بۆ نۆژەنكردنەوەی رێگاكانی دەڤەری سۆران پێویستیمان بە ملیاران دینار هەیە

بۆ نۆژەنكردنەوەی رێگاكانی دەڤەری سۆران پێویستیمان بە ملیاران دینار هەیە

دیدار- محەمەد هەسنانی: بەرپرسی كەرتی 4ی چاككردنەوەو پاراستنی رێگاو بانەكانی سۆران، لە دیدارێكی زاری كرمانجیدا تیشك دەخاتە سەر كارو چالاكی و كێشەو گرفتەكانیان و دەشڵێت " هەندێ‌ هاووڵاتییان دووكان و خانوویان لەسەر رێگا گشتییەكان دروست كردووەو زیانیان بە شەقامە گشتییەكان گەیاندووە.
لەبەردەوامی قسەكانیدا ئەندازیار خوسرەت سادیق دری، بەرپرسی كەرتی 4ی چاككردنەوەو پاراستنی رێگاو بانەكانی سۆران، بە زاری كرمانجی راگەیاند " سنووری فەرمانگەكەمان هەرسێ‌ قەزاكانی (سۆران، رواندز، چۆمان) لەخۆدەگرێت، ئەركی سەرەكی تیمەكانمان لەم سنوورانە راماڵینی بەفر و چاككردنەوەی ئەم رێگاو شەقامانەیە كە دووچاری رووچوون یان هاتنە خوارەوەی خۆڵ و بەرد دەبنەوە، تیمەكانمان دەگەنە ئەم شوێنانەو بەربەستەكانی بەردەم هاتووچۆ لادەبەن، خۆشبەختانە تائێستاش ئێدارەی قەزاو ناحییەكانی سنوورەكەمان زۆر هاوكارمان بوونە، ئاسانكاریان بۆ تیمەكانمان دروست كردووەو بەهانامانەوە هاتوون لەكاتی راپەڕاندنی ئیش و كارەكانمان، هەروەها پۆلیسی هاتووچۆ و بەرگری شارستانی و تیمەكانی دیكەی فریاكەوتنیش بەهەمان شێوە هاوكارمانن".
بەرپرسی كەرتی 4ی چاككردنەوەو پاراستنی رێگاو بانەكانی سۆران، گووتیشی " دوو تیمی سەرەكیمان لە سۆران و چۆمان هەن، بۆ ئەوەی بەشێوەیەكی خێرا بگەنە ئەم شوێنانەی گە گرفت لەشەقام و شوێنێك دروست دەبێت، بەتایبەتیش لە ئێستادا كە وەرزی زستان و بەفر بارینە، توانیومانە بەو ئامێرو میكانیكانەی كە لەبەردەستماندایە، رێگاو شەقامەكان لە بەفر پاكبكەینەوە، هەروەها زۆرجاریش ئەگەر زانیمان ئامێرەكانی ئێمە پێڕاناگەن، شۆفەڵ یان گرێدەری هاووڵاتییان بەكرێ‌ دەگرین، لەپێناو ئەوەی هەرچی زووە بتوانین بەربەستەكانی بەردەم هاتووچۆ لابەرین، بەتایبەتیش لە رێگا گشتییەكان، دواتریش پاككردنەوەی رێگای گوندەكان لە بەفرو ئەم خۆڵ و بەردەی دەخزێنە سەرشەقامەكان ".
ئەندازیار خوسرەت سادیق دری، نیگەرانی خۆشی دەربڕی لەوەی كە هەندێك لە شۆفێران لەبری هاوكاری كردنی تیمەكانیان بەربەستیان بۆ دروست دەكەن و رایگەیاند " زۆرجار بینیومانە تیمەكانمان سەرقاڵی راماڵینی بەفر بوونە كەچی لەناكاو هەندێ‌ لە شۆفێران لە رووتسایدی نایاسایی بەشەقەمەكەدا هاتوون و بەربەستیان بۆ شۆفێرانی دیكەو تیمەكانی ئێمەش دروست كردووە، لەگەڵ ئەوەشدا هندێ‌ جار لە دوورەوە بینیومانە شۆفێرێك لەسەرخۆ رۆیشتووە كەچی كاتێك گەیشتۆتە ئەم شوێنەی كە تیمەكانمان كاریان تێداكردووە، بەخێرایی بەناو گۆم و چڵپاوی شوێنەكەدا رەتبووە، یان لە وەرزەكانی دیكە كردویانە بەتۆز و خۆڵ، ئەمەش تیمەكانی ئێمەی نیگەران كردووە".
بەرپرسی كەرتی 4ی چاككردنەوەو پاراستنی رێگاو بانەكانی سۆران، ئەوەش دەخاتەروو " لەكاتی شەڕی داعش و دورستبوونی قەیرانی دارایی چەند ساڵێك، هاوشێوەی زۆربەی كاروپڕۆژە خزمەتگوزارییەكانی دیكە نەتوانرا بوددجەی پێویست بۆ رێگاو بانەكانی دەڤەری سۆران تەرخان بكرێت، ئەوەش بووە هۆی ئەوەی كە زیان بە زۆر لە شەقام و رێگاكان بگات و تائێستاش كاریگەری زۆری لەدوای خۆی بەجێهێشتووە، چونكە ئەگەر ساڵانە رێگاكان چاكنەكرێنەوە كێشەو گرفتەكان زیاتر دەبن، بەمەش بۆ چاككردنەوەی رێگاكانی سنوورەكەمان پێویستیمان بە ملیاران دینار هەیە تا نۆژەنیان بكەینەوە، هیوادارین لەمساڵدا بوددجەی پێویست بۆ ئەم مەبەستە تەرخان بكرێت، بۆ ئەوەی بەشێوەیەكی كاراتر بتوانین كارو پڕۆژەكانمان ئەنجام بدەین، هەوڵیش َدەدەین ئەمساڵ زووتر دەرخستەیەك بۆ رێگاو بانەكانی سنوورەكەمان ئامادە بكەین و بۆ سەرووی خۆمان بەرزی بكەینەوە، تا زووتر وڵامان بدرێتەوەو بزانین چەند برە پارەمان بۆ تەرخان دەكرێت".
ئەندازیار خوسرەت سادیق، نیگەرانی خۆشی دەربڕی لەوەی كە هەندێ‌ لە هاووڵاتییان بەشێوەیەكی نا رێك خانوو دووكان و پڕۆژە لەسەر رێگا گشتییەكان دروست دەكەن، بەمەش ئاو و پاشماوەكانییان دەڕژێتە سەر شەقامەكەو زیانی زۆر بەڕێگاكە دەگەێنن، بەتایبەتیش رێگای سەرەكی هامڵتۆن و (سۆران-چۆمان) هەروەها رێگای قەزاو ناحییەكانی دیكەش بەهەمان شێوە، هەروەها لە هەندێك شوێن لە نزیك رێگای سەرەكی غەسالەی چەگل و خیز دانراون، ئەمەش زیانی زۆر بەشەقامی گشتی دەگەێنێت، ئەركە رێگری لەم جۆرە كەسانە بكرێت و ئەم دیاردانە لەسەر رێگاكان دووربخرێنەوە، هەروەها رێنمایی تایبەتیش بۆ ئەم كەسانە هەبێت كە لە سەر رێگایی گشتی خانوو دوكان دروست دەكەن، كە بەشێوەیەكی ئەندازەیی بێت و هەوڵبدرێت زیان بە شەقامەكە نەگەێنن، بەتایبەتیش ئەم گوندانەی كەوتوونەتە سەر ئەم رێگا گشتیانە.

زۆرترین بینراو