Share on facebook
فلۆرنتینۆ و زێدان و ریال مەدرید
دووشەممە, 06 تشرینی دووەم 2017 13:27

جەلال سەعید
یانەی ریال مەدرید بەشێوەیكی تەندروست و سەركەوتوو گوزەر ناكات و بەردەوام ئاستی لە هەلكشان و دابەزینە و یاری بۆ یاری جیاوازی لە بەهێزی و ئاستبەرزی بەدی دەكرێت، نەیتوانیووە بەرگری و بەردەوامی بە سەركەوتنەكان بدات و هەمیشە ئاستبەرزی و بەهێزی لە ترزان بووە و جێگیری بەخۆیەوە نەبینیووە.
سەركەوتنی لە چامپیۆنسلیگ لە دوو ساڵی رابردوو بە سەر مان یونایتد لە جامی سوپەری ئەوروپا و بەدەستهێنانی جامی سوپەری ئیسپانیا كاتێك توانی لە هەردوو یاری كلاسیكۆ لە یانەی بەرشلۆنە بباتەوە و جامەكە بەرز بكاتەوە، لە خۆبایی و لوت بەرزیەكی گەورە لە نێو یانەی ریال مەدرید دروست كرد، بەهۆی ئەوەی شكەشتێكی گەورەیان بە یانەی ركابەر هێناوە و تامی دۆڕاندنیشیان بە مان یونایتد و مۆرینهۆ چێشتووە، بەو بیرو هزرە هەنگاویان نا كە هیچ یانەكی دیكەی ئیسپانیا و ئەوروپا لە توانایاندا نییە رووبەرووی یانەی شاهانە ببێتەوە، لە كاتێكدا ئەگەر بە ورودی سەیری هەر سێ‌ یارییەكە بكەین بە تایبەت هەردوو یاری كلاسیكۆ بۆت دەر دەكەوێت یاری یانەی بەرشلۆنە و مان یونایتد زۆر بەهێزتر و ئاستبەرزتر بووە بەڵام تەنها ئەنجام لە بەرژەوەندی ئەوان نەبوو، پێموایە ئەگەر بەخت و هەندێ‌ هۆكاری دیكە نەبوانە یانەی ریال مەدرید خاوەنی هەر سێ‌ ئەو نازناوە نەدەبوو چونكە خاوەنی یەك لە هەردوو نازناوی چامپیۆنسلیگ و خولی لالیگا نەدەبوو.
یانەی ریال مەدرید وەك بلێی سر كرابێت و هەستی بەوە نەكردبێت بێ‌ هێڵی هێرشبەرە و یاریزانی ئەو هێڵەی پەك كەوتن و لە توانیاندا نییە بەردەوام بن لە تۆماركردنی گۆڵ و دروستكردنی مەترسی و فشار لە سەر یانەكانی ركابر و دیكەی خول و پاڵەوانیەتیەكان، یانەیەكی وەك ریال مەدرید بەو یاریزانانەی ئیستای هێلی هێرشبەر ناتوانی هیچ لە هیچ دروست بكات و ببێتە مەترسی و دڵە راوكێی یانەكانی بەرامبەر، نەكرین و نەهێنانی یاریزانی هێرشبەر و فرۆشتنی مۆراتا هەڵەیەكی كوشندەی یانەی شاهانە بوو.
راستە پێكان و دابەزینی ئاستی هەندێ‌ لە یاریزانانی هۆكارێكن بۆ ئەو بارو دۆخەی یانەی ریال مەدرید بەڵام یەكێك لە هۆكارە سەرەكییەكانیشی، پیرێز فلۆرنتینۆ و راهێنەرە، فلۆرنتینۆ زیاتر وەك بزنزمانێكی سەركەوتوو و پیلان گێری بۆ یانە ركابەرەكانی لە تۆپی پێ‌ خۆی نیشانداوە، ئەوەندەی خۆی بزنزمانی و بە دارژتنی پیلان دانان بۆ ركابەران و نەیارانی سەرقال كردووە، ئەوەندە خۆی بە دارژتنی بەرنامە و پلانی تەندروست بۆ یانەی شاهانە سەرقاڵ نەكردووە، فەلسەفەیەكی تایبەت بە یانەی شاهانەش بەدی ناكرێت تاكو كارەكانی یانە و كار ئەكتەرانی بەو فەلسەفەیە تێكەڵ بكات و رایان بێنی.
ئەوەی لە فلۆرنتینۆ و یانەی شاهانە بەدی دەكرێت فەلسەفەی بزنزمانییە لە كرین و فرۆشتنی یاریزانان و بەرێكردن و هێنانی راهێنەری هەمە جۆر و هەمە چەشن و خەرجكردنی داهاتێكی زۆری ساڵانەش بەشێكی دیكەی كێشە و گرفتەكانیەتی.
نەبوونی بەرنامەو فەلسەفەیەكی تایبەت بە یانە بۆتە سەر ئێشە و گرفت بۆ یاریزانان راهێنەران، هۆكارێكیشە بۆ لێك ترازان و لێك حالی نەبوونی یاریزانان لە یەكترو لە راهێنەرانیان، جگە لەمانەش تاكرەوی فلۆرنتینۆ لە كاركردنی بۆتە زۆرێك لە كێشە و گرفتەكانی یانەی ریال مەدرید،
گەیشتن بە لوتكە و بە دەست هێنانی سەركەوتن بوونی هەیە و دەبێت، بەڵام بەرگریكردن و بەردەوامی دان بەسەركەوتنەكان پێویستی بە بەرنامە و پلان و فەلسەفەی تایبەت هەیە.
رۆژگارو مێژووش پێمان دەلێت" هەموو كەسێك و دەزگایەك پێویستی بە فەلسەفەیەكی تایبەت بەخۆی هەیە و دەبێ‌ بەرنامە و پلانی كاتی و درێژخایەنی هەبێت و بەردەوامیش ئەبدێدی بەرنامە و پلانەكانی خۆی بكات تاكو بتوانی كارئەكتەرانی بەشێوەیەكی تەندروست و پێشكەوتوو  لەگەڵ فەلسەفەو بەرنامەی كاركردنی خۆی رابێنی، ئەوكات دەتوانی سەركەوتن و پێشووەچوونی زیاتر و جوان و تە ندروست مسۆگەر بكات و بە ئاستێكی بەهێزو جێگیریش خۆی بخاتە بەرچاوان.