هاتنی گەشتیاران لە رێگای گروپاتی گەشتیاریەوە راگیراوە

هاتنی گەشتیاران لە رێگای گروپاتی گەشتیاریەوە راگیراوە

دیدار-محەمەد هەسنانی: بەڕێوەبەری گەشتوگوزاری سۆران، ئاشكرای دەكات " دوای بڵاوبوونەوەی ڤایرۆسی كۆرۆنا لە وڵاتانی جیهان، رێژەی هاتنی گەشتیاران بۆ دەڤەری سۆران و هەرێمی كوردستان بەتایبەتی بەشێوەیەكی بەرچاو دابەزیووە، ئەوانەی سەردانی سنوورەكەشمان دەكەن، زیاتر خەڵك و شارو ناوچەكانی كوردستانن.
لەبەردەوامی قسەكانیدا بارزان محەمەد بەڕێوەبەری گەشتوگوزاری سۆران، بە زاری كرمانجی راگەیاند " سنووری بەڕێوەبەرایەتییەكەمان هەرچوار قەزاكانی (سۆران، رواندز، چۆمان، مێرگەسۆر) لەخۆدەگرێت، كە بە مەبەستی خزمەتكردنی زیاتری گەشتیاری لەم چەند قەزایەدا بنكەی گەشتوزاری كراونەتەوەو سەربە بەڕێوەبەرایەتیەكەمانن، وەك دیاریشە بەهۆی هەڵكەوتەی ئەم ناوچانە و بوونی سەیرانگەو شوێنی گەشتوگوزاری دەگمەن و سەرەنج راكێش گەشتیارێكی زۆری شارو شارۆچەكانی باشورو ناوەڕاستی عێراق و بگرە دەرەوەی وڵات و هاووڵاتیانی شارەكانی عێراقیش روویان لەم ناوچانە دەكرد، ئەمەش ببووە هۆی بووژانەی كەرتی گەشتوگوزار لە دەڤەرەكەو رەخساندنی هەلی كار بۆ خاوەن چێشتخانەو خواردنگەو هۆتێل و مۆتێل و خاوەن پڕۆژە گەشتیارییەكانی سنوورەكەمان".
گووتیشی " ساڵانە لەم وەرزەی ساڵدا رۆژانە هەزاران گەشتیار رووی لە شوێنە گەشتیارییەكانی دەڤەرەكەمان دەكرد، بڵام بەداخەوە دوای بڵاوبوونەوەی نەخۆشی ڤایرۆسی كۆرۆنا لەزۆربەی وڵاتانی جیهان، كاریگەری زۆریشی كردۆتە سەر سێكتەری گەشتیاری لە هەرێمی كوردستان و سنوورەكەمان، ماوەی هەفتەیەكە هاتنی گەشتیاران بە تایبەت لە رێگای كۆمپانیاكان و گروپاتی گەشتیاری وەستاوە بۆ ناو هەرێمی كوردستان، بەمەش خاوەن پڕۆژە گەشتیارییەكان و ئەو چێشتخانەو شوێنە گەشتیاریانەی دەڤەرەكەمان زیانی زۆری مادیان بەركەوتووەو بازاڕیی پێشتریان نەماوە".
بەڕێوەبەری گەشتوگوزاری سۆران، ئەوەشی ئاشكرا كرد " ئەوانەی ئێستا بۆ گەشت و سەیران دێنە ناوچە كەمان، خەڵكانێكن دانیشتووی پارێزگاكان و شارو شارۆچكەو ناوچەكانی هەرێمی كوردستانن، گەشتیارانی دیكەی شارەكانی باشورو ناوەڕاستی عێراق، بۆ خۆپاراستن لە ڤایرۆسی كۆرۆنا وەك پێشتر گەشت ناكەن، هەروەها لە دەروازەكانیش رێگەی هاتنە ژوورەوەی گەشتیارانی ئێرانی نادرێت، بەمەش رێژەی هاتنی گەشتیاران 85% بۆ سنورەكەمان كەمی كردووە، تا دێت رێژەكەش لەكەمبونەوەدایەو لە چاوەڕوانی ئەوەداین ئایا رەوشەكە چی بەسەر دێت".
ئەوەش دەخاتەروو " ئەو گەشتیارانەش كە دێنە هەرێمی كوردستان لە بازگەكان و هەموو دەروازە نێودەوڵەتییەكان تەنانەت فڕۆكە خانەش پشكنینی وردیان بۆ دەكرێت كە داخلی ناو هەرێمی كوردستان دەبن، بۆ ئەوەی دڵنیابن لەوەی كە هەڵگری هیچ ڤایرۆسێك نین، لە پێناو پاراستنی تەندروستی هاووڵاتییانی كوردستان لە بڵاوبوونەوەی نەخۆشی".
بارزان محەمەد، بەڕێوەبەری گەشتوگوزاری سۆران، دەشڵێت " چەند پڕۆژەیەكی گەشتیاریمان لەبەرنامەو پلاندا هەیە كە ئەنجامیان بدەین، لە رێگەی كەرتی تایبەتەوە بۆ ئەم مەبەستە درەخستەیان بۆ كراوە هەروەها هەندێ‌ لەو پڕۆژانە كاریان تێدا بەردەوامەو بەشێكیشیان لە پلانی وەزارەت و حكوومەت دایە، لەگەڵ ئەوەشدا چاككردنی رێگاو بانەكانی ئەم شوێنانەی خەڵك بۆ گەشت و سەیران رووی تێدەكەن، دەرخسەتەیان بۆ كراوەو بەرز كراونەتەوە، چاوەڕوانی رەزامەندی حكوومەتین بۆ ئەوەی بوودجەی پێویستیان بۆ تەرخانبكرێت و دەست بە كارەكانیان بكرێت.
بەڕێوەبەری گەشتوگوزاری سۆران، دەشڵێت " لە ئێستادا دەستكراوە بە دروست كردنی سەكۆی گەشتیاری حوسێن حوزنی موكریانی لە سەر خەرەندی شاری رواندز، كە ئەم پڕۆژەیە لەسەر بودجەی پارێزگای هەولێر، بە سەرپەرشتی قائیمقامیەتی قەزای رواندز و ئەندازیاری بنكەكەمان بەهزاد خودادا ئەنجام دەدرێت، كارەكانی ئەم سەكۆیە بریتین لە دانانی شتایگەر بە رووبەری 85 مەتر دووجا، دروستكردنی محەجەرەو دانانی ژمارەیەك كورسی، هەروەها بڕیارە پەیمانگەی تەكنیكی تایبەتی رواندز دروشمێكی جوانكاری پێشكەش بەشوێنەكە بكات.

 

 

زۆرترین بینراو