بە هەزاران كەس بەهۆی داخستنی رێگای كۆڵبەری بێ كاسبی ماونەتەوە

بە هەزاران كەس بەهۆی داخستنی رێگای كۆڵبەری بێ كاسبی ماونەتەوە

زاری كرمانجی-حاجی ئۆمەران:

ماوەی چوار ساڵە كۆماری ئیسلامی ئێران سنوورە نافەرمییەكانی بەڕووی كۆڵبەران لە سنووری حاجی ئۆمەران و تەواوی دەروازە سنوورییەكانی لەگەڵ هەرێمی كوردستان داخستووە و بەمەش بە هەزاران كاسبكاری كورد لە شارەكانی رۆژهەڵاتی كوردستان بێكار ماونەتەوە، لە سنووری حاجی ئۆمەرانیش نزیكەی هەزار خێزان نانبڕاو بوون و كاسبییەكەیان نەماوە، ئێستا لە گوندەكانی سەیداوە و شیوەڕەش و حاجی ئۆمەرانی خواروو بە دەیان كۆگا چۆڵن و سەدان گەنجیش كە پێشتر لەرێگای ئەم دەروازانە بژێوی ژیانیان دابین دەكرد، بێكار ماونەتەوە.
مستەفا حەمەدەمین، دانیشتووی گوندی سەیداوەی سنووری حاجی ئۆمەرانە، وەكخۆی دەڵێت ماوەی چوار ساڵە بێ كار و كەسابەتییە و نەمانی رێگای كۆڵبەری نانبڕاوی كردووە، ئەو هاووڵاتییە بۆ هەفتەنامەی زاری كرمانجی دەڵێت: رێگای كۆڵبەری لە سنووری حاجی ئۆمەران-خانێ، رێگایەكی زۆر باش بوو بۆ ئێمە، لە سنووری شارەدێی حاجی ئۆمەران نزیكەی هەزار خێزان لەسەر ئەم كارە بژێوی ژیانی خۆیان دابین دەكرد، رۆژانە ئەو بازاڕانە جممەیان دەهات لە كارو كاسبی، نزیكەی 170 ئۆتۆمبێل كەلوپەل و شمەكیان دەگواستەوە بۆ سنوور و لەوێ رادەستی كۆڵبەرانمان دەدا، بەڵام لەدوای ساڵی 2017 كە ئێران بە فەرمی ئەو كارەی لە سنوورەكان قەدەغەكرد، ئیدی ئێمەش بێكار ماوینەتەوە و كاسبیمان نەماوە.
ئەو هاووڵاتییە دەشڵێت: سنوورەكە نیمچە فەرمی بوو، واتا كوردەكانی رۆژهەڵاتی كوردستان بە پسوڵەی فەرمی ئێران رۆژانە دەهاتنە ئەودیو و كۆڵی خۆیان هەڵدەگرت و دواتر دەگەڕانەوە، هیچ كارێكی نایاسایی لەم سنوورانە نەدەكرا، تەنها بە هەزاران خێزان لەم رێگایەوە بژێوی ژیانیان دابین دەكرد.
مەسعود ئیسماعیل پوور، دانیشتووی پیرانشارە و ئێستا بۆ كاری كرێكاری لە هەرێمی كوردستانە و پێشتر كاری كۆڵبەری دەكرد، ئەو هاووڵاتییە دەڵێت: پێشتر كارمان زۆر باش بوو بەهۆی كاری كۆڵبەری و مەترسیمان لەسەر گیانمان نەبوو، چونكە بە پسوڵەی دەوڵەت و بە نیمچە فەرمی ئەو كارەمان دەكرد، بەڵام بۆ ماوەی 4 ساڵە ئەو كارە نەماوە و ئێران سنوورەكانی كۆڵبەری داخستن و بە دەیان هەزار كەس لە شارەكانی رۆژهەڵاتی كوردستان بێكار ماونەتەوە و منیش بۆ بژێوی ژیانم رووم لە هەرێمی كوردستان كردووە و ماوەی 4 ساڵە كاری كرێكاری و وەستایی دەكەم.
ئەوەی تایبەتە بە سنووری شارەدێی حاجی ئۆمەران، بە نزیكەی هەزار خێزان لەرێگای كاری كۆڵبەری كاریان وەچنگ كەوتبوو، ئێستا ئەوانیش وەكو پێشتر ناتوانن كار و كاسبی بكەن.
 رەسوڵ ئەحمەد دانیشتووی حاجی ئۆمەرانە و دەڵێت: خەڵكێكی زۆر كۆگای هەبوو بۆ كۆگاكردنی كەلوپەل و ئەو كاڵایانەی لێرەوە هەناردەی ئێران دەكران، خەڵكی وامان هەیە بە چەندان دەفتەر دۆلاری خەرج كرد بۆ دروستكردنی كۆگاكان، دواییش لەگەڵ داخستنی سنووری كۆڵبەری مایەپووچ بوون و ئێستا كۆگاكانیان بە چۆڵی ماونەتەوە.
ئەو هاووڵاتییە دەشڵێت: حەمباڵی، گواستنەوە، كۆگاكردن و پاسەوانی و كاركردن لەگەڵ خاوەن بارەكانی ئێران، زۆربەی ئەو كارانە لە سنووری حاجی ئۆمەران دەكران، خەڵكێكی زۆر بژێوی ژیانی لەسەر كاری كۆڵبەری دەستدەكەوت، ئەمەش هەمووی لەژێر چاودێری ئاساییش و هێزە ئەمنییەكان و ئێرانیش بەشێوەیەك لە شێوەكان كارەكەی ئازاد كردبوو، بەڵام ئێستا خەڵكەكە بێكار بووە و هیوادارم حكوومەتی هەرێم ئەگەر لە كۆبوونەوەكاندا لەگەڵ كاربەدەستانی ئێران كۆببنەوە باسێكی كردنەوەی ئەم كەناڵانەش بكەن بۆ ئەوەی خەڵك بێكار نەمێنێتەوە.
عەبدولوەهاب مەحموود، بەڕێوەبەری ناحیەی حاجی ئۆمەران لەمبارەیەوە بۆ زاری كرمانجی دەڵێت: دوای ساڵی 2017 ئێران بە فەرمی ئەو سنوورانەی داخستن كە كاری كۆڵبەری تێدا ئەنجام دەدرا، ئێستا ئەو كاڵایانەی لەرێگای كۆڵبەری دەگەیشتنە بازاڕەكانی ئێران، ئێران بە رێگای نێودەوڵەتی لە رێگای سنوورە فەرمییەكانەوە هاوردەی دەكات، راستە كە رێگای كۆڵبەری هۆكارێك بوو بۆ وەدەستهێنانی بژێوی ژیانی هەزاران خێزان هەم لە دیوی رۆژهەڵاتی كوردستان و سنووری حاجی ئۆمەرانیش، بەڵام لەدوای داخستنی سنووری كۆڵبەریش ئاساییش و ئارامی تەواو بۆ سنوورەكان گەڕاوەتەوە، چونكە پێشتر لەپاڵ كاری كۆڵبەری نیمچە فەرمی، كاری قاچاغیش لەم سنورانە دەكرا و ناوە بە ناوەش هەواڵی ناخۆشمان بەرگوێ دەكەوت، بۆیە ئێستا سنوورەكان ئارامترن لە پێشوو.

سەبارەت بە كۆبوونەوەیان لەگەڵ كاربەدەستانی كۆماری ئیسلامی ئێران و خستنەڕووی ئەم بابەتە، بەڕێوەبەری ناحیەی حاجی ئۆمەران دەڵێت: ئێمە چەندمانگێك جارێك لەگەڵ نوێنەری پاسەوانی سنوور و كاربەدەستانی ئێران كۆبوونەوە ئەنجام دەدەین لەسەر كێشەكانی سنوور و بواری ئەمنییەت و ئاساییش بۆ سنووری هەرێمی كوردستان و كۆماری ئیسلامی ئێران، بەڵام دەربارەی كردنەوەی سنووری كۆڵبەران هیچ بابەتێك نەخراوەتەڕوو و ئەمە دەگەڕێتەوە سەر بڕیاری دەوڵەتی ئێران، چونكە پێشتر لەلایەن ئێرانەوە بڕیاری داخستنیان دراوە.

هەرچەندە كۆماری ئیسلامی ئێران دەروازە نیمچە فەرمییەكانی بۆ كاری كۆڵبەری داخستووە، بەڵام سەختی ژیان لە ئێران هێشتا كاسبی كوردەكانی شار و گوندەكانی رۆژهەڵاتی كوردستانی لە سنوورەكان دانەبڕیوە و بەپێی ماڵپەڕی رێكخراوی هەنگاو بۆ مافەكانی مرۆڤ رۆژانە كۆڵبەرانی شارەكانی رۆژهەڵاتی كوردستان مەرگی خۆیان دەكەنە قوربانی پاروە نانێك بۆ خێزانەكانیان و بە گوللەی هێزەكانی ئێران لە ناوچە سنوورییەكان خەڵتانی خوێن دەكرێن.

زۆرترین بینراو