تەحسین سەعدوڵڵا: توشی قەرزێكی زۆر بووینە

تەحسین سەعدوڵڵا: توشی قەرزێكی زۆر بووینە

چاوپێكەوتن –رائیب شێروانی
تەحسین سەعدوڵڵا، بەڕێوەبەری ئاوی سۆران لە چاوپێكەوتنێكدا لەگەڵ هەفتەنامەی زاری كرمانجی گوتی:" كێشەی گەورەمان لە سۆران زێدەڕۆیی كردنە بۆ سەر ئاو، كە زیاتر لە 27 هەزار هاوبەشی ئاو هەن، تا ئێستا زیاتر لە 13 هەزار پێوەری ئاو بۆ ئەو هاوبەشانە بەستراون، بەردەوامیش دەبین لە بەستنی پێوەر.
بەڕێوەبەری ئاوی سۆران دیاركرد:" لە سۆران زیاتر لە 27 هەزار هاوبەشی ئاو هەن، تا ئێستا زیاتر لە 13 هەزار پێوەری ئاو بۆ ئەو هاوبەشانە بەستراون، رۆژانە خەڵك سەردانی ئێمە دەكات بۆ بەستنی پێوەر، هەروەها ئاو نادەینە هیچ هاوبەشێكی نوێ بەبێ بەستنی پێوەر، هەروەها ئەوانەی مامەڵەیان هەیە دەبێت پێوەر ببەستن، ماوەیەك بوو كۆمپانیا كاری نەدەكرد، ئەوەش لەبەر قەیرانی دارایی و هەروەها خەڵك پارەی نەبوو پارەی پێوەرەكە بدات، بۆیە دواكەوتنی مووچە و ڤایرۆسی كۆرۆنا زۆر كاریگەری لەسەر بەستنی پێوەر هەبوو، ئێستا كۆمپانیا دەستی بە كارەكانی كردۆتەوە، هەروەها لەگەڵ وەزارەتی شارەوانی و پارێزگار كۆبووینەتەوە و داوامان كردووە زێدەڕۆییەكان لاببرێن و خەڵك ناچار بكرێت بە بەستنی پێوەر، چونكە وەكو دەبینین لە زۆر شوێن ئاوێكی زۆر دەدەینە خەڵك، بەڵام لە هەمان كاتدا ئاوێكی زۆر بە فیڕۆ دەچێت، ئەگەر بتوانین ئەو ئاوەی بە فیڕۆ دەچێت كۆنتڕۆڵ بكەین ئەو گەڕەكانەی بێ ئاون، بۆ ئەوان دابین بكەین، كێشەی ئاومان نابێت، ئەوەش بە بەستنی پێوەر چارەسەر دەبێت.
تەحسین سەعدوڵڵا، دەشڵێ:" قەرزی ئێمە لە لای خەڵك زیاتر لە 12 ملیار دینارە، هاووڵاتیان وەكو پێویست پارەی ئاو نادەن ئەوەش بۆتە كێشە، ئەو كۆمپانیایەی كە پارەی ئاو كۆ دەكاتەوە، گلەیی دەكات و باس لەوە دەكات كە خەڵك پارەی ئاو نادەن، بۆ نموونە لە قەزای سۆران خەڵك تەنیا 11% پابەندە و پارەی ئاو دەدەن، ئەوەش بۆ قەیرانی دارایی و دواكەوتنی مووچە دەگەرێتەوە، لە هەمان كاتدا خەڵك لە بەستنی پێوەر هاوكاری ئێمە ناكات، ئەگەر لەو بابەتە خەڵك هاوكاری ئێمەی كردبایە ئەو كێشانەی هەن زۆربەیان چارەسەر دەبوون".
تەحسین سەعدوڵڵا، بەڕێوەبەری ئاوی سۆران روونیشیكردەوە :" لە گوندەكان كێشەی ئاو هەیە، ئەوەش لەبەر ئەوەیە ماوەیەكی زۆرە هیچ پرۆژەیەكی ئاو لە گوندەكانی سنووری بەڕێوەبەرایەتیەكەمان جێبەجێ نەكراوە، میزانی و بودجەیەكی پێویستمان لەبەر دەست نیە تا بتوانین پرۆژەی نوێ بۆ خەڵك جێبەجێ بكەین، ئەو میزانیەی دەدرێتە ئێمە تەنیا 17% ئەوەش بەشی ئەوە ناكات پرۆژەكانی ئاو كار پێ بكەین و خەڵك بێ ئاو نەبێت، بۆیە توشی قەرزێكی زۆر بووینە، گوندەكان رۆژ بۆ رۆژ فراوانتر دەبن، ئەو پرۆژانەی پێشتر كراون بۆ 10 ماڵ كراون ئێستا ژمارەی هاووڵاتیان زیاتر بووە، بۆیە خواستێكی زۆر هەیە بۆ جێبەجێ كردنی پرۆژەی نوێ و گۆڕینی شەبەكاتی ئاو، بەڵام ئێستا ناتوانین هیچ هاوكاری خەڵك بكەین لە نۆژەنكردنەوە زیاتر.
بەڕێوەبەری ئاوی سۆران زیاتر دەڵێ :" تا ئێستا لە گوندەكان پێوەری ئاو نەبەستراوە، ئەوە بۆ قۆناغی دووەم دەبێت، چونكە لە قۆناغی یەكەم تەنیا پێوەری ئاو لە سەنتەری قەزا و ناحیەكان دەبەستین.
تەحسین سەعدوڵڵا، بەڕێوەبەری ئاوی سۆران ئاشكراشی كرد:" كێشەی گەورەمان لە سۆران زێدەڕۆیی كردنە بۆ سەر ئاو، زێدەڕۆیی بە دوو شێوە دەكرێت، یەك هی خانووبەرەیە لە گەڕەكەكان كە هاووڵاتی بەشێوەی زێدەڕۆ خانووی دروست كردووە، ئەگەر ئاو بۆ دابین نەكەین، ناچارە بە زێدەرۆیی رابكێشێت، ئەوەش كاریگەری لەسەر شەبەكی ئاو هەیە، حاڵەتی دووەم خەڵك هەیە بە زیادە ئاوی بردووە، خەڵك لەسەر خەتی رەئیسی ئاوی بە دزی بردووە، ئەو خەڵكەمان دەست نیشان كردووە و توشی ئیجرائات دەبن، كە تا ئێستا چەندین كەس لەسەر زێدەڕۆیی كردن بۆ سەر ئاو سزا دراون، ئێستا نووسراوێكمان بۆ هاتووە كە قایمقام بۆ پۆلیسی شارەوانی كردووە كە لیژنەی زێدەڕۆیی شارەوانی لە هەمان كاتدا دەبێت كاری ئێمەش بكات، بۆیە لە دوو هەفتەی رابردوودا چەند كەسێك لەسەر زێدەڕۆیی كردن سزا دراون".

زۆرترین بینراو