خوالێخۆشبوو عبدالواحید گوانی(قەڵای سەوز): لەسەر كار و پڕۆژە خێرخوازیەكانی بەردەوام بن و درێژە بە پرۆژە ژینگەیەكان بدەن
یەک شەممە, 08 تشرینی یەکەم 2017 19:40

ZKW : سوبحان شكۆ- سۆران- كوردستان پریەتی لە دیمەنی سەرنح راكێش و جوان, تاڤگە و كانیاوەكان, رووبار و زێ  و دەربەندەكان, كێو و چیا و شاخەكان, باڵندە و گیان لەبەرەكان, گوڵا و رووەك و دارەكان, هەموویان بە یەكەوە دیمەنی جادوویی و جێژ بەخش نیشاندەدەن, بەڵام بۆ مانەوەی ئەو دیمەنە جوان و جادوویانە هێزێك پێوستە كە نەك هەر ئەم جوانیانە وەك خۆی بهێڵێتەوە بگرە دەبێت بە هێزی عقڵا و بیركردنەوەی ژیرانەی خۆی جوانی ئەم سرووشتە جوانتر بكات و لە جاران رازاوەتری بكات, عبدالواحید حسێن حاجی سەید لەپاڵ خەباتی پێشمەرگایەتی و شاخ, خەباتی بۆ سرووشتی كوردستان و پاراستنی كردووە.
بنەماڵەی خوالێخۆشبوو عبدالواحید حسێن حاجی سەید ژیانامەی پر لە شكۆ و قارەمانیەت و سرووشت دۆستی عبدالواحید گوانی بۆ زاری كرمانجی باس دەكەن.
عبدالواحید حسێن حاجی سەید لە بنەماڵەیەكی دیار و كورد پەروەرە، لە  5-1-1967 لە بناری چیای زۆزك لە گوندی گوان چاوی بەدونیا هەڵێناوە، گوانی هەر لە تەمەنی منداڵیەوە باوكی لە دەست دەدات، لە لای مامی (حاجی حەسەن) درێژە بە ژیانی دەدات.
لە ساڵی 1970 دەست بە خوێندن دەكات لە قوتابخانەی دیانای سەرەتایی، لە ساڵی 1974 بە هۆی  شۆرشی كورد و ڕژێمی بەعس لە خوێندن دادەبرێت، ئاوارەی گوندی روستی سەر بە ناوچەی باڵەكایەتی دەبێت و بۆ ماوەیەك لەوێ‌ نیشتەجێ دەبێت، جارێكی تر بە هۆی بارودۆخی سەختی ناوچەكە بە خۆی و بنەماڵەكەی ئاواری وڵاتی ئێران دەبن، لەوێ‌ دەچێتەوە بەر خوێندن بەڵام دووبارە بەهۆی چەند هۆكارێك ناتوانێ‌ درێژە بە خوێندنەكەی بدات.
عبدالواحید گوانی لە ساڵی 1976 لەگەڵ دەست پێكردنی شۆرشی گوڵانی پێشكەوتن خواز دەگەڕێتەوە باشوری عێراق، هەر لەگەڵ گەڕانەوەی بۆ عێراق نەفی دەكرێتەوە بۆ خواروی عێراق لە قەزای "رومێسە"ی سەر بە پارێزگای سەماوە نیشتەجێ دەبێت، جارێكیتر هەر لەوێ درێژی بە خوێندنی سەرەتایی دەدات, دوای مانەوەی دوو ساڵ لە خواروی عێراق عبدالواحید گوانی دەگەڕێتەوە بۆ زێدی باو باپیرانی, خوێندنی سەرەتایی و ناوەندی درێژە پێدەدات، لە ناو پرۆسەی خوێندن  گوانی لە ریزەكانی پارتی دیموكراتی كوردستان دەست بە كاری رێكخراوەی دەكات, بە پلەی ئەندام لە رێكخراوی ئازادی گەل دەست بە چالاكی سیاسی دەكات و  پاشان دەبێتە بەرپرسی (رێكخراوی پێشڕەوانی گەل) لە لیژنەی ناوچەی پەیمانی سەر بە مەكتەبی سیاسی پارتی دیموكراتی كوردستان.
عبدالواحید گوانی لە ساڵی (1982- 1983) لە سنووری دەڤەری سۆران و پارێزگای هەولێر و كەركوك درێژە بە كارو چالاكیە حیزبیەكانی دەدات.
عبدالواحید حسێن لە ساڵی 1985 بۆ یەكەم جار بە هۆی كاری سیاسی لە لایەن رژێمی بەعسەوە دەستگیر دەكرێت و دوای لێكۆڵینەوە و بەند كردنی ئازاد دەكرێت.
ناوبراو ساڵی 1986 لەگەڵا خوێندنی ناوەندی و چالاكی سیاسی ژیانی هاوسەرگیری پێك دێنێت و دوای هەفتەیەك لە ژیانی هاوسەرگیری لە لایەن ڕژێمی بەعسەوە دەستگیر دەكرێت و دەگوازرێتەوە بۆ هەولێر, دوای لێكۆڵینەوە و دان پێدانانی  بەو تۆمەتە خراپەی كە درا بووە پاڵی ئازاد دەكرێت.
عبدالواحید گوانی لە ساڵی 1987 لە سەر داوای مسعود بارزانی ئەندامی مەكتەبی سیاسی پارتی دیموكراتی كوردستان دەچێتە ( گوندی ڕاژان) لە رۆژهەڵاتی كوردستان، دوای راوێژكردنی لەگەل بارزانی رادەسپێردرێت بۆ كارو چالاكی و رێكخستنی حیزبی لە سنووری هەولێر و كەركوك،  لە كاتی بۆردومانی زێوە و ئالۆزی سیاسی و سەربازی ناوچەكە بەردەوام گوانی هەماهەنگی  لەگەڵ بارزانی و هەڤاڵانی لە رۆژهەڵاتی كوردستان دەبێت.
عبدالواحید حسێن حاجی سەید بە هۆی دڵسۆزی بۆ كاری سیاسی و رێكخستنی حیزبی لە دەڤەرەكە چاوی زیاتری ڕژێمی بەعس و ناحەزانی دەكەوێتە سەر، بەو هۆیەوە بۆ جاری سێیەم دەستگیر دەكرێت و پاش زیندانی كردن و لێكۆڵینەوە، دان پێدانان بە كاری رێكخستنی حیزبی جارێكی تر ئازاد دەكرێتەوە، لەگەل (عەبدوڵا)ی برای لە ساڵی 1989 دەبردرێن بۆ ئەمن (صدیق).
پاش كۆتایی هاتنی شاڵاوی ئەنفال و كیمیابارانی هەڵەبجە و وەستانی شەڕی 8 ساڵەی نێوان عێراق و ئێران، عبدالواحید گوانی لە ژێر فرمانی سەرۆك بارزانی دەستی كردۆتەوە بە كار و چالاكی حیزب بە هەماهەنگ لەگەل پۆڵێك لە هەڤاڵانی رێكخستن و پێشمەرگە لە سنووری سۆران تا دەگاتە هەولێر كارو چالاكی جۆرا و جۆریان ئەنجام داوە.
دوای لاواز بونی ڕژێمی بەعس بووە هۆی پەیدابوونی جموجۆڵی سیاسی وسەربازی لە ناوچەكە وە خۆ ئامادەكردنی بەرەی كوردستانی بۆ ڕاپەرینە مەزنەكەی ساڵی 1991، عبدالواحید گوانی پەیوەندیەكی بەهێزی لەگەڵ بەرێز مسعود بارزانی هەبووە, بۆ خۆ ئامادەكردن لەڕاپەرینی سەرتاسەری لە شارەكانی كوردستان، بارزانی لەڕێگەی نامەیەكی تایبەتەوە گوانی ئاگادار دەكاتەوە كە ئەندام و لایەگرانی پارتی و لایەنەكانی تر و خەڵكی دەڤەرەكە لە ژێر ناوی بەرەی كوردستانی خۆیان ئامادە بكەن بۆ ڕاپەرینی سۆران و شارەكانی تری كوردستان، دوای ئەم ئامادەكاریە و لێدانی یەكەم چەقماغەی ڕاپەرین لە رانیە، ڕاپەرینی (سۆران و رواندز و شەقڵاوە )ی بە دوا دادێت.
گوانی ڕۆلی بەرچاوی دەبێت لە ئاگادار كردنەوەی خەڵكی دەڤەرەكە و لە بەرەبەیانیەكی زوو توانرا دەست بەسەر فرقەی حیزبی بەعس و چەندین بارەگا و كەلوپەلی سەربازی دا بگیرێت, دوای ئەنجامدانی ڕاپەرین لە ڕێگەی فرمانی بارزانی دەبێتە (ئەندامی ناوچەی رواندز) و هەر لەسەر فرمانی بارزانی مەفرەزەیەك پێك دەهێنێت بۆ پارێزگاری كردن لە بارەگا و كەلوپەلە سەربازیەكانی ڕژێمی بەعس كە دەستیان بەسەردا گیرابوو.
عبدالواحید گوانی لەیەكەم هەڵبژاردنی پەرلەمانی كوردستان لە ساڵی 1992 ڕۆڵێكی بەرچاوی دەبێت، دوای پێك هێنانی یەكەم كابینەی حكومەتی هەرێمی كوردستان دەستێكی باڵای دەبێت لە دامو دەزگا حكومی و حیزبی ناوچەكە, لەگەڵ دەست بەكار بوونی كابینەی یەكەمی حكومەتی هەرێمی كوردستان و دامودەزگا حكومیەكان دەكرێت بە (بەرێوبەری ئاسایشی سۆران) دواتر پۆستی  (قایمقامی قەزای سۆران) وەردەگرێت.
ساڵی (1994_1996) لە كۆنگرەی یازدەهەمی پارتی دیموكراتی كوردستان دەبێتە "كارگێری لقی 10 پارتی دیموكراتی كورستان" لە بەشی پەیوەندیەكان درێژە بە كاری حیزبی دەدات, هەرئەوكات دەبێتە یەكێك لە دەستەی دامەزرێنەرانی سەنتەری ڕۆشنبیری سۆران.
عبدالواحید حسێن سەید جگە لە كاری سیاسی هەستی مرۆڤ دۆستی و خۆبەخشی لا گەڵاڵە بووە, بۆیە هەر ئەو كات بیر لە دامەزراندنی كۆمەڵەیەك دەكاتەوە بۆ خاوەن پێداویستیە تایبەتەكان, بیرۆكەكەی خۆی دەكاتە كردار و لەژێر دروشمی كار لە پێناو مرۆڤایەتی كۆمەڵەی سۆران بۆ چاودێری پەككەوتوان لە ساڵی 1999 دادەمەزرێنێت، بە خۆبەخشی دەبێتە "سەرۆكی كۆمەڵەكە" لە ڕێگەیی هەماهەنگی خۆیەوە لە چەندین وڵات هاوكاری بۆ پەككەوتوان كۆدەكاتەوە,
عبدالواحید حسێن گوانی بەهۆی دڵسۆزی و نیشتمان پەروەری لە كاردا ساڵی 2002 دەكرێتە قایمقامی قەزای چۆمان و تا ساڵی 2016 ە, لەو ماوەیەدا چەندین كار و پرۆژەی گرینگی كردووە گرینگترینیان (دیاری كردنی ڕۆژی جل وبەرگی كوردی, هەڵكردنی ئاڵای كوردستان لە چیایی هەڵگورد, بە نێودەوڵەت كردنی دەروازەی حاجی ئۆمەران, دروست كردنی هەماهەنگی بەهێز لە نێوان كۆماری ئێران و هەرێمی كوردستان, گرینگی دان بە پرسە نەتەوەییەكان و دادپەروەری كۆمەڵایەتی دژی گەندەڵی, دانانی مۆنۆمێنت و پاركی 11ی ئازار لە دەڤەری باڵەكایەتی, دامەزراندنی ناشناڵ پاركی هەڵگورد-سەكران).
ناشناڵ پاركی هەڵگورد- سەكران یەكێكە لەو ناشناڵ پاركانەی كە بیرۆكەی سەرەكی لە لایەن عبداواحید گوانی دارێژرا, ئەم پاركە نیشتیمانیە كاری لەسەر دەكرێت بە هاوكاری و هەماهەنگی پارێزگاری هەولێر و حكومەتی هەرێمی كوردستان، عبدالواحید گوانی كرا بە "سەرۆك بۆردی كارای ناشناڵ پاركی هەڵگورد-سەكران", لە ئێستادا لە ریزبەندی 18مین ناشناڵ پاركی جیهانە،
عبدالواحید حسێن گوانی هەوڵی جدی داوە لەگەڵ وڵاتانی (ئیتالیا, هۆلەندا, نەمسا) لە ڕێگەی تیم و دانانی نەخشە و هێنانی پسپۆری ژینگەیی, هەنگاوە كرداریەكان لە جێبەجێ كردنی پرۆژەكە دەستیپێكردوە، لە ئێستادا نەخشەكەی داندراوە لە ڕێگەی ستافێكەوە كار لەسەر جێبەجێ كردنی پڕۆژەكە دەكرێت.
گوانی دوای رادەستكردنەوەی پۆستی قایمقامی چۆمان لە دوا ساتەكانی ژیانی لە كوردستان و دەرەوەی وڵات چارەسەری نەخۆشیەكەی دەكرا, عبدالواحید حسێن لە كاری خۆبەخشی و ژینگەی و مرۆڤ دۆستی بەردەوام دەبیت و چەندین پڕۆژە و كۆمەك بۆ پەكەوتوان كۆدەكاتەوە، لە دوا هەناسەی ژیانی وەسیەت دەكات بۆ ڕۆڵەكانی و ئەو هەڤاڵانەی كە لەگەڵی بوون كە لەسەر كار و پڕۆژە خێرخوازیەكانی بەردەوام بن و ئەو پرۆژە ژینگە و خێرخوازیانەی كە دایمەزراندوون درێژەی پێبدەن و دەوڵەمەند تری بكەن.
عبدالواحید گوانی بە هۆی ئەو ئازارەی لە زیندانەكانی ڕژیمی بەعس بە گورچیلەكانی كەوتبوو كاریگەری لەسەر تەندوستی مابوو تا نەخۆشیەكەی قورستر كرد, دوای ململانێیەكی زۆر لەگەڵ سەختی نەخۆشیەكەی عبدالواحید حسێن حاجی سەید گوانی لە 26/6/2017 لە یەكیك لە نەخۆشخانەكانی نەمسا كۆچی دوای دەكات و دووای خۆی پێنج كور و سێ كچە بە ناوەكانی (نێچیروان، رێبیین، دلۆڤان، دیموكرات، ژێكاف، ڕۆژان، مژدە، رێژین) بۆ خاك و نیشتیمان جێدێڵێت.