ئافرەت بوون تاوان نییە و جەستەشمان هێڵی سوور نییە

ئافرەت بوون تاوان نییە و جەستەشمان هێڵی سوور نییە

رەمەزان هەرنی – زاری كرمانجی: بەفرین رەشید، یەكێكە لە خانمە شێوەكارەكانی كورد و لە دەرەوەی وڵات دەژیت، لە بەشێكی كارەكانیدا دەیەوێت ژیانی ژنانی كورد نیشانی بدات، لە دیمانەیەكی زاری كرمانجی باسی لە نوێترین كارەكانی دەكات.
هونەرمەندی شێوەكار بەفرین رەشید بە زاری كرمانجی گووت " بۆ ئاشنا بوون بە دونیای هونەری شێوەكاری و پەیكەرتاشی لە یەكێك لە پەیمانگاكانی رۆژاوای شاری لەندەن بەناوی هامرسمس لە بواری هونەریدا خوێندنم دەستپێكرد، كاتێك فێری سكێچ كردن و مۆدێل و وێنە كێشان بووم، بە ‌رێگا ئەكادیمییەكەی، ئاشنای بەكار هێنانی بۆیەی زەیتی بووم".
زیاتر گووتی " بە سەركەوتوویی خوێندنم تەواو كرد، كاتێ گەڕامەوە كوردستان هەلی باشترم بۆ رەخسا تا وەك مامۆستای وانەی هونەری لە قوتابخانەی شاری سلێمانی وانەی هونەری بە قوتابییانی قۆناغی بنەڕەتی بڵێمەوە".
هونەرمەند بەفرین گووتی " كارەكانم تێكەڵەیەكی هونەرین، تەنها جەستە نین، قسە كردن و كار كردن لەسەر ئافرەت و جەستە قسەی زۆر هەڵدەگرێت، لە هەموویان گرنگتر پەیامی یەكسانییە لە كۆمەڵگە و ئازادی تاك و ئافرەت، بەتایبەتی بەكارهێنانی جەستە لێرەدا مانای بێگەردی ئافرەتی كورد دەگەینێت، ئێمەش وەك گشت گەلان بە سەربەرزییەوە بەبێ شەرمانە دەتوانین باسی ژیان و ژن بكەین، چیتر ئافرەت بوون تاوان نییە و جەستەشمان هێڵی سوور نییە چ لە بواری هونەری یا لە ژیانی رۆژانە".
بەفرین گووتیشی " زۆر لەمێژە جەستە نەخشێنراوە و پەیكەری لێدا تاشراوە، من داهێنەری ئەم بوارە نیم، لەوانەیە من رێچكەشكێنی كۆمەڵگەی خۆمان بم، بەڵام بە دڵنیاییەوە چیتر تەنیا نیم لەم بوارە، هەردەم وەك شێوەكار حەزم بە دروستكردنی پردێكە لەنێوان ژیانی راستەقینەمان وەك كورد و هونەرەكەم كردووە".
بەفرین ئەوەشی خستەروو" لەم كارە زیاتر دەرخستنی وێنەیەكی جوانی ئافرەتی لادێ نشین و بەرجەستە كردنی ژیانی رۆژانەیانە، كە پڕە لە چیرۆكی ئازایەتی و میهرەبانی تاك لە كۆمەڵگەی سادە و رۆژگاری سەخت، چەند جارێكی دیكەش ئەم بیرۆكەیە هەوێنی كاری شێوە كاریم بووە، هەموو كات پڕۆژە و كاری هونەریم لەبەر دەستدایە، ئەوەی زیاتر گرنگی پێدەدەم كارە شێوەكارییەكانمە، كە لەكاتی دیاریكراوی خۆیدا دەیخەمە بەرچاو".

 

زۆرترین بینراو