عادل عبدالمهدی.. جەلاد یان قوربانی؟

نەوزادی موهەندیس

ڕێك لە 24-10-2018 دا د.عادل عبدالمهدی و كابینەكەی (تەنها 14 وەزیر) متمانەی پەڕلەمانی عێراقیان وەرگرت، دواتر و دوای نزیكەی 8 مانگی تر (4 وەزیری تر) متمانەیان پێدرا، كە لە ئێستادا تەنها دوای ساڵێك و 1 مانگی تەواو بەنیوە ناچڵی ئیدارەی حكومەتێكی ناتەواوی كرد، چونكە تاك ئێستا كابینەكەی نەتوانی تەواو بكات و وەزیری پەروەردە وەك وەزارەتێكی كاریگەر و گرنگی بۆ پڕنەكرایەوە. هەر لە سەرەتاوە دیار بوو ئەم حكومەت و سەرۆكەكەشی ناتوانن 4 ساڵی ئاشتی و ئارامی و ئاوەدانی بۆ عێراق بگێڕنەوە، نا لەبەر ئەوەی ئەم پیاوە بێتوانا و بێ بەرنامە و گەندەڵ و بێ ئەزموونی سیاسی و ئیداری و ئەمنی و داراییە، بەڵكو بەهۆی ململانێ توند و ناڕەواكانی سەرانی حزبە سیاسییە شیعە مەزهەبەكانی هاومەزهەبی خۆیەوە و بەتایبەتیش سائیرون و فەتح كە خۆیان بە كوتلەی گەورەی پەڕلەمانی دەزانی و هەریەكەشیان هەوڵیدەدا سەرۆك وەزیران لەلای خۆی بێت، كاتێكیش نەگەیشتنە ئەنجام و بەناچاری ئەم پیاوە میانڕەوە و خەمخۆرو پاك پەرێزەیان وەك كاندیدی هەردوولا و تەوافوق هێنایە پێشەوە و كردیانە نوێنەری خۆیان و ڕازیبوون بە پێدانی پۆستی سەرۆك وەزیران پێی، بەڵام هەر لەو كاتەوە كەوتنە تەون و داو نانەوە بۆی و ڕێگەیان نەدا بە ئارەزو و ویست و لەسەر بەرنامە و پلانێكی بێلایەن نمایندە و وەزارەت و وەزیرەكان دیاریبكات لەسەر بنەمای لێهاتووی و لێوەشاوەیی و ئەزموون و ئەمانەت و دڵسۆزی و ئەكادیمیبوون و پسپۆڕی و شارەزایی كەسەكان، دوور لە پشكپشكێنەی حیزبایەتی و نەتەوایەتی و ئاینی و مەزهەبی و ناوچەگەری. بەڵام ئەوان لەیەك كاتدا هەم متمانەیان پێداو هەمیش خەنجەری ژەهراویان لە پشتی دەدا و ڕێگری و كۆسپی ناڕەوایان لە پێشدا دروست دەكرد، ئەوە بوو دوای نزیكەی 5-6 مانگ ئەو كات توانیان وەزیرەكانیان دیاری بكەن، بەم شێوەیە ئەم حكومەتە هەر لە سەرەتاوە بە نەبەكامی لەدایكبوو بە نەشتەرگەرییەكی قەیسەری لەسەر دەستی چەند بەناو دكتۆرێكی نەزان و نەشارەزا و ئەنجامیش حكومەتێكی لاواز و بێدەسەڵات و كەمئەندامی لێپەیدا بوو.
سەڕەڕای ئەو هەموو كۆسپ و تەگەرە و خۆپیشاندانانەی لە ماوەی ئەم ساڵەدا ڕووبەڕووی ئەم حكومەتە بووەوە كە زۆرینەی وەزیرەكانی لە شیعە مەزهەبەكان بوو، كەچی توانی بە هێمنی و بێدەنگی گەلێك كاری باش بكات لەڕووی ئیداری و سیاسی و ئابورییەوە و تاڕادەیەك ئەمنییەتیشی هێمن كردبۆوە و نموونەیەكی جوان و سەركەوتوویی كاری پێكەوەیشی لەنێوان هەرسێ سەرۆكایەتییەكەی دەوڵەتیشدا پیشاندا و هەماهەنگی و لێكتێگەیشتنی زۆر باشیان لەنێواندا هەبوو، چەندین گرێبەست و ڕێكەوتنی ئابووری لەگەڵ وڵاتە زلهێزەكاندا واژۆكرد بۆ ئاوەدانكردنەوە و بووژاندنەوەی عێراق، پەیوەندییەكانی عێراق لەگەڵ ناوچەكە و دونیای عەرەبی و ئیسلامی و زلهێزەكانیشدا ئاسایی و گەرموگوڕتر كردەوە.
بەڵام ئەم سەركردە بەناو خەمخۆر و دڵسۆزانەی عێراق كە خۆیان و حزبەكانیان بەشێكی گەورەی حكومەتەكەی بوون كەچی بە ڕۆژ لەحكومەت و شەریكبوون لەشەویشدا ناڕەزایی و خەریكی داو و تەون هەڵخستن بوون بۆ حكومەتەكەی مەهدی. دووڕوویی و درۆزنی ئەو سەركردانە وایكرد ئەم حكومەتە بەم دەردە بچێت و هیچ ڕێزێكیان نە بۆ دەستوور و یاساكان دادەنا، نە بۆ هاووڵاتییان و سەروەری عێراق دادەنا و نە بۆ دام ودەزگا شەرعییەكانیش. هەر بۆیە هەموان خەریكی گەندەڵی و مشەخۆری بوون لەسەر جەستەی ئەم حكومەتە كە لەماوەی 16 ساڵدا لەكۆی داهاتی 850 ملیار دۆلار بڕی 450 ملیار دۆلار بەهەدەرو بەگەندەڵی لە كیس عێراق و هاووڵاتییانی چوون، بەهەق ئەم دەستە سیاسییە بۆگەن و گەندەڵەی عێراقی نوێ بە دەیان ساڵ عێراقیان پاشەكشە پێكرد بۆ دواوە، چونكە لەلایەك بڕوایان بەسیستەمی حوكمڕانی عیلمانی و پەڕلەمانی و دیموكراسی و ئازادییەكان نەبووە و لەلایەكیش بۆ بەرژەوەندی وڵاتانی ناوچەكە و دونیاش كاریان دەكرد و هیچ بەلایانەوە بەرژەوەندی و سەروەری و بەهێزی عێراقیان لا مەبەست نەبووە.
بۆیە لەماوەی 16 ساڵی ڕابووردوودا بە دەیان و سەدان كێشە و گرفتی گەورە و بچووك سەریانهەڵداوە لەناو كۆمەڵگای عێراقیدا هەرلە گەندەڵی و مشەخۆری و بێكاری و هەڵاوسان و نەخۆشی و دواكەوتن و نەخوێندەواری و نەبوونی ئاسایش و خزمەتگوزاری و داتەپینی ژێر خانی ئابووری و نەبوونی كارگەی بەرهەمهێنی پیشەسازی و پاشەكشەی بوارەكانی كشتوكاڵ، گەشتوگوزار، تەندروستی، خوێندن، پەروەردە، ئاوەدانی و ...هتد. گەنجان و لاوان و تەواوی چین و توێژەكان جامی توڕەیی وناڕەزایی و گیانی تۆڵە و ڕق و قینیان سەریكرد و لەماوەی دوومانگی تشرینی یەكەم و دووەمی ئەمساڵدا كەوتنە سەر شەقام و دەستیاندایە توندوتیژی و داواكاری ڕەوای خۆیان بەرزكردەوە و داوای مافی خۆیانیان دەكرد و بەداخیشەوە لە ئێستادا ڕێڕەوی ئەو خۆپیشاندانانە گۆڕاوەو داواكارییەكان لە داواكاری نەمانی گەندەڵی و بێكاری و بێ خزمەتگوزارییەوە بەرزبۆتەوە بۆ دەستلەكاكێشانەوەی حكومەت و پەڕلەمان و هەڵبژاردنی پێشوەختە و هەموار كردنەوەی دەستوور و یاسای هەڵبژاردنەكان و گۆڕینی كۆمسیۆنی هەڵبژاردنەكان و چێكردنی چاكسازی و ..هتد. كە هەموویان داواكاری سیاسین نەك جەماوەری، ئەمەش بەڵگەی بوونی دەست و هێزی دەرەكی ناوچەیی و دونیاییشە لەم خۆپیشاندانانەدا.
ئەوەی لەماوەی ئەم 2 مانگەدا ڕوویاندا لە خۆپیشاندان و ناڕەزایی كە ڕاستەوخۆ حكومەت و سەرۆكەكەیان تاوانبار دەكرد و بەكەمتەرخەم و بێتوانا ناویان دەبرد، هیچ كام لەسەركردە و حیزبە سیاسییە باڵادەستەكان و تەنانەت مەرجەعییەتیش هەڵوێستێكی ئەرێنی و كردارەكیان نەبوو بۆ پاراستنی هەیبەت و شكۆی حكومەت و دامودەزگاكانی و هەموان ڕۆڵی تەماشاكەریان دەبینی و بێدەنگیان هەڵبژارد بوو، هەموانیان لەترس و تۆقینێكی گەورەدا دەژیان، چونكە هەمویان بەشدارن لە هێنانە كایەی ئەم دۆخەی ئێستا نەك بەتەنها حكومەت و عادل عبدالمهدی سەرۆكی.
بۆیە ناڕەوایە و كارێكی نالۆژیكی و بێویژدانیشە تەنها ئەو پیاوە بە لێپرسراوی هەموو كەمتەرخەمی و گەندەڵی و هەڵە و شكستەكانی 16 ساڵی ڕابردوو بزاندرێت و تەنها داوای لێپرسینەوە و سزادانی ئەم پیاوە بكرێت كە تەنها وەك قوربانی وایە و جەلادە ڕاستەقینەكانی كابینەكانی پێشوو لە مالكی و عەبادی و سەرۆكی حزب و ڕەوت و هاوپەیمانێتییەكانی تری لێبێبەری بكرێت.
ئەم پیاوە تەنها هەڵە و كەموكوڕی ئەوەبوو كە بەدڵسافی و دڵسۆزی و دەستپاكی و نیەتپاكییەوە مامەڵەی لەگەڵ هەمواندا دەكرد و متمانەی پێیان هەبوو، بەڵام ئەوان دووڕوویی و خۆپارێزی بنەمای شیعە مەزهەبیان لەگەڵ پیادە دەكرد، ئەم پیاوە دەیویست سیستەمی حوكمڕانی سەقەتی 16 ساڵی ڕابردوو ڕاستبكاتەوە، دەیویست تەنها چەك بەدەست سوپا و هێزەكانی ناوخۆوە بێت، دەیویست میلیشیا چەكدارەكانی سەر بە وڵاتانی دەرەوە نەمێنن، دەیوست گەندەڵی بنەبڕبكات و چەندین ئەنجوومەن و لیژنە و نووسینگەی پشكنەرە گشتییەكان و دەستەی نەزاهە و دیوانی چاودێری دارایی دروستكرد و پشتی دەگرتن بۆ لێپرسینەوەی گەندەڵكاران، دەیویست ئاشتی و ئاوەدانی بۆ وڵات بگێڕێتەوە، گەرەكی بوو بێكاری و هەژاری و مشەخۆری و دواكەوتوویی نەهێڵێت، دەیویست حكومەتێكی یاسایی و هاووڵاتی و دامودەزگایی پێكەوە بنێت. بەڵام هەموویان بەڕوویدا ڕاوەستان و هەرجارەی تۆمەتێكی ناڕەوایان بۆ دروستدەكرد لەوەی كە جارێك سەر بە ئێرانە و جارێك لەگەڵ ئەمریكادا نەرمە و جارێكی تریش لەگەڵ عەرەبە سوونە مەزهەبەكانی كەنداودا ڕێكە و جارێكیش ڕووی كردۆتە چین و دەیانی تریش. كە هەموانیان تەنها مەبەستیان شكستپێهێنانی ئەم حكومەتە بوو بۆ ئەوەی بەرنامە چاكسازی و پاكسازییەكانی سەرنەكەوێت و ئەوانیش بەردەوامبن لە مەلەكردن لەئاوی لێڵ و لیخنی گەندەڵی و دادۆشینی عێراق بۆ بەرژەوەندی حزب و سەركردە و بنەماڵە و وڵاتانی دراوسێدا.
بەهەق دەستلەكاركێشانەوەی ئەم پیاوە و لەم دۆخەدا عێراق بەرە ئاڕاستەیەكی نادیار و ئایندەیەكی تاریك و تونتردا دەبات و جارێكی تریش عێراق پیاوێكی وەك ئەم مەهدی مونتەزەرەی شیعەكانی بۆ پەیدا نابێتەوە كە توانی دڵی هەمووان بشكێنێت لە پێناو بەرژەوەندی عێراقدا و دوور نییە عێراق بەرەو قۆناغێكی خوێناوی و شەڕی ناوخۆ هەنگاو بنێت، وەك چۆن عێراق بە لەكیسدانی عەبدوڵكەریم قاسم پێی نایە قۆناغێكی خوێناوی و هاڕینی شەریكەكان لەدەسەڵاتدا لەناوخۆیاندا. ئیدی ئەمە عێراقە غەریب و عەجیبەكەیە كە هەمیشە و بەدرێژایی 5 هەزار ساڵەی مێژووی خۆی لە دەوامەیەكی هاڕینی یەكتر و خوێن و فرمێسك و كاولكاری و جەنگ و شەڕی ناوخۆیدا دەژی. ئەوەی نامۆیە كە نابێت هیچ دەیە ساڵێك بە ئارامی و پێشكەوتن و خۆشگوزەرانی بژێت.
ئەم مەهدییە وەك خۆی نووسیویەتی لە نامەی دەست لە كار كێشانەوەكەیدا لە 29-11-2019 دا كە هیچ دەسەڵاتێكی ڕەهای نەبووە و چیدیش ناتوانێت لەگەڵ كۆمەڵێك گەندەڵ و دزی ماڵی گشتیدا كار بكات لەپێناو بەرژەوەندی عێراق و عێراقییەكاندا دەست لە كار دەكێشێتەوە.
چونكە دژەكانی سیستەمێكی حوكمڕانی وا بۆگەن و پیسیان پێكەوەناوە گەر موسا بە گۆچانە ئەفوسوناویەكەشیەوە بێتەوە ناتوانێت چاكی بكاتەوە چ جای مەهدییەكی بێ دەسەڵات وەك عادلكەی عێراق، بەڕاستی ئەو ئایەتەی كە هێناویەتییەوە زۆر جوان دەربڕی خواست و ناخێتی كە لەماوەی ئەم ساڵەدا بەدەست ئەم هەموو فشار و گەندەڵی و ناحەزانەوە خواردوویەتی وەك قوربانییەك دێتە پێش چاو نەك وەك جەلادێك و بكوژی خۆپیشاندەران. كە دەڵێت (یا ابت افعل ما تۆمر ستجدنی ان شا‌و الله من الصابرین).
دڵنیام عێراق بەبێ ئەم مەهدیەش هەر دەڕوات بەڕێوە بەڵام وەكو ئەم عادلە بەخۆیەوە نابینێتەوە بەگشتی بۆ عێراقیەكان و بەتایبەتیش بۆ كورد و هەرێمی كوردستان چونكە دۆستێكی دڵسۆز و سەر ڕاست و بەوەفای لەدەستدا. و دەبێت لەمەودوا فاتیحایەكی قوڵ بۆ عێراقێكی یەك و یەكگرتووی بەهێز دابدرێت، چونكە هەر لەئێستاوە بەرەو لەناوچوون و پووكانەوە و داڕمین و مردنێكی لەسەرخۆ و هێواش هەنگاو دەنێت.

بابەتى پەیوەندیدار بیروڕا

گەنج و داینەموو

گەنج و داینەموو

دەرمانناسی

دەرمانناسی

رواندزیانی

رواندزیانی

بیروڕا

زۆرترین بینراو