیاسی چوو" خۆشی وەڵامی خۆی دەدایەوە و ئاماژەی بەوە دەكرد " هەوڵم دەدا ئەو قەناعەتە لە هزری خۆم فرێ بدەم كە لایەنێك خیانەت دەكات و كەركووك رادەست دەكات، بەڵام زوو زوو ئەو خەیاڵە دیسان بەڕۆكی دەگرتمەوە".
بە راوەشاندنی دەست و ئەنگووستەكانییەوە بەردەوام بوو لە گێڕانەوەی رووداوەكانی پێش 16 ئۆكتۆبەر و گووتی" ئەم گومانە بەردەوام بوو، تا دەنگوباسی گرژی نێوان هێزی پێشمەرگە و هێزەكانی عێراقی بڵاو كرایەوە، هەواڵەكان وا بڵاو كرانەوە، بەشێك لە هێزی پێشمەرگە نایانەوێت شەڕ بكەن، ئەو هێزەش بەشێكی ئەو پێشمەرگانە بوون كە سەربە باڵێكی ئەو كاتی ناو یەكێتی بوون، ئەمەش دوو دڵییەكی زۆری لە نێو هێزەكانی پێشمەرگە دروستكرد، هێزێكی سەربە یەكێتی لە نێو كەركووك مابوونەوە بەتایبەتی هێزەكانی سەربە كاك كۆسرەت رەسووڵ، كە لەناو سەربازگەی كەیوەن بوون، هەروەها ژمارەیەك لە بەرپرسانی ئیداری كەركووك شاریان چۆڵ نەكردبوو.
بەڵام دڵەڕاوكێ هەموومانی داگیر كردبوو، لە پەیوەندییەكانم بە هێزەكانی پێشمەرگە و هاورێكانمەوە ئەو دڵەڕاوكێیەمان لەلای ئەوانیش هەست پێ دەكرد، رۆژێكی زۆر ناخۆش بوو، بەڵام ژمارەیەكی زۆری پێشمەرگە بە ورەیەكی بەرزەوە ئامادەگی بەرگریان هەبوو.
رۆژی 15 ئۆكتۆبەر، هێزێكی زۆری پێشمەرگە لە هەولێرەوە بەرەو سەنگەرەكانی پێشەوەی كەركووك هاتن، هاتنی ئەم هێزە هاوتا بوو لەگەڵ دەنگۆی هاتنی هێزێكی لە رادەبەدەری عێراق و ئێرانی و ئامادەبوونی قاسم سلێمانی و مەهدی موهندس لە بەرەكانی جەنگ.
ئیتر شەڕی نێوان هێزی پێشمەرگە و هێزەكانی عێراقی بووە رووداوێكی چاوەڕوانكرا و چاوەڕێ بووین كە رووبدات، بەڵام هەرگیز چاوەڕێ نەبووین خیانەت و خاك فرۆشی روو بدات، ئەو رۆژە رۆژێكی زۆر ناخۆش و سەخت بوو، دەنگۆی ئەگەری خیانەتكردنی گرووپەكەی ناو یەكێتی برینداری دەكردین، بەڵام بەهۆی بڕوا بوونمان بە هەستە نەتەوایەتییەكانمان لە بەرەكانی جەنگ ماینەوە، لەوەش دڵخۆشتر ئەوە بوو كە هەزاران كەسی خۆبەخش لە شارەكانی دیكەی كوردستان ئامادەبوون و هاتبوونە بەرەكانی جەنگەوە".
ئەم فەرماندەیە باسی ئێوارەی رۆژی 15 ئۆكتۆبەر دەكات، كە هێشتا فیشەكێك نەتەقێندرا بوو، ئەو گووتی "
كات بەرەو ئێوارەیە و خەریكە تاریكایی باڵی بەسەر كەركووك دادەگرت، هێزەكانی دوژمن تا دەهات زیاتر دەبوون، چەندین شاند لە نێوان هەر دوولا ئاڵوگۆڕ كران، تا هێزی دوژمن بەبێ شەڕ بێنە ناو كەركووك و تا پردێ نەوەستن، هەواڵەكە واهات كە هێزەكانی عێراقی لەگەڵ بەشێك لە فەرماندەكانی سەربازی نێو یەكێتی رێككەوتن تا شەڕ نەكەن و سەنگەرەكانیان چۆڵ بكەن، كاتێ پەیوەندیمان بە چەند پێشمەرگەیەك كرد، دەیانگووت هەزار جار فەرمانیشمان پێ بكرێت چۆڵی ناكەین، لە لایەكی دیكەوە هێزەكانی كۆسرەت رەسول لە ناو كەركووك مابوونەوە، بۆیە ئەم هەواڵە زۆر كاریگەری لە سەر دروست نەكردین، هەوڵی چۆڵكردنی كەركووك و رادەستكردنی بە هێزەكانی عێراق، لەلایەن سەركردایەتییەوە رەتكرایەوە، شەو داهات بەڵام هیچ لە ئارا نەبوو، تا بەرە بەیانی رۆژی 16ی ئۆكتۆبەر، دوژمن جولەی بە هێزەكانی كرد و لە چەند قۆڵەوە هاتنە پێش، یەكەم جار دوژمن لە قۆڵی سەربازگەی كەیوان هێرشی كرد، لەوێ رووبەڕووی بەرپەرچ دانەوەیەكی سەختی هێزەكانی پێشمەرگەی كوردستان بوونەوە و خراپ تێكشكان، بۆیە پاشە كشەیان كرد، دوای كەمێكی دیكە هێرشیان كردەوە، لە چەندین هەوڵی هێرش كردندا پێشمەرگەكان بەرپەرچی تووندی دوژمنیان دایە و نەیانهێشت بێنە پێش، ئەو حاڵەتە زیاتر لە 3 جار روویدا، دووكەڵی سووتانی هەمەر و تانك و ناقیلە و زرێپۆشی دوژمن ئاسمانی كەركووكی تەنی بوو، بەڵام لە ناكاو هەواڵی رادەستكردنی بەشێكی زۆری سەنگەرەكانی پێشمەرگە لە سنووری دوز بڵاو كرایەوە، دواتر هەواڵی رادەستكردنی ناوچەی زیاتر بڵاو دەكرایەوە، بە جۆرێك كە بەشێوەی بازنەیی ئەو هێزانەی لەناو كەركووك مابوونەوە دەكەوتنە نێو گەمارۆیەكی تووندی سەربازی، بۆیە بە ناچاری دەبوایە ئەو هێزە پاشەكشە بكات".
رەشید زراری فەرماندە، كە پاش تێپەڕینی چەند ساڵ لە رووداوەكانی ئەو چەند رۆژە هێشتا كاریگەری بەسەر ناخ و قسەكردنیدا دیار بوو، زیاتر قسەی كرد و گووتی " لەلایەكی دیكەشەوە هەندێك لە فەرماندەكانی پێشمەرگە كە سەربە یەكێتی بوون سەریان سوورمابوو، نەیاندەزانی چی بكەن، باڵێك شەڕی دەكرد و شەهیدی دەبەخشی، باڵێكیش خیانەتی دەكرد و خاكی دەفرۆشت و سەنگەری چۆڵ دەكرد، زۆرێك لە ئەفسەر و پێشمەرگەكانی یەكێتی دەگریان، زۆرێكیان تفیان لە خۆیان دەكرد، هەندێكیان ئەو باڵەی رێككەوتنی كردبوو دەدایە بەر جنێو، ئیتر كەركووك دوای چەندین ساڵ ئازادی كەوتەوە دەست داگیركەران، شەڕ لە ناو كەركووك بەرەو كۆتایی دەچوو، هێزی پێشمەرگە بە هۆی خیانەتی باڵێكەوە كە بێ شەڕ ناوچەیەكی زۆریان رادەستی دوژمن كردبوو ناچار بە پاشەكشە كران".
ئەو فەرماندە سەربازییە، بە تووڕەییەوە باسی لەوە كرد، هیچ گومانیان نەبوو پیلانەكە پێشتر بەرنامەی بۆ دانراوە، بۆیەش ئەو فەرماندانەی لە باڵی خیانەتی 16ی ئۆكتۆبەر نزیك بوون، یەكمجار خۆیان دواتریش هەرچی تۆپ و تانك و زێرپۆش هەبوو لە ناوچەی شەڕ دووریان خستنەوە، زیاتر دەڵێت " ئەم خیانەتە بە تەواوەتی پیلانی بۆ دارێژرا بوو، چونكە بەر لە دەست پێكردنی شەڕ خۆیان سەنگەرەكانیان چۆڵ كرد و تەواوی تۆپ و جەبەخانەو ناقیلە و دەبابەكان و هەمەرەكانیان گواستنەوە، كوڕی فەقیر و هەژاریشیان لە سەنگەرەكان بەجێ هێشت بە چەكی سووكەوە تا یا بكوژرێن یا نەتوانن بەرگری بكەن، لەبەر ئەوەی هێزی دوژمن چەكی پێشكەوتووی پێ بوو، بە كلاشینكۆف و (بی كەی سی) ناتواندرا رووبەڕوویان ببینەوە، پێشمەرگەیەكی یەكێتی ئامادە نەبوو سەنگەر چۆڵ بكات و بە چەكی جۆری (بی كەی سی) رووبەڕووی دەبابەكان بوویەوە، تا كۆتایی دەبابەكان بەسەر جەستەیدا تێپەڕێن و بووە قوربانی ئەو رێككەوتنەی بەشێك لە سەركردایەتی حزبەكەی لەگەڵ داگیركەران كردبووی".
ئەو فەرماندە سەربازییە خاوەن ئەزموونە باسی رووداوەكان و شەڕی دوای داگیر كردنی كەركووكی كرد و گووتی " هێزەكانی پێشمەرگە خۆیان لە دەرەوەی كەركووك رێكخستەوە و بەنیازی هێڕشی پێچەوانە بوون، بەجۆرێك بەرنامە و پلانی شەڕ دانرا كە لە ماوەیەكی زۆر كەمدا كەركووك رزگار بكرێتەوە و دەشكرا، بەڵام بینیمان هێزێكی زۆری یەكێتی بە فەرمانی باڵێكی ناو یەكێتی هاتنە نێوان هێزەكانی پێشمەرگەو دوژمنەوە و گووتیان بێنە پێش شەڕی ناوخۆیی روودەدات، واتە ئەو گرووپە نەك هەر بەرگرییان نەكرد، بەڵكو بوونە هۆی ئەوەی هێرشیش بۆ سەر دوژمنان نەكەین، بۆیە ناچار بووین بڕیاری ئەوەماندا بەرگرییەكە بە شێوەیەك بكرێت كە هێزی داگیركەری عێراق بە هاوكاری سوپای پاسداران و باڵێكی ناو یەكێتی نەتوانن زیاتر بێنە پێش، بۆیە لە پردێ سەنگەرەكان تووند كران، بڕیاری شەڕی یەكلاكەرەوە درا، لەبەر ئەوەی ئەوان بڕیاریان دابوو هەولێر و دهۆكیش بگرن و شتێك بەناوی قەوارەی سیاسی هەرێمی كوردستان نەمێنێت، بۆیە هێزەكانی پێشمەرگە بەوپەڕی فیداكارییەوە ئامادەی بەرگری كردن بوون، سوپای عێراق و حەشد بە پیلانی ئێران دەستیان بە پێشەڕەوی كرد، لەگەڵ یەكەم هێڕشیاندا رووبەڕووی بەرپەرچدانەوەیەكی تووندی هێزەكانی كوردستانی بوونەوە و كوژراو و بریندارێكی زۆریان لێ بەجێما، جگە لە تێكشانێكی زۆری هەمەر و ناقیلە و دەبابە، هەمان رووداویش لە قۆڵێكی دیكەی مەخموور روویدا و جگە لە زیانێكی زۆری گیانی 21  سەربازیشیان بە ئەسیری كەوتە دەست هێزەكانی پێشمەرگە".
رەشید زرار، لە باسی سەركەوتن و ئازایەتی پێشمەرگە بەردەوام بوو، ئەو گووتی" دوای ئەوەی دوژمن شكستی خوارد، لە پاشەكشەیەكی زۆردا بوو، ئەوان خۆیان رێكخستەوە و ئەوجارە بە تانكی جۆری ئەبرامز كە پێشكەوتووترین تانكی شەڕكەری ئەمریكییە دەستیان بە هێرش كردەوە، بەڵام هەستی بەرزی نیشتمانی و ئازایەتی و فیداكاری پێشمەرگە زۆر لەو دەبابەیە بەهێزتر بوو، بۆیە لەشەڕێكی بێ وێنەدا دەبابەی ئەبرامزیش بەدەستی پێشمەرگەكانی كوردستان تێكشكێندرا و لووتی حەشد و خیانەتكارانیش هاوشێوەی ئەبرامزەكەیان سووتا، پێشمەرگەی كوردستان سەركەوتن و سەربەزییان تۆمار كرد و خیانەتكارانیش بۆ هەتا هەتایە لەبەرامبەر نەتەوە و مێژوو شەرمەزار و سەر شۆڕ دەمێننە".

زۆرترین بینراو