هاووڵاتییانی دەڤەرەكەمان  وەك پێشتر بایەخ بە بواری كشتوكاڵی نادەن

هاووڵاتییانی دەڤەرەكەمان وەك پێشتر بایەخ بە بواری كشتوكاڵی نادەن

موڕشید برادۆستی – سیدەكان : بەرپرسی هۆبەی كشتوكاڵی سیدەكان، لەدیمانەیەكی زاری كرمانجیدا باس لە بەروبومی كشتوكاڵی دەڤەرەكە دەكات و دەڵێت " بەرهەمی هاوینەی دەڤەری سیدەكان لەسەر ئاستی كوردستان ناسراوە و ناوبانگی خۆی هەی، ئاماژەشی بەوەدەدا" بەهۆی قەیرانی دارایی حكومەت هیچ هاوكاریەك پێشكەش بە جوتیاران ناكات .
شوان عەزیز، لەدەست پێكی قسەكانیدا بۆ زاری كرمانجی گووتی "بەداخەوە هاووڵاتیانی سنوورەكەمان وەكو پێویست بایەخ بە كاری كشتوكاڵی نادەن، هۆكارەكەش بۆ ئەوە دەگەرێتەوە كە حكومەت هیچ هاوكاریەكی جوتیاران ناكات، ساڵانی پێشتر لە لایەن حكومەتەوە پەینی كیمیایی، خەرج كردنی 50% كرێی گواستنەوەی بەر و بوومەكان، دابین كردنی گازوایل بە نرخێكی گونجاو بۆ كێڵانی كێلگەكانیان و پێدانی پێشینەی كشتووكاڵێ‌ و چەند هاوكاریەكی دیكە پێشكەش بە جوتیاران دەكرا، بەڵام لە ئێستەدا سەرجەم ئەو هاوكاریانە راگیراون، لەلایەكی دیكەشەوە هاووڵاتیان روویان لە شارەكان كردووە و هەوڵی دامەزراندن لە دام و دەزگاكانی حكومی و حیزبیان داوە، هەروەها بۆردومان و تۆپبارانی وڵاتانی دراوسێ و نائارامی ناوچەكە هۆكارێكی دیكەیە، بۆیە كاری كشتووكاڵی بە رێژەیەكی بەرچاو كەمی كردووە، دەتوانین بڵێین ئێستا بەڕێژەی 50%ی هاووڵاتیان لە دەڤەری سیدەكان كشتوكاڵ دەكەن، ئەم رێژەیەش لە چاو ساڵانی پێشتر زۆر كەمی كردوە. جێخۆیەتی دووای نەمانی قەیرانی دارایی حكومەت گرنگی بە كشتووكاڵ كردن بداتەوە و هاوكاری بە جوتیاران بدات، چونكە زۆر بوونی بەرهەمی نێوخۆی سوودی بۆ حكومەتیش دەبێت.
بەرپرسی كشتووكاڵی سیدەكان روونی دەكاتەوە، بە گشتی جوتیارانی سیدەكان لە بەرهەمی هاوینە گرنگی بە تەماتە و خەیار دەدەن، خۆشبەختانە تەمامەت و خەیاری سیدەكان لە سەر ئاستی پارێزگاكانی هەرێم ناوبانگی خۆی پەیدا كردووە لە كاتی پێگەیشتندا بۆ شار و شارۆچكەكانی هەولێر، دهۆك، سلێمانی رەوانە دەكرێت، هەروەها بەرهەمی زستانەش تەنها گەنم و جۆیە، بەلام ئەو بەرهەمە هەناردەی شارەكان ناكرێت و بەشی ئاژەڵ و مەڕ و بزنەكانیان لێ دەردێنن، پێویستە جوتیاران گرنگی بە بەرهەمەكانی دیكەی وەك زەیتوون، قستەق و بەرهەمەكانی دیكەش بدەن .
شوان عەزیز دەڵێت" ساڵانە لە وەرزی بەهار و تا ئەو كاتانە جۆرە كولەیەك لە دەڤەرەكەمان پەیدا دەبێت، زیانی زۆر بەر بەر و بووم و بەرهەمی هاوینەی كشتووكاڵی دەگەێنێت، بۆیە دووای هەوڵێكی زۆر توانرا 320 لیتر دەرمان و جۆرە قڕكەرێك وەربگرین و بە نرخێكی گونجا بە جوتیارانی سنوورەكەمان بدەین، بەم جۆرە دەرمانەش سەرجەم زیندەوەرە زیان بەخشەكان لە ناو دەبات .
لە بەردەوامی قسەكانیدا گووتی" بە مەبەستی هاوكاری و ئاسانكاری جووتیاران و گرنگیدان بە كەرتی كشتووكاڵی ماوەی چەند ساڵێكە حكومەت بە شێوەیەك لە شێوەكان كاری هێنانەوە و پاككردنەوەی جۆگە ئاودێریەكان ئەنجام دەدات، هەوڵ دەدرێت بۆ ئەمساڵیش جۆگەكان پاك بكرێتەوە.
لە بارەی بەخێو كردنی هەنگ، بەرپرسی هۆبەی كشتوكاڵی سیدەكان رای گەیاند" لە سنووری سیدەكان نزیكەی 500 هەنگەوانمان هەیە بە هەنگەوانی خۆجێی و دەرەوەی سیدەكان كە بۆ بەخێو كردنی هەنگ روو لە دەڤەرەكەمان دەكەن، لە كاتێكدا نزیكەی 10 هەزار هەنگ لە جۆری سندووق و " خەلێف " لە كوێستان و گوندەكانی سیدەكان بەخێو دەكرێت. هەرچەند پێشتر كەل و پەلی هەنگ بە هەنگەوانان دەدرا، وەكو سندوق و دەرمانی هەنگ و زۆربەی پێداویستیەكانی تر، بەڵام ئەوە ماوەی چەند ساڵێكە بەهۆی قەیرانی دارایی هیچ جۆرە هاوكاریەك و پێداویستی هەنگ بۆ هەنگەوانان ناكرێت لەو دەڤەرە، هەرچەندە هەنگەوانان تەواوی پێداویستیەكان بەخۆیان دەكڕن، بەڵام پێنەدانی كەل و پەلی هەنگەوانی لەلایەن حكومەتەوە واتە هاوكاری نەكردنی حكومەت بۆ هەنگەوانان، دەبێتە سستیەك لە كاكردنیان، ئێمەش بۆ ئەو مەبەستە داوا لەسەروی خۆمان كردوە بۆ هاوكاری كردن و پێداویستیەكانی هەنگەوانانی سیدەكان .
گووتیشی " لە سنووری سیدەكان 23 هەزار مانگا و ئاژەڵ و 18 هەزار مەڕ و بزن هەیە ساڵانە روو لە كوێستانەكانی دەڤەری سیدەكان دەكرێت، بەڵام بەهۆی بۆردومان و تۆپبارانی وڵاتانی دراوسێ كاری ئاژەڵداریش زەحمەت بووە و بەخێو كردنیش كەم بۆتەوە، بەگشتی تۆپباران و بۆردومانەكان لە دەڤەری برادۆست كاریگەری هەبووە لەسەر كاری كشتووكاڵی و بەخێو كردنی هەنگ و مەڕ و ماڵات .

 

 

زۆرترین بینراو