كۆمەڵگە بە شێوەیەكی زۆر باش سەیری وەرزشی ئافرەتان دەكات

كۆمەڵگە بە شێوەیەكی زۆر باش سەیری وەرزشی ئافرەتان دەكات

رەمەزان هەرنی- دهۆك: دوای ماوەیەك سڕكردنی یانەی وەرزشی ئافرەتان لە دهۆك ساڵی 2019 سەر لەنوێ ئەو یانەیە كاراكرایەوە لە ئێستادا ئامادەكاری دەكەن بۆ خۆ ئامادەكردن و بەشداری كردن لە خولەكانی كوردستان.
چریسك یونس سەرۆكی یانەی ئافرەتانی دهۆك لە بواری وەرزش وەك یاریزان و راهێنەرو ئیدارە لە زۆربەی یانەكانی عێراق و كوردستان پێشتر ئەزمونی زۆری هەیەو لە دەرەوەی كوردستانیش راهێنەرایەتی یانەیەكی ئوردەنی كردووە, وەك راهێنەر خزمەتی بە چەندین یانەی كوردستان كردووە, ماوەی چوار ساڵ دەستەی كارگێری یانەی ئافرەتانی هەولێر بووەو سێ ساڵ ئەندامی دەستەی كارگێری یانەی زێرەڤانی بووە.
چریسك بە زاری كرمانجی راگەیاندو گووتی" یانەی وەرزشی ئافرەتانی دهۆك ساڵی 2007 دامەزراوە, بەڵام بەهۆكارێك ساڵی 2009 سركراو لە 2019 سەر لەنوێ كرایەوە, لە كوردستان یانەی هاوشێوەی یانەی دهۆك چەند دانەیەك هەیە وەك یانەی وەرزشی ئافرەتانی (كەركووك, هەولێر, ئەفرۆدێت و سلێمانی), یانە وەرزشیەكانی ئافرەتان لە كوردستان رۆڵێكی باشیان هەبووە, بەهۆی ئەوەی هەمیشە ئافرەت بە نمرە دوو هەژمار دەكرێت, بەڵام لە بواری وەرزش یانەكانی تایبەت بە ئافرەتان گرنگی تەواویان بۆ ئافرەتان داوەو خزمەتێكی زۆر باشیان كردوون, ماوەی چوار مانگە بەسوپاسەوە بە هاوكاری پارێزگاری دهۆك و دكتۆر شاكر یانەكەمان دوای سركردنی سەر لەنوێ كاراكراوەتەوەو پاڵپشتی تەواویان كردووین بۆ ئەوەی بۆشایی وەرزشی ئافرەتان لەم پارێزگایە پڕ بكەینەوە, لە خۆ ئامادەكردن و رێكخستنەوەی تیپەكان داین و پلانمان هەیە چەند یارییەكی دۆستانە ئەنجام بدەین بۆ ئەوەی بەشداری خولەكانی كوردستان بكەین, یاریزانەكانی یانەی وەرزشی ئافرەتان دهۆك خەڵكی پارێزگای دهۆك و قەزاو ناحیەكانی سەر بە پارێزگاكەن".
چریسك گووتیشی" ستافی راهێنەران هەمووی ئافرەت نین بەڵكۆ پیاویش هەیە وەك راهێنەرو وەك ئەندامی یانە, ئەمەش ئەوە ناگەینێ یانەكە بەشداری خولێكی پیاوانە بكەن, بەڵام وەك یارمەتیدەر لەگەڵمان بەشدارن و هەندێك یاری راهێنەری ئافرەتی نیەو ناچارین پشت بە راهێنەری پیاو ببەستین, یانەكەشمان تەنها یاری توپی پێ نیە, بەڵكو تەواوی یارییە وەرزشیەكان لەخۆ دەگرێت و ساڵانە هەوڵی زۆر دەدەین نوێ بوونەوە لە یانەكەمان هەبێت".
لە كۆتاییدا گووتی" داواكارم لە خێزانەكان پاڵپشتی كچەكانیان بكەن كە بەهرەیەكیان هەیە بەتایبەتی لە بواری وەرزشی چونكە وەرزش رێگەیەكی تەندرووستە بۆ پاراستنی كچەكانمان بەتایبەت هەرزەكاران بەدەر لە وەی پەرە بە بەهرەكانیان دەدەن و دوور دەخرێنەوە لە تێكڕای كێشە كۆمەڵایەتییەكان, پێویستە كچەكانمان ئامانجێكیان هەبێ و كاری بۆ بكەن تا بەدەستێ بێنن و بگەن بە ئامانجەكانیان, كۆمەڵگە بەگشتی بە شێوەیەكی باش دەڕوانێتە وەرزشی ئافرەتان و پاڵپشتی كچەكانیان دەكەن كە هاتوونەتە نێو ئەم بوارەو رێز لە یاریزنەكان دەگیرێت, ئێمەش پەیوەندیەكی باشمان هەیە لەگەڵ یانەكانی تری وەرزشی لە كوردستان و مەرجی تایبەتمان نیە بۆ هەر كچێك ببێتە یاریزانی یانەكەمان, ئەگەر كچەكە بەهرەیەكی هەبێت بێ مەرج دەتوانێ لەگەڵمان بەشداربێت و بە شێوەیەكی ئەكادیمی هاوكاری دەكەین".

زۆرترین بینراو