لە كوردستان كەمتەرخەمییەكی زۆر هەیە لە ئاستی وەرزشی ئافرەتان

لە كوردستان كەمتەرخەمییەكی زۆر هەیە لە ئاستی وەرزشی ئافرەتان

زاری كرمانجی– سۆران: هەڵاڵە فەیسەڵ، كچە یاریزانێكی گوندی هەسنانە سەر بە قەزای سۆران، تەمەنی 26 ساڵەو دەرچووی كۆلیژی وەرزشی زانكۆی سۆرانە, ماوەی چەندین ساڵە وەك كچە یاریزانێك لە كۆمەڵێك بوار دەردەكەوێت و خاوەنی چەندین نازناوە لە بوار وەرزش.
د/ رەمەزان هەڕەنی
یاریزان هەڵاڵە فەیسەڵ لە دیمانەیەكدا بە زاری كرمانجی راگەیاندو گووتی" لە تەمەنی منداڵیەوە حەز و خولیام بە وەرزش هەبووە, بەڵام بە شێوەیەكی گشتی ساڵی ٢٠١١ چوومە ناو پێشبركێ و پاڵەوانیەتیەكان، واتە ماوەی ٩ ساڵە لە نێو بواری وەرزش یاری دەكەم، سەرەتا بە یاری گۆڕەپان و مەیدان دەستم پێ كردو دواتر گرنگیم بە وەرزشەكانی فوتساڵ و پاسكیل سواری دا، لە ئێستادا بەهۆی سەرپەرشتی كردنم لە وەرزشكردن دوور كەوتوومەتەوەو هیچیان ناكەم, زیاتر گرنگی بە كۆمەڵە یاریزانێك لە هەردوو وەرشی فوتساڵ و پایسكیل سواری دەدەم، لەم یارییانە زیاتر سەركەوتووم و حەز بەو دوو یاریە دەكەم".
هەڵاڵە گوتیشی" یارییەكان زۆر قوڕسن، بەڵام هەمیشە حەزم بە شتی مەحاڵ و قوڕسە، یارییە وەرزشیەكان بەتایبەتی ئاستی وەرزشی ئافرەتان نامەوێ زۆر باسی بكەم, چونكە لە ئاستێكی زۆر كەم و خراپ دایە، كەمتەرخەمییەكی زۆر هەیەو بەرچاو دەكەوێ لە ئاستی وەرزشی ئافرەتان لە كوردستان، بەداخەوە بۆ بەرپرسانی وەرزشی لە كوردستان تەنها كەمێك گرنگی پێ بدرێت و خولی زیاتر بكرێنەوە پاڵپشتی بكرێت دڵنیام ئافرەتی زۆر بەتواناو وەرزشوان زۆر دەبێت لە كوردستان".
هەڵاڵە ئەوەشی خستەڕوو" ئێستا ئەندامی كارگێڕی یانەی وەرزشی سنوورم لە سۆران و یانەی فوتساڵ و پاسكیسواریم دامەزراندوە كە تایبەتە بە كچان, بیرم لەوە كردۆتەوەلە داهاتووش تیپەكانی تری وەرزش دابمەزرێنم بە پێی تواناو كات، هیوا و ئاواتم زۆرە بەڵام تاكە هیوای سەرەكیم ئەوەیە بتوانم لە سۆران خزمەتێكی وەرزشی بە شارەكەم و بە وەرزشوانانی ئافرەت بكەم، دەمەوێ لێرەوە بە كچان رابگەیەنم هیچ كات لە ئاست حەزو ئارەزووەكانتان بێ ئومێد مەبن, تەنها هەوڵ بدەن بۆ ئامانجەكانتان هیج شتێك لە ژیاندا ئەستەم نیە بەتایبەت لەناو دونیای وەرزشدا".
ئەمەشی روونیكردەوەو گوتی" لە كوردستان هیچ بەرپرس و خەمخۆرێك نابینم گرنگی بە وەرزش بدات, بە داخەوە بۆ پەربرسان، نازانم وەرزش لەكام بەرنامەی حكومەتدایەو كەی كاری لەسەر دەكەن و دەبێتە بەشێك لە كارو چاكسازیەكانیان، لەبەر ئەوەی هیج گرنگی و خزمەت گوزارییەك نیە تایبەت بێت بۆ ئافرەتان, ئەمە یەكێكە لە هۆكارە سەركیەكان، هۆكارێكی تریش زۆر گرنگە بوترێت, ئەوەیش هەبوونی ئەو عادەت و تەقالیدەی لە كۆمەڵگەی ئێمەدا هەیە كە رێگرییەكی زۆرە لە نێو خێزانەكان, بەچاوێكی تر سەیری كچەكان دەكەن بۆ هاتنە ناو بواری وەرزشی".
لە كۆتاییدا هەڵاڵە گووتی" وەك دەستكەوت ٨ مەدالیاو ٤ جام و چەندین خەڵات و بڕاوانامەی رێزلێنانم وەرگرتووە، یەكێكم لە دامەزرێنەرانی (رێكخراوی ورە بۆ پەرەپێدانی لاوان و كۆمەڵگە) لەسۆران، جێگری ئەو رێكخراوەم و ئەندامی كارگێڕی یانەی وەرزشی سنوورم لەسۆران, هەروەها لە یانەكە بەرپرسی ئافرەتان و بەرپرسی راگەیاندنم، ساڵی ٢٠١٧ تیپەكەم راگەیاند, بەڵام تەنها لە خولەكانی ناو سۆران بەشداریمان كردووە، ئەمساڵ یەكەم وەرزمان دەبێ و بەشدار دەبین لە خولی پلە یەكی ئافرەتان وەك یانەی سنوور لە كوردستان, ئامانجمان گەیشتنە بە پلە نایابی كوردستان، ئومێدێكی تەواوم بە یاریزانەكانم هەیە كە ئەنجامێكی باش بەدەست بێنین".

بابەتى پەیوەندیدار وەرزشى

زۆرترین بینراو