ئافرەت لاواز نییە

پارێزەر/ رۆژگار ئیبراهیم

گریمان بەڕێزت كرێكاریت، ئایا ئامادەیت تاقێك خۆت كرێكاری بكەیت و بڕۆیتەوە ماڵ و تاقەكەی تر خێزانەكەت بێت بلۆك ڕاكێشێ و خەفتە بگرێتەوە؟
گریمان پۆلیسی، ئامادەیت حەفتەیەك خۆت دەوام بكەیت و هەفتەكەی تر خێزانەكەت لەجیاتی تۆ دەوام بكات و بە شوێن دزێكا ڕابكات تا دەستگیری بكات؟
گریمان پێشمەرگەیت، ئایا قبوڵتە هەفتەیەك خۆت دەوام بكەیت و هەفتەكەی تر خێزانەكەت دەوام بكات و بڕواتە بەرەی جەنگ و دووژمن بێتە سەری یان ببینێت هاوڕێ پێشمەرگەكەی بەبەرچاویەوە خەڵتانی خوێن ئەكرێت؟
گریمان پاككەرەوەی، ئامادەی هاوسەرەكەت نیوەی كارەكەت ئەنجام بدات و دایبی و قوتوی مەشروبی سەرخۆشان كۆبكاتەوە؟
گریمان هەر چییەكی، دوكاندار، پینەچی، شێلم فرۆش، كارمەند، ئامادەی كارەكەت لەگەڵ هاوسەرەكەت دابەش بكەیت؟
گەر ئامادەیت و قبوڵتە ئەوا تۆ باوەڕت بە یەكسانی ژن و پیاو هەیە، گەر نیتە كەواتە باوەڕت بەم یەكسانیە نییە.
ئەزیزم كە ئەڵێین ژن و پیاو یەكسان نین، بەو مانایە نییە بمانەوێ ستەم لە ئافرەت بكەین، بەڵكوو ئەم یەكسانیە بە ستەم كردن ئەزانین لە ئافرەت. بەو مانایەش نییە پیاوان بە گەورەتر و بەهێزتر بزانین لە ئافرەت، نەخێر یەكسان نین چونكە لە زۆر بواردا ئافرەتان زۆر بەهێزترن.
ئادەی كام پیاو، كام زانكۆ و كام ناوەندی مەزن ئەتوانن وەكو دایكێك مناڵ پەروەردە بكەن؟
كام پیاوی مەزن ئەتوانێت وەكو ئافرەت نەوەو جیلی داهاتوو بونیاد بنێت؟
مەگەر پێگەیاندنی نەوەی ئایندە پیرۆزترین و گەورەترین ئەرك نییە؟
دەی پیاوان لەو بوارەدا كڵۆڵن و ناتوانن وەكو ئافرەت بەو ئەركە هەستن.
ئێوەی پیاو تاقەتی زیڕەو گریانی مناڵتان نییە بۆ چەند خولەكێك، كەچی ئافرەتان بەوپەڕی چێژ و ئەوینەوە شەوان ئەگوزەرێنن لەگەڵ زریكەو گریانی مناڵەكانیاندا، ئەرێ ئەم ئارامی و بەرگەگرتنە پیاو هەیەتی؟
لە ڕووی فسیۆلۆژی و سایكۆلۆژی و تەنانەت هەموو لۆژیكەكانی ترەوە، جەستەو پێكهاتەو سروشتی ئافرەتان جیاوازن لە پیاوان، ئەوان لە هەندێ بواردا بەهێزترن لە پیاوان، پیاوانیش لە هەندێ بواردا، ئەمە وایكردوە كە بڵێین یەكسان نین، نەك بە بێهێز و كەمیان بزانین لە ئاستی پیاواندا.
ستەم نیە ئافرەت بەو هەموو جوانی و ناسكیە وەكو پیاوان كاریان پێ بكرێت بەناوی یەكسانیەوە، ئاخر خوا بازووی بە پیاو بەخشیوە تا باری قورسی ژیان ڕاكێشن، میهرەبانی و موحیبەتیشی بە ئافرەت دا تا دونیا پڕ بكەن لە ئەوین و ئاسودەیی.
ئەرێ ئەو كەئابەو نەبوونی كۆنتاكی كۆمەڵایەتی و هەست و سۆزەی لە ئەوروپا هەیە، واهەست ناكەن هۆكارەكەی ئەوەبێت بەناوی یەكسانیەوە ئافرەتانیان ڕاپێچی كاركردن كردوەو خێزان و پەوەردەیان جێهێشتوە؟
باشە پیاوان پێداویستیە مادییەكانی ژیان فەراهەم بكەن، ئەی پێداویستییە ڕوحی و دەرونیەكان كێ بیكات؟ مەگەر كامیان گرنگترن؟
با هەمووی پێداویستیە مادییەكان فەراهەم بن، كە ئەوین و سۆز نەبێت ژیان چ تامێكی دەبێت. بۆیە واهەست ناكەی ئەم كاولستانی بێ سۆز و هەستیە بەشێك لە هۆكارەكەی ئەوەیە كە ئافرەتان سەرقاڵی دابینكردنی پێداویستیە مادییەكان كراون.

 

زۆرترین بینراو