رەبەن بۆیا شێخێك بۆ ئیسلام و مەسیحیەكان

رەبەن بۆیا شێخێك بۆ ئیسلام و مەسیحیەكان

محەمەد ئامۆكەیی- شەقڵاوە: مەزاری رەبەن بۆیا یاخود شێخ وسو رەحمان ناوێكی ناسراو لە لای موسڵمانان و كریستیانەكانی شەقڵاوە، ئەو مەزارە بەپێی قسەی قەشە ئەنیس بێت مێژوەكەی بۆ سەدەی دووهەمی زاینی دەگەڕێتەوە، مەزاری رەبەن بۆیا بۆ موسڵمان و مەسیحیەكان جیاوای نەبووە و تا ئێستاش هەردوو ئاینی مەسیحی و ئیسلام بۆ نزاو پاڕانەوە رووی تێدەكەن، ئەو مەزارگەیە لە قەدپاڵی چیای سەفینەو لە بەرزایی دۆڵێكەو دەڕوانێتە سەر ناوەەندی شاری شەقڵاوە، زاری كرمانجی لەسەر مەزارگەی شێخ وسو رەحمان و هەروەها رەوشی پێكەوە ژیان لەو قەزایە بۆچوونی كەسایەتی مەسیحی و ئیسلامی گەشتیاری وەرگرتوە.
محەمەد ئیسماعیل هاووڵاتییەكی شەقڵاوەیە باس لە شوێنی مەزارگەكە دەكات و بۆ زاری كرمانجی دەڵێت" ئێمەو مەسیحیەكان بە بێ جیاوازی سەردانی ئەو شوێنە دەكەین و بە مەزرگەیەكی پیرۆزی دادەنێین و زیاتر بۆ پاڕانەوە رووی تێدەكەین، لە باب و باپیرانیشەوە ئەو سەردانی كردنە بوونی هەبوە، شەقڵاوە لە كۆنیشەوە مەسیحی لێ نیشتەجێن و ئێستاش ماون وەك براو خوشك تا ئێستا هەڵسوكەوت دەكەین و هیچ گرفتێكان لە نێوان نەبوە و بۆ خۆشی و ناخۆشیەكان لەگەڵ یەك بوینەو پەنا بەخوا ئەو برایتیە بەردەوامی دەبێت.
ئیلاف، یەكێك بوو لە سەردانی كەرانی مەزارگەی رەبەن بۆیا لە شاری هەولێرەوە رووی لەو مەزارگەیە كردبوو گووتی" هەركات هاتبم بۆ شەقڵاوە دەبێت سەردانێكی ئەو مەزارگەیە بكەم، جگە لەوەی بۆ نزاو پاڕانەوە رووی تێدەكەم شوێنێكی دڵ رفێنیشە ئەتوانرێت بۆ لایەنی گەشتیاریش سودی لێببینرێت، ئامانجی سەردانی منیش ئەوەیە چەند ساڵێكە شوم كردووە و منداڵم نەبووە بۆیا دڵم بەوەدەكرێتەوە لێرە نزابكەم و داوا لە خوابكەم بۆخاتری ئەو پیاو چاكە منداڵێكمان پێ ببەخشێت.
قەشە ئەنیس، قەشەی كەنیسەی شەقڵاوە بە زاری كرمانجی راگەیاند" مەسیحی و موسڵمانەكانی شەقڵاوە، مێژویەكی دوورو درێژیان هەیە لە پێكەوە ژیان، ئەوە پێكەوە ژیانەو بوونی پەیوەندیێكی بتەوەی كۆمەڵایەتی لە نێوان ئێمەو موسلمانەكان وایكردووە مەزارگەی رەبەن بۆیا ببێتە مەزارگەیەكی هاوبەش لە نێوان خەڵكی هەردوو ئاینەكە، ئەو مەسیحیانەی روو لە شێخ وسو رەحمان دەكەن بە داگیرساندنی مۆم و نزاو پاڕانەوە و نوێژ و هەروەها ئەو كەسانەی منداڵیان نیە لەو مەزارگەیە داوای پاڕانەوە دەكەن هەروەها موسڵمانەكانیش بەو شێوەیە سەردانی مەزارگەكە دەكەن."
ئەوەشی گووت"مەزارگەی رەبەن بۆیا سیمای شاری شەقڵاوەیە و موسڵمان و مەسیحیەكان هەمیشە لەو شوێنە كۆدەبنەوە بۆ هەردوولا جێگای شانازیە، بۆیا داوا لە بەرپرسانی ئەو قەزایە دەكەم لە رووی خزمەتگوزاری گرنگی بەو مەزارگەیە بدەن و سەرنجی گەشتیارانی بیانی و ناوەخۆیی بۆ ئەو شوێنە پیرۆزە رابكێشن.
قەشە ئەنیس دەشڵێت" رۆژانە دەرگای مەزارگەكە كراوەیە و خەڵك ئەتوانێت رووی تێبكات بەڵام بۆ مەسیحیەكان رۆژێكی تایبەت هەیەوە هەموو ساڵێك لە كۆتایەكانی مانگی چوار بەشێكی زۆری مەسیحیەكان لە كوردستان بگرە دەروەش رووی تێدەكەن تایبەت لە جەژنی قیامە.
جێگای باسە مەزارگەی رەبەن بۆیا كەوتۆتە سەر رێگای گشتی شەقڵاوە هیران و تا نزیك مەزارەكە رێگای ئۆتۆمبێل هەیە، دەبێت گەشتیار بە پیادە بڕوات، بەر لە 14ساڵیش حكومەتی هەرێمی كوردستان، بۆ یەكەم جار رێگای گەیاندە دامێنی مەزارگەكە، گۆڕی ئەو پیاو چاكە لە ئەشكەوتێكدایەو لە بەرزی (20) م لە شاخ هەڵكەندراوە، دوو ژووری گەورە و چەند ژوورێكی بچووكیشی هەیەو گەشتیارانی مەسیحی لە دوای جەژنی قیامە لە زۆربەی شوێنەكانی عیراق ڕووی تێدەكەن.

زۆرترین بینراو