Share on facebook
ژیاننامەی شەهیدانی بنەماڵەی حەمەد میر نەبی ناوەندەیی
دووشەممە, 06 تشرینی دووەم 2017 12:40


سوبحان شكۆ- سۆران
لە هەر چوار پارچەی كوردستان چەندین گروپ و حزب و لایەنی سیاسی و سەربازی هەن, بەشێك لەم گروپ و حزب و لایەنانە بوونەتە وێستگەیەك بۆ ئەوەی هاوڵاتیانی هەر چوار پارچەی كوردستان لە ڕێگەیانەوە كاری حزبی و سیاسی و سەربازی خۆیان بكەن, هێزی پێشمەرگە و چەند هێزێكی تر بە ناوی جیا جیای كوردستانیش بەسەر كۆی ئەم حزب و لایەنانە دابەش بوون, وێرای ئەوەی هێزی پێشمەرگەی كوردستان و هێزەكانی تر بە سەدان و هەزاران قارەمانیەتی و نەبردی دژی هێزە داگیر كارەكانیان تۆمار كردووە, بەڵام  لەپاڵا ئەمەش بەداخەوە بەهەر هۆكارێك بێت كۆی هێزەكان لەچەند وێستگەیەك دژی یەكتر وەستاونەتەوە و سەنگەریان لە یەكتر گرتووە, شەهید پاشا ناوندەیی لەپاڵا باوك و دوو براكانی كە لە رووبەروو بوونەوەی هێزە داگیر كارەكان شەهید كراون ئەویش و چەندانی تر بە دەستی براكانیان لە هێزەكانی تری كوردستان شەهید كراون.
خانەوادەی حەمەد میر نەبی ناوندەیی ژیاننامەی پر لە شكۆ و گەورەیی  و نەبەردی شەهیدانی بنەماڵەكەیان بۆ زاری كرمانجی باس دەكەن.
حەمەد میر نەبی ناوندەیی ناسراو بە حەمەد ناوندەیی لە ساڵی ۱۹۲۷ لە بناری چیای هەڵگۆرد لە بنەماڵەیەكی خانەدان و كورد پەروەر لە دایك بووە، باوكی شەهید حەمەد میر نەبی هەستی كوردایەتی لە ئاستێكی زۆر بەرز دابووە, لەو كاتی حروزەكان دێن كوردستان داگیر دەكەن باوكی حەمەد میر دەوری بەرچاوی هەبووە لەبەرەنگار بوونەوە و چەندین شەڕی سەخت و دژواری بەرامبەر حروزەكان كردووە، لە رووبەروو بوونەوەكاندا ژمارەیەك شەهید و برینداریان هەبووە و داگیركاران تا ئەو ئاستە دڵا رەق بوونە كە دەست بۆ ئافرەت ببەن و شەهیدیان بكەن لە پاڵا پیاوان, ئەمەش دەرخستەی ئەو راستیەیە داگیر كارانی كوردستان جیاوازیان نەكردووە لە نێوان ئافرەت و پیاو بەڵكو بەدەستی گڵاویان شەهیدیان كردوون، لەبەر شۆڕشگێڕی كوردایەتی باوكی, حەمەد میر ناوندەیی هەر لە تەمەنی لایەتی هەستی كوردایەتی لە لا درووست دەبێت و دەبێت بە پێشمەرگە و چەكی شەرەف هەڵدەگرێت, لە شەڕە قوڕسەكانی ئەوكات قشڵی گەڵاڵە و ڕواندز بەژداری دەكات و لە گرتنی هەردوو قشڵ دەوری بەرچاوی دەبێت.
حەمەد ناوندەیی لەگەڵ دامەزراندنی حزبی پارتی دیموكراتی كوردستان پەیوەندی بە حزبەكە دەكات, لەبەر ئازایەتی  و لێهاتووی خۆی حەمەد ناوندەیی دەكرێتە بەرپرسی بازگەی چۆمان, شەهید لە ساڵی ۱۹٤۷ هاوسەرگیری دەكات و  خودا پێنج و كوڕ و چوار كچی پێ دەبەخشێت, شەهید حەمەد میر منداڵەكانی لەسەر هەمان رێچكە و بیری قوڵی نەتەوەیی خۆی پەروەردە دەكات, لە ساڵی ۱۹٦٥ زراری كوڕی دەبێتە پێشمەرگە لە گەڵ باوكی, زرار خوێندەواری تەواوی هەبووە بەو هۆكارەی لە مەدرەسەی فەقێیانی خوێندوە چونكە ئەوكات قوتابخانە لە گوندەكان نەبووە.
ساڵی ۱۹۷٤ شەهید حەمەد كوڕێكی تری بەناوی جەبار لە تەمەنی لاوێتیدا دەبێتە پێشمەرگە، بەژداری چەند داستانی تێكشكاندنی ڕژێمی بەعسیان كردووە لەوانەش (گۆڕەز، زۆسك، گەروی ئۆمەر ئاغا، گوندی هەسنان، حەسەن بەگ), لە كۆتا نسكۆی شۆڕشی ئەیلولی مەزن ڕژێمی بەعس هێرشێكی بەربڵاوی بۆ حەسەن بەگ و گوندی هەسنان هێنا, ئەوكات حەمەد میر لەگەڵا هەردوو كوڕەكەیی و هەڤاڵانی تری ڕەدی هێرشی ڕژێم و داگیركاران دەدەنەوە و پاش شەڕێكی قوڕس حەمەد میر لەگەڵا دوو لە كوڕەكانی شەهید دەبن بەناوەكانی( زرار, جەبار ), دووای كۆتایی هاتنی رووبەروو بوونەوەكە تەنها تەرمی شەهید زرار دەگەڕێندرێتەوە بۆ بنەماڵەكەیان و تەرمی شەهیدان حەمەد میر و جەبار كوڕی بێ سەروشوێنن دەبن و تاكو ئێستاش ڕووفاتەكانیان نەدۆزراوەتەوە, لەوكاتەی نسكۆی شۆڕشی ئەیلول مەزن ڕویدا نەتوانرا پرسەشیان بۆ دابنرێت.
حەمەد میر لە دووای شەهید بوونی سێ كوڕ و چوار كچ لە دوای خۆی جێ دەهێڵێت و بەرێوەبردنی ماڵا دەكەوێتە ئەستۆی خێزانی, لەگەڵ هەڵگیرسانی شۆڕشی گوڵان براو كەسوكاری شەهید حەمەد میر پەیوەندی بە شۆڕشەكە دەكەن و دەوری بەرچاویان دەبێت لە شۆڕشی گوڵان, دواتر و دووای دەستپێكردنی ڕاپەڕینی بەهاری ۱۹۹۱ بنەماڵەی شەهید حەمەد میر ناوندەیی درێژە بە رێبازی شەهیدانی بنەماڵەكەیان دەدەن و سورتر دەبن لەسەر ڕێبازی پارتی و بارزانی, لەپاش ڕاپەڕینیش كوڕەكانی حەمەد میری دەورێكی بەرچاویان هەبووە لە درێژە پێدانی خەباتی باوك و براكانیان.
دواتر یەكێكی تر لە كورەكانی حەمەد ناوندەیی بە ناوی(پاشا) شەهید دەكرێت بە دەستی پارتی كرێكارانی كوردستان- توركیا.
پاشا حەمەد میر ناوندەیی لە ساڵی ۱۹٦۲ لە بناری چیای هەڵگۆرد چاوی بە دونیا هەڵهێناوە, خوێندنی سەرەتایی تەواو كردووە, پاشا دووای ئەوەی  لە ساڵی ۱۹۷٥ لە نسكۆی شۆڕشی ئەیلول باوك و دوو برای شەهید دەبن نەیتوانیوە درێژە بە خوێندن بدات و ئەركی بەڕێوەبردنی ماڵ لەپاڵا دایكی دەكەوێتە سەر شان و نەشیتوانیوە ئاوارەی خاكی ئێران بێت, چونكە لە كاتی شەهید بوونی باوك و دوو برای تەنها تەرمی یەك برا بۆ دێتەوە, تەرمی باوك و برایەكی تری دەكەوێتە دەست ڕژێم و نازانرێ‌ ماون یا ئەوانیش شەهید بوینە، لەو كاتەی ڕژێمی بەعس لێخۆشبوونی دەركردووە ئەوان هەر بێ سۆراخ بوون.
شەهید پاشا لە ڕاپەڕینی بەهاری 1991 دەورێكی كاریگەری هەبوو و لە دوای ڕاپەڕین  و لە ساڵی 1997 لەسەر فرمانی جەنابی سەرۆك مسعوود بارزانی دەكرێت بە جێگری لیوای ۷٤ ی باڵەك, لە هەر كاتێك نیشتیمان پێویستی پێی بوایە ئەركە نیشتیمانیەكەی جێبەجێ دەكرد, پاشا حەمەد میر ناوندەیی لە بەرواری 30ی 9ی 1997 بەهۆی شەری بەسەر داسەپاوی حكومەتی هەرێمی كوردستان, لە شەڕێكی دەستەو یەخەدا دەكەوێتە بۆسەی چەكدارانیPKK  , پاشا حەمەد میر و دوو لە هەڤاڵانی بە ناوەكانی(مەهاجیر, كەریم) شەهید دەكرێن، شەهید پاشا دەبێتە 16هەمین شەهیدی بنەماڵەكەیان و لە دوای شەهید بوونی 6 كور و 3 كچ لە دوای خۆی بۆ نیشتیمان و خاكی پیرۆزی كوردستان بەجێ دەهێڵێت، ئێستاش بنەماڵەكەیان درێژە پێدەری خەباتی شەهیدەكانیانن.