Share on facebook
كۆمەڵگە و زیانەكانی تەكنەلۆژیا
پێنج شەممە, 27 ئەیلول 2012 08:17

ZKW: زۆرێك لە توێژینەوە دەروونی و پەروەردەیی و كۆمەڵایەتییەكان جەخت لەسەر ئەوە دەكەنەوە، كە ئەگەر ئاستی هوشیاری ئەندامانی كۆمەڵگەیەك لە ئاستی ئەو پێشكەوتنە تەكنەلۆژییە نەبێ‌، كە ئەمڕۆ دونیای تەنیوەتەوە و بەبێ‌ پلان و بەرنامە ببنە بەرخۆر و بەكاربەری ئەو تەكنەلۆژیایە، دواجار رووبەڕووی كێشەی پەروەردەیی و كۆمەڵایەتی دەبنەوە.
لە بەر رۆشنایی ئەو خوێندنەوانەدا یەكێك لە مەترسییەكانی ئامێرەكانی تەكنەلۆژیا لە ئێستادا بۆ سەر ئاییندە و كەسایەتی جگەرگۆشەكانمان و بەتایبەتی هەرزەكاران، زیاد لەپێویست و خراپ بەكارهێنانیانە. بۆ نموونە بە پێچەوانەی دیوە ئەرێنی و پڕ سوودەكانی هەریەكە لە مۆبایل و كۆمپیوتەر و ئێنتەرنێت، چونكە ئاستی هوشیاری و جۆری مامەڵەی زۆرێك لە كۆمەڵگەكەمان لە ئاستی ئەو ئامێرە تەكنەلۆژییانەدا نییە، دەبینین لە ئەمڕۆدا بە هۆی خراپ بەكارهێنان و زۆر بەكاربردنیان تا راددەی ئیدمان، بە زیان بۆ خودی جگەرگۆشە و خێزانەكانمان شكاوەتەوە، هەر لە دەركەوتنی حاڵەتی دواكەوتن لە خوێندن و بەلاڕێداچوون و سەركێشان بەرەوە كەسی توندوتیژ بگرە، تا دەگاتە دروستبوونی كێشەی كۆمەڵایەتی، كە بەداخەوە لەو نێوەدا بەشێكی زۆر لە دایك و باوكان هۆكاری ئەمەن. زۆرێك لە خێزانی كۆمەڵگەكەمان بەبێ‌ رەچاوكردنی تەمەن و ئاستی هوشیاری منداڵەكانیان، جا بە هۆی لاساییكردنەوە بێت، یان هەر هۆیەكی تر، بۆ خۆیان بوونەتە سەرچاوەی ئەو كێشانە. لێرەدا دەكرێ‌ لە باوكانمان بپرسین: منداڵێكی دە ساڵان و زۆرجار كەمتریش، كە زۆرترین كاتەكانی لە ماڵ و دوورترین شوێنی قوتابخانە بێت مۆبایلی بۆ چییە؟ هەرزەكارێك كە لە هەستیارترین قۆناغی تەمەنی دایە، حیكمەت لە چی دایە تا درەنگانی شەو بە دیار ئێنتەرنێتەوە بێت؟ سوودی چییە منداڵ لەگەڵ تۆ بەدیار بەرنامەی تەلەفزیۆنی و فیلمی توندوتیژی دانیشێ‌؟ ئەمانە و كۆمەڵێ‌ پرسیاری تر پێویستە باوكان لە خۆیانی بكەن و لە رێگەیەوە سۆراخی هۆیەكانی بەلاڕێداچوونی منداڵەكانیان و ئەو كێشانە بكەن، كە بۆیان دەهێننە ناو ماڵ.