Share on facebook
ئێران لە عێڕاق ڤاتیكانی دەوێ نەك مەككە!
پێنج شەممە, 12 تشرینی یەکەم 2017 18:24


ئاسۆ حاجی


كاركردن بۆ بە ڤاتیكان كردنی نەجەف و كەربەلا و ململانێ پێكردنیان لەگەڵ مەككە  پڕۆژەیێكە چەند ساڵە ئێران لە عێڕاقدا دەستی پێكردووە لە ڕیگای دامەزراندنی هەرێمێكی موقەدەس كە شارەكانی نەجەف و كەربەلا و حیللە دەگرێتەوە كە لە ژێر فەرمانڕەوایی مەرجەعیەتی شیعە دابن و هەموو سەروكارێكیان لەلایەن مەرجەعیەت و حەوزەی عیلمی كە وەك دەستەی راوێژكاری دەبێت ڕایی دەكرێ.

ئەو پڕۆژەیە لە دوای ساڵی دوو هەزار و پێنج دەستی پێكردووە و سەرەتا لە گێڕانەوەی ئەو ناوچە و شارۆچكە و گوندە شیعە نشینانە كە كەوتبوونە ناو ئیدارەی پارێزگا سونیەكان بۆ سەر هەردوو پارێزگای نەجەف و كەربەلا،هەروەها دابین كردنی ئابوریەكی سەربەخۆ كە مەرجەعیەت بتوانێ لە ڕێگایەوە پێگەی ئاینی خۆی زیاتر بە سەر خەڵك بسەپێنێ و ملكەچی فەرمانەكانی خۆیان بكات بۆیە هەموو داهاتی مەزارگە پیرۆزەكان (العتبات المقدسە) و فڕۆكەخانەكانیان دەچێتە خەزێنەی مەرجەعیەت كە ساڵانە بە ملیۆنان شیعە و بە درێژایی ساڵ ڕوو لەو شارانە دەكەن و بە گوێرەی ئاماری فەرمی پارێزگای كەربەلا لە ساڵی 2015 زیاتر لە حەڤدە ملیۆن كەس سەردانی مەزارگە پیرۆزەكانیان كردووە.

لە پێناو دابین كردنی داهاتێكی زۆرتر هەموو خاڵە سنووریەكانی نێوان عێڕاق و سعودیاشیان خستەوە سەر ئەو پارێزگایانە كە جگە لە داهات سودێكی دیكەشی بۆ شیعە هەبوو بە دابڕاندنی سونەكانی عێڕاق لە سعودیە هەروەها كۆنتڕۆلكردنی بیابان و بادیەی ئەنباڕ كە بەردەوام مەترسی لێدەكرا گروپە توندڕەوە سونیەكان لەوێوە مەترسی بۆ سەر نەجەف و كەربەلا دروست بكەن.

ئێران دەیەوێ مۆدێلی ڤاتیكان لە نەجەف دووبارە بكاتەوە نەك مۆدێلی مەككە چونكە ئەوەی یەكەمیان دەسەڵاتی دینی و دونیایی لە دەستە و خاوەنی سوپا و پۆلیسی تایبەت و نوێنەرایەتی لە دەرەوە و حكومەتی تایبەت بەخۆی هەیە،بەڵام كەعبە تەنها شوێنێكی پیرۆزی ئاینیە و هەر لەو ڕوەشەوە مامەڵەی لەگەڵ دەكرێ و داهاتەكەشی دەگەڕێتەوە ڕیاز و لەلایەن خێزانی دەسەڵاتدار تەسەڕوفی پێدەكرێ.

ئەو هەرێمی پیرۆزە ئێستا هەموو ئادگارەكانی بەباشی وەدیار كەوتوون و پێگەكانی دەوڵەت بوونی تەواو بووە،لە ڕووی داراییەوە یەكێكە لە دەوڵەمەندترین حكومەتەكانی دونیا و خاوەنی سوپای تایبەت بەخۆیەتی (حەشدی شەعبی)كە بە فتوای مەرجەعیەت دروست كراوە و پاشان لە پەڕلەمانی عێڕاق یاسای بۆ دەرچووە و بودجەی تایبەتی بۆ داندراوە كە بەگوێرەی میدیاكان دوو بە قەدەر بودجەی سوپای ڕەسمی عێڕاق دەبێت.

هەرێمی پیرۆز لە لایەن سەید عەلی سیستانی مەرجەعی گەورەی شیعەكانی عێڕاق بەڕێوە دەبردێت كە كەسێكی ئێرانیە و تەنانەت ڕەگەزنامەی عێڕاقیشی نیە و لە زمانی فارسی بترازێ عەرەبیەكی شەق ق شوڕ دەزانێ،هاوشان لەگەڵ سەید عەلی سیستانی نوێنەری تایبەتی ڕابەری كۆماری ئیسلامی ئێران بوونی هەیە كە ناوی سەید موجتەبا حوسەینیە و یەكێكە لە كەسە نزیك و باوەڕپێكراوەكانی خامەنەئی و یەكێك بووە لە موریدە دڵسۆزەكانی ڕابەری كۆچكردووی شیعە ئیمام خومەینی كە سەید عەلی سیستانی هەموو بڕیار و فتوایەكان بە ڕاوێژكردن كەگەڵ سەید مەجتەبا حوسەینی دەردەكا و بیرۆكەی هەرێمی پیرۆز و دروست كردنی حەشدی شەعبی دەڵێن لە ڕێگای ئەوەوە بۆ مەرجەعیەت پێشنیار كراوە.

بەستنەوەی شیعەكانی هەموو دونیا بە هەرێمی پیرۆز یەكخستنەوەی تواناكانی شیعەیە كە لە خاكی پیرۆزدا ساڵانە بە ملیۆنانیان لە نەجەف و كەربەلا گیرفانەكانیان خاڵی دەكەن و منداڵەكانیان بە دڵسۆزی بۆ مەرجەعیەت پەروەردە دەكەن،پەروەردەیێك كە لە پەروەردەی هەزار و چوارسەت ساڵی ڕابردوو جیاواز بێت،ئەو جارەیان پەروەردەی خۆپاراستن نا بەڵكو پەروەردەی هێرش و دەسەڵات و حوكمكردنی ئەوانەی دیكە بێت،بۆیەشە دەبینین ساڵ دوای ساڵ هێزی شیعە بەشێوەیەك زیادی كردووە تا ڕادەی تەواو كردنی هیلالی شیعی كە لە یەمەنەوە تا لوبنان و سەر ئاوەكانی دەریای سپی درێژ بۆتەوە كە سەرچاوەی ئەو هێزە بەشێكی بۆ هەرێمی پیرۆز دەگەڕێتەوە كە سەرچاوەی سەرەكی دابین كردنی توانای مادی و مەعنەیە بۆ گروپە چەكدارەكانی شیعە بە پانتایی هیلالەكە.