Share on facebook
ڕۆشنبیری غەڕقی
هەینی, 10 تشرینی دووەم 2017 12:04


ئاسۆ  حاجی

 

ڕۆشنبیرانی كوردستان لە نێو دەستەواژە غەڕبیەكان و تێفكرینە شەڕقیەكەیان خۆیان بزر كردووە و سەریشیان لە خەڵك شێواندووە بۆیە وشەی غەڕقی كە لە لێكدانی هەردوو وشەی (غەڕب و شەڕق)ڕەنگە شیاو بێت بۆ وێنەكردنی دۆخی ڕۆشنبیری لە ناو كۆمەڵگەی كوردەواری.

ڕۆشنیرەكان وەك حیزبەكان تەنها ناونیشانەكەیان هەمان ناونیشانی حیزبەكانی وڵاتانی پێشكەوتوون هەر لە دیموكڕاتی و سۆشیال دیموكڕات و سۆسیالیست و دادپەروەری و شتی لەو بابەتە بەڵام بە ناوەڕۆكێكی تەواو پێچەوانە كە عەقڵیان لە سنووری بنەماڵە و عەشیرەت و جوگرافیای دەڤەرێك تێپەڕناكات، بۆیە لای ئەوان پیرۆزیەكان و گرنگی و پێویستی بەگوێرەی تێڕوانینی حیزبی باڵا دەست لە دەڤەرەكە و بەرژەوەندی بنەماڵە و عەشیرەت دەگۆڕێت بۆیە بینیمان خیانەتی فرۆشتنی كەركوك نەبووە بابەتی ئەو نووسەر و میدیایانەی دەڤەری سڵێمانی بە پێچەوانەی هەولێر كە میدیاكانی هەموو بەرنامەكانیان بۆ تەرخانكرد یان شەهید كردنی ڕۆژنامەوانێك بە دڕندانەترین شێوە لەلایەن حەشدی شەعبی نەبووە شایەنی گووتاری نووسەرانی سلێمانی و نەبووە شایەنی بەرنامەیێكی تەلەفزیۆنی یان ڕادیۆ،بەڵام لێدانی ڕۆنامەنووسێك لە ناو پەڕلەمان نەك بووە بابەتی گووتار و میدیا بەڵكو پەڕلەمانتار و سەرۆكی پەڕلەمان و ڕێكخراوە مەدەنیەكان بەیاننامەیان بۆ دەركرد.

دوو ڕوویی سیاسیەكان بۆتە بەشێك لە خەسڵەتی ڕۆشنبیران و ئەوەش لەو شكستەی ڕۆشنبیر بەرامبەر بە سیاسیەكان زیاتر لە بیست و شەش ساڵە تێیدا دەژیێن لەو كاتەوەی بەسەر حیزبەكان دابەش بوون و دەستیان لەبەر یاسیەكان پان كردەوە و لەگەڵیشیدا سەران چەمایەوە،ئەوان لە جەستەی مەعریفەتە دەرچوون و خۆیان لە ناو قاوغی بوونە كادیر و ئەندامی حیزب مەڵاسدا و دەستیان بە بەرهەمهێنانی مەعریفەی قوڵكردنەوەی ڕقی مێژوویی و تۆڵەكردنەوەی سیاسی كردوە لە چوارچێوەی بەڕێوەبردنی ئیڕهابێكی فكری چوارچێوە دیاریكراو و بەرنامە بۆ داڕێژراو كە ئامانجەكە لێی بە شەیتان كردنی ئەوەی دیكە واتا هەموو ئەوانەی خەڵكی ئەو دەڤەرە نەبن و سەر بە حیزبەكانی ئەو دەڤەر نەبن و هەڵگری بیروباوەڕی باوی ئەو دەڤەرە نەبن.

ڕۆشنبیرانی غەڕقی لە یەك كاتدا زۆربەی جاریش لە هەموو گووتارەكانیاندا نەیار و ڕكابەرەكانیان بە پێوەدانگی ئەوروپی دەپێون و لە قالبی دەستەواژە مۆدڕێن و باوەكانی ناو كۆمەڵگا پێشكەوتوەكان هەوڵی دارشتنەوەیان دەدەن تەنها بۆ ئەوەی عەیب و كێماسیەكانیان نیشانی خەڵك بدەن بە ئامانجی ناشیرین كردنیان،لە هەمان كاتدا خۆیان لە پەنای هەموو ئەو شتە ناشیرنانە دەشارنەوە كە بۆ ڕكابەرەكانیان دەیهۆنەوە كە زیاتر دەستەواژەی لۆكالی و ناوچەگەری و بنەماڵەیین و سیاسیەكان بۆ بەهێزبوونی پێگەی خۆیان بەكاریان دێنن و ئەو ڕۆشنبیرانەش لە بن سێبەریان خۆیان گەرمۆلە دەكەن و لە تەڕی دەخۆن و لە وشكی لێی پاڵدەدەنەوە،بە پێچەوانەی خەڵك كە لە یەك كاتدا باجی بێ ویژدانی سیاسیەكان و بێ مۆڕاڵی ڕۆشنبیرانی غەڕقی دەدەن.


تێبینی: وشەی غەڕقی هونەرمەندی سینەماكار هونەر سەلیم بەكاری دەهێنێ.