Share on facebook
ئایا لە ئەنجامدانی ڕیفراندۆم زەرەرمان كردووە؟
دووشەممە, 13 تشرینی دووەم 2017 12:44

نیهاد سیسۆ ستوونی
لە دوای داگیركردنی ناوچە كوردستانییەكانی دەرەوەی ئیدارەی هەرێم لە لایەن میلیشییەكانی حەشدی شەعبی و هێزە عێراقییەكانی تر، بەداخەوە لە لایەن هەندێ‌ كەسایەتییە سیاسیەكانی هەرێم بە هەزار و یەك بەهانە كەوتوونەتە گیانی ڕیفراندۆم كە پێیان وایە دەبا هەر ئەنجام نەدرابا یان دەبا بۆ ماوەیەكی دیارینەكراو پاشخرابا كەچی زۆربەی لەوانیش چوونەتە سەر سندۆقەكانی دەنگدان، دەنگیان بە بەڵێ‌ داوە بۆ ڕیفراندۆم، ئێستاكە هەندێ‌ لەم كەسایەتییە سیاسییانە وایان خەلك چاوەشە دەكەن كە وا بیربكەنەوە شتێكی بڤەیان ئەنجامەداوە..
من لێرەوە بە هەموو لایەنە سیاسییەكان و ناسیاسییەكان دەلێم گەر  بەهێزێكی مەنتقانە و دوور لە چاوەشەكاری  بڕوانینە بایەتی ئەنجامدانی ڕیفراندۆم بۆمان بە ڕوونی دەردەكەوێ‌ هیچ شتێكی بڤە ئەنجام نەدراوە، گریمان گەر بەیانیش دووبارە ڕیفراندۆم ئەنجامبدرێتەوە پێویستە دیسان دەنگ بە بەڵێ‌ بدرێتەوە،چونكە ئەمە مافێكی هەرە سادە و دیمۆكراسی هەر گەلێكە.... من بە پشت بەستن بە چەند خالێك كە سەرەنجتان بۆ ڕادەكێشم، ئەنجامدانی ڕیفراندۆمی(( 25ـ 9))ی باشوور كوردستانی بە باش زانیمە و دەزانم:
1ـ ڕیفراندۆم پرۆسەیێكی دیموكراسی و شەرعی و یاسایی و ئاساییە، بۆیە هەر لایەنێك ئەنجامدانی بە باش نەزانێ‌، دەكرێ‌ بڵێن خۆی باش نییە و دژی هەموو سیفەتەكانییەتی.
2ـ بۆ زانیاریتان هیچ بەدیلێكی ڕاستگۆیانە كە لە ڕیفراندۆم باشتربێت نە لە نێوخۆ و نە لە دەرەكی باس نەكراوە، ئەم بەدیلانەی كە باس كراون زیاتر بۆ سۆڕانەوەی كورد بووە لە چوارچێوەی بازنەیێكی بەتاڵەوە.
3ـ ڕیفراندۆم ئیسپاتی كرد، كە ئەو ناوچە كوردستانیانەی ئێستا لە دەرەوەی ئیدارەی هەرێمن ، هەر ناوچەی كوردستانین، گەر بە هەر هێزێكیش لە ژێر دەستمان دەربینن ئەوە بەداگیركراوی دەمێنێنەوە، چونكە زۆرینەی خەلكی ئەو ناوچانە دەنگیان خستووتە پاڵا دەنگی خەلكی ناو ئیدارەی هەرێمی كوردستان.
4ـ ریفراندۆم بۆتە بەڵگەیەكی حاشاهەڵنەگر، كە ئەمڕۆ بێ‌ یان سبەی دەبێ‌ هەر گەلی مەزڵۆمی كوردستان بە مافە ڕەوایەكانی خۆیان شاد ببن كە ئەویش خۆی لە سەربەخۆیی و دەوڵەتبوون دەبینێتەوە.
5ـ ئەگەر ڕیفراندۆمیشمان ئەنجام نەدابا ئەوە حكوومەتی عێراق بە بەهانەیەكی تر و بە شێوازێكی تر هەر ڕووبەڕووی ئێمە دەبوویەوە،جا ئەم كات ڕێگەی ئەنجامدانی ڕیفراندۆمیشمان دادەخراو و لە دەستمان دەچوو،تەنانەت وای لێدەهات خوزگەمان بۆی دەخواست.