ئەگەر بەڵێنی بەرپرسان جێبەجێ نەكرێن بەردەوام بوونمان ئەستەمە

ئەگەر بەڵێنی بەرپرسان جێبەجێ نەكرێن بەردەوام بوونمان ئەستەمە

زاری كرمانجی: دوای ئەوەی هەفتەی رابردوو یارییەكانی خولی نایابی كوردستان بۆ تۆپی پێ دواخرا بەهۆی نالەباری كەشوهەوا و بارینی بەفرێكی زۆر لە زۆربەی شارەكانی كوردستان, بڕیار وایە ئەم هەفتەیە یارییەكان بەڕێوەبچن و یانەی سۆران لە نێو یاریگەی خۆی میوانداری یانەی دهۆك بكات, بەهۆی دابەزینی ئاستی یاریزانەكان و كێشەی دارایی یانەی سۆران لەم دواییە لە 3 یاری رابردوو 7 خاڵی لەدەست دا.
لەمبارەیەوە فەرمان ئیسماعیل رەحمان بەرپرسی راگەیاندنی یانەی وەرزشی سۆران لە لێدوانێكدا بۆ زاری كرمانجی گووتی" ئەوەی لە توانمادا بووە ئەنجاممان داوەو خولی نایابیش خولێكی دوورو درێژەو پێویستی بە تواناو ئەزموونێكی باش و كەرەستەیەكی یەدەگی باش هەیە, دابەزینی ئاستی یاریزانەكان بەم شێوەیە نیە وەك باسی لێوە دەكرێت, بەڵام ئەو كێشەیەی هەمانە نەبوونی كەرەستەیەكی باش و باشتر دەگەڕێتەوە بۆ ئەوەی 4 مانگە مووچەی یاریزانەكانمان پێ نەدراوە كە مانگانە پێویستمان بە سەرووی 13 ملیۆن دینارە, ئەمەش بەردەوامی و خۆڕاگری زیاتری دەوێ هەرچەندە یاریزانەكان بوێرانەو لەخۆ بردووانە خزمەتیان بە یانەكە كردووەو ئینتماو خۆشەویستیان بۆ شارەكە هەیە, تا ئێستا نەمانتوانیوە كرێی هاتوچۆی یاریزانەكان دابین بكەین كە رۆژانە 3-4 كاتژمێر لەسەر گیرفانی خۆیان دێن بۆ مەشق و راهێنانەكان, نەبوونی سەرچاوەیەكی دارایی تایبەت بە خۆمان تووشی ئەم قەیرانەی كردین و لەم دواییە بەڵێنی زۆرمان پێدراوەو چاوەڕێین لە ئایندەیەكی نزیكدا بەڵێنەكان جێبەجێ بكرێن تا بتوانین مووچەی یاریزانەكان بدەین, بەڵام ئەگەر بە پێچەوانە بەڵێنەكانیان نەبردەسەر بەداخەوە ناتوانین بەردەوام بین و ئەو كاتە هەڵوێستی جیاوازمان دەبێت, هەر بەهۆی ئەم كێشەیە لە وادەی گواستنەوەكان نەمانتوانی یاریزانی تازە بێنین و كەموكوڕییەكانی پێكهاتە چارەسەر بكەین ئەگەرچی دەستنیشانی چەند یاریزانێكیشمان كردبوو, جیا لە یانەكانی تر كە ئەوان گۆڕانكارییان لە شوێنی چەند یاریزانێك كرد, لەم یارییانەی دوایی نەمانتوانیوە سەركەوتن بەدەستبێنین, بۆیە داوا لە بەرپرسەكانی سنووری سۆران دەكەین چاوێك بەم بابەتەدا بخشێننەوەو هاوكارمان بن بۆ ئەوەی یانەی سۆران لەم كاروانە بەردەوام بێ, بە پێچەوانە كارەساتێكی گەورەیە بە هۆكاری دارایی یانەی سۆران شكست بێنێ, لە قۆناغی یەكەم یاریگەی گەردەگەردی رواندز ئێمە سوودمەند بووین و سەركەوتنمان بە دەستهێنا, لێرەوە بەناوی سەرۆك و دەستەی كارگێڕی و یاریزانەكان سوپاسی تێكڕای دامودەزگاكانی رواندزو بنكەی وەرزشی و یانەی رواندز دەكەین كە زۆر هاوكارو هاندەرو پاڵپشتمانمان بوون لە بەڕێوەچوونی یارییەكان, لە خولی پلەی دووی كوردستانیش یانەی سۆران هاوكارو پاڵپشتی یانەی وەرزشی رواندز دەبێت, لە قۆناغی دووەم تەنها یەك یاریمان لە یاریگەی تایبەت بەخۆمان ئەنجام داوە بەبێ جەماوەر بەهۆی سزای یەكێتی تۆپی پێی كوردستان كە ئەنجامەكەی یەكسان بوو لەگەڵ یەكەمی ریزبەند, پێموایە لە یارییەكانی داهاتوو سەركەوتوو دەبین و هیچ خاڵێك بەهەدەر نادەین, یاریزانان و دەستەی راهێنەران بەهەمان گڕوتینی پێشوو دەگەڕێنەوە ئاستی جاران و بە چارەسەركردنی كێشە داراییەكان زۆرێك لە یاریزانە باشەكانمان دەسنیشان كردوون بۆ پڕكردنەوەی ئەو یاریزانانەی ماندوو بوونە یان پێكانیان هەبێ و باری دەروونیان باش نەبێت".

زۆرترین بینراو