نوێبوونەوە یەكێكە لە كارە هەرە لەپێشەكانی پارتی دیموكراتی كوردستان

نوێبوونەوە یەكێكە لە كارە هەرە لەپێشەكانی پارتی دیموكراتی كوردستان

حەسەن حەدۆ، بەرپرسی لقی 26ـی گوڵانی پارتی دیموكراتی كوردستان، لە گفتوگۆیەكی تایبەتی زاری كرمانجیدا باس لە كاریگەرییەكانی سەردانی سەرۆك بارزانی بۆ دەڤەری باڵەكایەتی دەكات و دەڵێت: "جەنابی سەرۆك بارزانی بۆ خۆی چاودێری دەڤەرەكە دەكات، چونكە بە ناوچەی خۆی دەزانێت".
حەدۆ دەشڵێت: گۆڕانكارییە ئیدارییەكان لە بەرنامەی پارتی دیموكراتی كوردستان دایە و كۆنگرەی پارتی هەندێك لە گۆڕانكارییەكانی راگرتووە، هەروەها راشیدەگەیەنێت: پێویستە ئاوڕ لەو كاندیدە دەرنەچووانە بدرێتەوە كە دەنگێكی زۆریان هێناو نەگەیشتنە پەرلەمان.
دیمانە/ كەریم سمكۆ
*سەردانی سەرۆك بارزانی بۆ باڵەكایەتی چ كاریگەری هەبوو لەسەر خزمەتكردنی خەڵك و گەیاندنی پڕۆژەكانی حكوومەت بۆ ناوچەكە و چ گۆڕانكارییەكی لێكەوتەوە؟
- بێگومان سەردانی سەرۆك بارزانی بۆ دەڤەرەكەمان، سەردانێكی مێژوویی بوو، گرنگی تایبەتی خۆی هەیە، چونكە جەنابیان وەك خۆی ئاماژەی بۆدا لە سەردەمی شۆڕشی مەزنی ئەیلوول لەم دەڤەرە ژیاوە و ناوچەكە بە ماڵی خۆی دەزانێت، سەردانی بەڕێزیان هەموو چین و توێژەكانی دڵخۆش كرد بەوەی سەرۆك بارزانی خەڵكی خۆی لەبیر ناكات، لە ڕووی خزمەتكردنی خەڵك و گەیاندنی كۆمەڵێك پڕۆژەی خزمەتگوزاری لەهەموو سێكتەرەكان كاریگەرییەكی زۆر باشی هەبوو، چونكە دوای سەردانی بەڕێزیان، ئەنجوومەنی وەزیران راسپێردرا و لێژنەیەكی پسپۆر و پەیوەندیدار سەردانی ناوچەكەی كرد و لە هەموو سێكتەرەكان پڕۆژەی خزمەتگوزاری بۆ ئەو ناوچە كەوتنە واری جێبەجێكردن، و هێشتاش پڕۆژەی گرنگتر ماون لە ئاییندە دەكەونە قۆناغی جێبەجێكردن بۆ خزمەتگەیاندن بە خەڵكی خۆشەویستی ئەم ناوچەیە.
*واتا باڵەكایەتی لای سەرۆك بارزانی چ پێگەیەكی هەیە، بەحوكمی ئەوەی ئێوە لەگەڵ خەڵكی ناوچەكە سەردانی سەرۆك بارزانیتان كردووە؟
- سەرۆك بارزانی لە هەموو دیدارەكاندا لەگەڵ ئێمە و خەڵكی ئەم ناوچەیە، تەئكیدی لەوە كردۆتەوە كە دەبێت باڵەكایەتی و خەڵكەكەی بەباشترین شێوە خزمەت بكرێت، سەرۆك خۆی چاودێری ئەو ناوچەیە دەكات بۆ ئەوەی لەئاست قوربانیدان و خەباتگێڕی خەڵكی قارەمانی ئەو ناوچەیە خزمەتیان بكرێت، چونكە ناوچەكە هەم لە سەردەمی شۆڕشی ئەیلوول و گوڵان لەژێر بۆردومانی فڕۆكەكانی رژێمی ئەوكاتی عێراق بوو، هەمیش لە شەڕی عێراق و ئێران خەڵكەكەی بە مەرگەسات راگواستراو ناوچەكە وێران كرا، لەگەڵ ئەوەشدا لە شەڕی دژ بە تیرۆریستانی داعش پۆلێك پێشمەرگەی گیانفیدای بەخشییە خاكی پیرۆزی كوردستان.
*لەدوای دەستبەكاربوونی كابینەی نۆیەم، كۆمەڵێك گۆڕانكاری ئیداری ئەنجامدران، لەم سنوورە چ بەرنامەیەك هەیە بۆ گۆڕینی پۆستە حكوومییەكان؟
- ئەمە بەرنامەی حكوومەتی هەرێمی كوردستانە، بەڵام هیوادارین گۆڕانكارییەكە سنووری ئێمەش بگرێتەوە و بە دیراسەت بكرێت و خەڵكی دڵسۆز و بە ئەزموون و پسپۆڕ بەرپرسیارییەتییان پێ بدرێت.
*لەسەر گۆڕانكاری خەڵكی ئەو ناوچەیە سی ڤی خۆیان پێشكەشی ئێوە كردووە كە بەرپرسیارییەتییان پێنەدراوە، یا هەمان ئەم دەم و چاوانەن كە لە فەرمانگەیەكی دیكە بەرپرسن و ئاڵوگۆڕیان پێ دەكرێت؟
- وەك حزب بەبێ جیاوازی هەر سیڤییەكەمان بەدەست گەیشتبێت بۆ پۆستێكی ئیداری رەوانەی سەرووی خۆمان كردووە، بەڵام پێمان باشە خەڵكی ناوچەكە لەبیر نەكرێت، چونكە كەسی شیاوی تێدایە و حەزیان لە خزمەتكردنە.
*خەڵك زۆر باسی پۆستی قائیمقامییەتی چۆمان دەكات، لە چۆمان كەستان دەستنیشان كردووە بۆ ئەو پۆستە؟
- تا ئێستا دیارینەكراوە كە كامە كەس بۆ ئەو پۆستە دێتە چۆمان، بەڵام بە دڵنیایی گۆڕانكاری بەڕێوەیە، ئەمەش دەگەڕێتەوە سەر بەرنامە و كاری كابینەی نۆیەمی حكوومەتی هەرێمی كوردستان.
*واتا كەسی دانیشتووی دەڤەری باڵەكایەتی داوای كردووە ئەو پۆستەی پێ بدرێت؟
- بەڵێ داوا كراوە، بەڵام ئێمە لەسەرمان بووە تەنها سیڤییەكان بنێرینە سەرووی خۆمان، رەنگە ئەو رێنمایی و مەرجانەی ئەنجوومەنی وەزیران ئەمە یەكلایی بكاتەوە كە كامە كاندید شیاوە بۆ ئەو پۆستە.
*ئەدی گۆڕانكاری لەسەر ئاستی حزبی؟
- بەهەمانشێوە لەسەر ئاستی كاری حزبیش گۆڕانكاری پێویستە، كادیری چالاك و بە ئەزموونمان هەن، پێویستە بەرپرسیارییەتیان پێ بدرێت. پارتی هەمیشە خۆی نوێ دەكاتەوە و نوێبوونەوە یەكێكە لە كارە هەرە لەپێشەكانی حزب، بەڵام ئەمساڵ پارتیمان بڕیاری بەستنی كۆنگرەی داوە، هەموو هەوڵەكان بۆ بەستنی كۆنگرەیە كە ئێستا لێژنەی سەرپەرشتی و ئامادەكاری كۆنگرە پێكهاتووە و ئامانجیش لە كۆنگرە ئەوەیە پارتی دیموكراتی كوردستان بە بەرگێكی تازەوە خۆی بگونجێنێت لەگەڵ رابردوو و ئێستا و ئاییندە بۆ ئەوەی خزمەتی زیاتری خەڵكی خۆمان و هەرێمی كوردستان بكەین هەم لەسەر ئاستی ناوخۆ و ئیقلیمی، هەمیش لەسەر ئاستی سیاسەتی نێودەوڵەتی.
*واتا بڕیاری بەستنی كۆنگرە گۆڕانكارییە حزبییەكانی لە سنووری لقەكەتان راگرت؟
- بەڵێ ئەو دەنگۆیە هەبوو گۆڕانكاری بكرێت، تا كۆنگرەش نەبەسترێت ئەو بەرنامەیە ناخرێتەوە بەر باس، مەگەر حاڵەتێكی تایبەت بێتە پێشەوە.
* لە ماوەی رابردوو كۆمەڵێك لەو كاندیدانەی بۆ خولی ئەمجارەی پەرلەمان كە دەرنەچوون، سەردانی ئێوەیان كرد، ئەم سەردانەیان بۆ چ مەبەستێك بوو؟
- راستە، ئەوانە خەڵكی دڵسۆز و كادیری لێهاتووی پارتی بوون، كەسوكاری شەهیدان بوون و سەردانی منیان كرد، داوایان كرد و پێیان باش بوو دیدارێكیان هەبێت و بە خزمەت جەنابی سەرۆك بگەن، ئێمەش بە ئەمانەتەوە ئەو داواكارییەی ئەوانمان بەرزكردۆتەوە شوێنی مەبەست، بەڵام ئەو بارودۆخەی كە لە عێراق و ناوچەكە هاتەئارا رەنگە ئەمە ئەو باسەی كەمێك دواخستبێت، ئەگینا پەیامەكەیان گەیشتۆتە شوێنی خۆی. بەرای من ئەو دیدارە كارێكی باشە، چونكە ئەوانە هەموویان دەنگی باشیان لە هەڵبژاردن هێناوە ئێمە وا حساب دەكەین ئەوان لەریزی دەرچوواندان.
*ئەو كاندیدە دەرنەچووانە بۆ پۆستی دیكە كاندید كراون، تا لە گۆڕانكارییەكاندا بەشدار بن و بەرپرسیارەتییان پێ بدرێت؟
- بۆ ئەمە زانیاریم نییە، بەڵام بە دڵنیاییەوە كەسی چاڵاك و بە ئەزموون و خەمخۆی تێدایە پێویستە ئاوڕیان لێ بدرێتەوە و سوود لە كار و ئەزموونیان وەربگیردرێت.
*تۆ وەكو بەرپرسی لقی 26ـی گوڵان، كە لەو چەند ساڵەیە لە باڵەكایەتی خزمەت دەكەی، چۆن دەڕوانییە خەڵكی و كارەكانی خۆت، پێت وایە خزمەتی حزب بۆ ناوچەكە لە ئاست قوربانیدان و خەباتگێڕی خەڵكەكەیدا بووە، یاخود پێویستە كاری باشتر بكرێت؟
- بەراشكاوی دەڵێم، من پێشوو كە هاتمە ئەم دەڤەرە وەك بەرپرسی لق نەهاتم، بەڵكو تەنها وەك پێشمەرگەیەك هاتم بۆ ئەوەی خزمەتی ئەو ناوچە خۆڕاگرە و خەڵكەكەی بكەم، ئیدی لەو دەڤەرە خەڵكێكی زۆری بە ئەمەك و خانەدان و دڵسۆزی رێبازی پیرۆزی بارزانی هەن، لە هەموو سەردەمێكدا قوربانیان داوە بۆ خاكی كوردستان، لەدوای هەردوو هەڵبژاردنی پەرلەمانی عێراق و پەرلەمانی كوردستان پارتی دیموكراتی كوردستان پلەی یەكەمی لەم دەڤەرە بەدەستهێنا، ئەمە مژدەیەكی خۆش بوو بۆ ئێمە، ئەمەش دەگەڕێتەوە بۆ دڵسۆزی و پەیوەستبوونی خەڵكەكەی بە كار و بەرنامەی پارتیمان بۆ حكوومڕانی و وەفای چین و توێژەكانی ئەم سنوورەیە بۆ رۆحی بارزانی نەمر و شۆڕشی ئەیلوول كە سەردەمانێك بارەگاكانی شۆڕش لەم ناوچەیە بوون. بۆیە ئەركی حزبە خزمەتی ئەو ناوچەیە و خەڵكە دڵسۆزەكەی بكات، تا منیش لێرە بمێنم خۆم بە خزمەتكاری خەڵكی ئەو ناوچەیە دەزانم.
*واتا ساڵ بە ساڵ بەرفراوانی لەناو ریزەكانی پارتی لەو دەڤەرە لەبەرفراوانبووندایە؟
-بەڵێ بێگومان، جگە لەوەی پارتی وەك حزبی بێڕكابەر توانی ئەنجامێكی باش لە هەڵبژاردنەكان بەدەستبێنێت، خەڵكێكی زۆریش پەیوەندییان بە ریزەكانی پارتیمانەوە كردووە هەر لەناو سەنتەری قەزا و ناحیەكانی دەوروبەری، ئەمە وامان پێدەڵێت خەڵكی دڵسۆزی رێبازی پارتی و بارزانی زۆرن، بەڵام ئاوڕیان لێنەدراوەتەوە و پێویستە لە جاران باشتر و خاكیتر نزیكبینەوە لە هاووڵاتییان و خزمەتیان بكەین، من خۆم ئەوەندەی سەردانی ماڵباتەكانی ئەو سنوورە بەبێ جیاوازی دەكەم، ئەوەندە لەسەر كورسی دانانیشم.
*لەماوەی رابردوو فۆرمێك بەسەر لقەكان دابەشكرا بۆ ئەوەی بەرپرسانی حزبی پڕی بكەنەوە بۆ خانەنشینی، واتا ئەوانەی بە تەمەنداچوون خانەنشین بكرێن و لەجێگایاندا كەسانی دیكە بەرپرسیاریەتی وەربگرن، ئەم فۆڕمە بۆ لقەكەی ئێوەش هاتووە؟
- بەڵێ بۆ ئێمەش هاتووە، بەڵام گۆڕانكاری هەروەكو گووتم دەگەڕێتەوە بۆ دوای بەستنی كۆنگرە، ئەمەش یەكێكە لە ئەولەویەتییەكانی پارتی دیموكراتی كوردستان و ئێستاش كادیری چالاك و پسپۆڕ و بە ئەزموونی باشمان هەن پێویستە بێنە پێشەوە.
*تۆ خۆشت حەز ناكەی لەشوێنێكی دیكە خزمەت بكەی؟
-من لێرە بم و لە شوێنێكی دیكە بم، ئەركی سەرشانی منە خزمەتی خەڵكی بكەین، بۆ من هیچ جیاوازی نییە، هەر بڕیارێك لە سەروو بدرێت ئێمەش وەك پێشمەرگەیەك و خزمەتكارێكی خاكی كوردستان بە ئەركی سەرشانی خۆمانی دەزانین جێبەجێی بكەین.
*چیتان لەبەرنامەدایە بۆ بنەماڵەی سەربەرزی شەهیدانی ئەم دەڤەرە؟
- بنەماڵەی شەهیدان هەرچیان بۆ بكرێت هەر كەمە، چونكە ئەوان خوێنیان بەخشیوە بۆ ئەو ئازادی و ئارامییەی ئێمە تێیدا دەژین و پێویستە نرخی بزانین، بێگومان پارتی دیموكراتی كوردستان هەمیشە شێلگیرانە لە بەرنامەیدابووە خزمەتی زیاتری بنەماڵەی سەربەرزی شەهیدان بكات، ئێمەش وەك لقی 26ـی گوڵان هەرچیمان لەدەست بێت درێخی ناكەین.
*بەڵام بنەماڵەی شەهیدانی ئەم سنوورە داوای كردنەوەی نووسینگەیەكی كاروباری شەهیدان و ئەنفالكراوەكانیان كردووە، چەند ساڵێكە نەكراوەتەوە، حزب بۆ ئەمە چی كردووە؟
-ئێمەش هەمیشە لە هەوڵداین بۆ ئەوەی بنەماڵەی شەهیدان ئەرك نەكێشن بۆ كاروباری خۆیان رێگای سۆران نەگرنەبەر،حزب كاری خۆی دەكات، بەڵام ئەمە دەگەڕێتەوە سەر بەرنامە و كاری لایەنە پەیوەندیدارەكان لە حكوومەتی هەرێمی كوردستان.
*لە ماوەی رابردوو هێزێك بەناوی (هێزی خەبات) درووست بوو، بۆ ئەو پێشمەرگانەی كە ساڵانێكە خزمەت دەكەن، لە سنووری لقی 26ـی گوڵانیش پێشمەرگەكان بەشدارییان كردووە؟
- پێشتر كە ئەو هێزە دروست بوو ئێمەیان ئاگادار نەكردەوە، بەڵام ئێستا ئاگادارین كە كۆمەڵێك فەرماندە و پێشمەرگەی ئازا و بە ئەزموون كە ساڵانێكی دوور و درێژە خەبات دەكەن و لەپێناو رێبازی پارتی و بارزانی و خاكی كوردستان بەشدارییان لە داستانە جۆراوجۆرەكاندا كردووە، لەم هێزەدا بەشدارن، ئامانج لە دروستكردنی ئەم هێزە بۆ ئەوەیە كە لایەنی پەیوەندیدار هەر كاتێك پێویستی بەم كەسانە بێت و سوود لە ئەزموون و شارەزایی و راوێژیان پێبكات، بتوانن لەژێر ناوێكدا ئامادە بن و بۆ كاتی جیاواز و بەرنامەكانی داهاتوو ئامادە بكرێن.
*لە داهاتوو بەرنامەی چیتان بۆ ناوچەكە و خەڵكی باڵەكایەتی هەیە؟
- پارتی دیموكراتی كوردستان بەرنامەیەكی نییە لە خاڵێكدا كۆتایی پێبێنێت، بەڵكو بەردەوام ئاگاداری رەوشی ژیان و گوزەرانی خەڵكی خۆیەتی هەم لەرووی حزبی و رێكخستنەكانییەوە، هەمیش لەڕووی دەستەڵات و حكوومدارییەوە بۆ ئەوەی بەجوانترین شێوە و لە هەموو سێكتەرەكانی ژیان خزمەت بە خەڵكی خۆی بكات، بۆ باڵەكایەتیش كە پێگەیەكی گرنگی لای پارتی و جەنابی سەرۆك هەیە، ئێمە هەمیشە بەرنامە و پلانی تۆكمەمان هەیە بۆ زیاتر ئاوەدانكردنەوەی ئەم ناوچەیە و خزمەتكردنی بنەماڵەی پێشمەرگە و بنەماڵەی شەهیدان و تەواوی چین و توێژەكانی ئەم سنوورە، چونكە لە سەردەمی شۆرشی مەزنی ئەیلوول تاكە كەسێك ئامادەنەبووە سیخوری بەسەر پێشمەرگەكان و بنەماڵەی بارزانییەوە لەم دەڤەرە بكات، بۆیە بە دڵسۆزی و ئەمەكدارییەوە دۆستایەتی بارزانی نەمریان كردووە و ماڵ و حاڵی خۆیان لەسەر شۆرش داناوە، ئێمەش ئەوەی لە تواناماندا بێت بۆ باڵەكایەتی درێخی ناكەین.

زۆرترین بینراو