Share on facebook
سەرۆكی حزبی چاكسازی و گەشە: پاش ئەو بەرگرییەی كە لە پردێ و ناوچەی بادینان كرا هەڵوێستی كورد زۆر بەهێز بووە
دووشەممە, 13 تشرینی دووەم 2017 12:51

ZKW : محەمەد بازیانی، سەرۆكی حزبی چاكسازی و گەشە لە كوردستان لە چاوپێكەوتنێكی تایبەتدا لەگەڵ هەفتەنامەی زاری كرمانجی دیاركرد، دەبێت كورد ناو ماڵی خۆی ڕێكبخاتەوە و یەكڕیزی دروست بكات، ئێستا هەڵوێستی كورد لاواز نیە پاش ئەو بەرگرییەی كە لە پردێ و ناوچەی بادینان كرا، هەڵوێستی كۆمەڵگەی نێودەوڵەتیش گۆڕانكاری بەسەردا هاتووە، بۆیە نابێت كورد بە لاوازی تەماشای خۆی بكات، هەتا لە دانوستاندنەكانیش لەگەڵ بەغدا، بەڵكو دەبێت بەهێزەوە بچینە دانوستاندن و گفتوگۆ. گوتیشی" بڕیاری ئەنجامدانی ریفراندۆم بڕیارێكی زۆر ڕاست و دروست بوو، ئەگەر ریفراندۆمیش ئەنجام نەدرابایە، ئەوان هەر ئەو كارەیان دەكرد، لە مێژوودا دەنوسرێتەوە كە كورد داوای سەربەخۆیی خۆی كرد و نزیكەی 3 ملیۆن كەس دەنگیاندا و 93% خەڵكی كوردستان گوتیان دەمانەوێت سەربەخۆ بین، بەڵام حكوومەتێكی تائیفی لە بەغدا هەوڵیدا ئیرادەی میللەتێك بشكێنێت، كە ئیرادەی گەلی كورد بە كەس ناشكێت، زوڵمێكی گەورەیە كە كورد دەوڵەتی خۆی نەبێت، بەڵام نەیارانی كورد پێیان خۆشی بێت یان نەخۆش بێت كورد یاریزانی سەرەكی دەبێت و سوودمەندی یەكەم دەبێت لەو گۆڕانكاریانەی كە دەكرێن و دەبێتە دەوڵەت.
محەمەد بازیانی، رایگەیاند" گرنگترین كار لەو كاتەدا ئەگەر كورد بیكات، ئەوەیە كە ناو ماڵی خۆی ڕێكبخاتەوە، بە جددی هەوڵی ئەوە بدات یەكڕیزی دروست بكات، ئەگەر چی ئەمە كارێكی زۆر ئاسان نییە، بەڵام مەحاڵیش نیە، دەتوانین یەكڕیزی دروست بكەین بە مەرجێك لێبوردەییمان هەبێت لە ئاستی یەكدا، هەروەها حكوومەتی هەرێم دەبێت تەئكید لەوە بكاتەوە كە ئێمە دەمانەوێت بە گفتوگۆ و دانوستاندن چارەسەری كێشەكانمان بكەین، چونكە ئەو وەرەقەیە، وەرەقەیەكی بەهێزە بە دەست ئێمەوە، چونكە ئەوان پێشێلی دەستووریان كردووە، پێشێلی ئەوەیان كردووە كە نابێت بە هیچ شێوەیەك لەشكری عێراقی، هیچ هێزێكی عێراقی هێرش بكاتە سەر كورد، بەڵام ئەوان ئەو كارەیان كردووە، جگە لەوەی دەبێت حكوومەتی هەرێم ئەوانەی گەندەڵی دەكەن نەهێڵێت، هەوڵی پاكسازی و چاكسازی بدات، هەروەها دەبێت هەوڵی ئەوە بدات، هەوڵیشی داوە ئەگەر قەرزیشی كردووە مووچەی فەرمانبەران بدات، چونكە باروگوزەرانی خەڵك باش نیە و لە ژیانێكی سەختدان.
سەرۆكی حزبی چاكسازی و گەشە لە كوردستان گوتی" ئەوەی دانوستاندن لەگەڵ بەغدا دەكات دەبێت حكوومەتی هەرێم بێت، نەك هەر حزبێك بۆ خۆی دانوستاندن بكات، ئەگەر حزب بكات، ئەو گفتوگۆیە هەر لە ئێستاوە فەشەل دێنێت، بۆیە دەبێت حكوومەت بێت و بزانن چیان پێیە و لەسەر چی گفتوگۆ دەكەن و سیڤی هەموو ئەوانەی پێ بێت كە قسەیان لەگەڵ دەكەن، بۆ ئەوەی بزانن چۆن لەگەڵ ئەوان قسە دەكەن و چی بە دەست دەهێنن لەو دانوستاندنەی كە دەكەن.
محەمەد بازیانی، سەرۆكی حزبی چاكسازی و گەشە گوتیشی" لەسەر مووچە و كەمكردنەوەی بوودجەی هەرێم و ناوهێنانی هەرێم وەكو پارێزگا، ئەوە ئێستا حكوومەتی عێراق پەشیمان بووەتەوە لەوەی كە ناوی حكوومەتی هەرێم، وەكو هەرێم نەهێناوە، وتەبێژی حكوومەت باسی لەوە كرد، ئەگەر ئەوە كرابێت دەكرێت ڕاست بكرێتەوە، دەبێت كورد داكۆكی لەسەر ئەوە بكات، چونكە ئەوە نادەستوورییە، هەروەها دەبێت لەسەر ئەوە مكوڕ بێت كە 17%ی بودجە بە كوردستان بدرێت.
محەمەد بازیانی، زیاتر گوتی" دەبێت داوای دانوستاندن بكەین، بەڵام لەگەڵ ئەوەش دانوستاندن و گفتوگۆ زۆر لە بەرژەوەندی ئێمەدا نیە، وەرەقەیەكە داومانە بە گوێیان، ئەوەش شتێكی باشە، بەڵام ئەگەر زۆر داوای دانوستاندن بكەین، ئەوان وەكو میوان پێشوازی لە ئێمە دەكەن، دەبێت وەكو حكوومەتی هەرێمی كوردستان پێشوازی لە ئێمە بكەن، نەك وەكو میوان، دەبێت ئەجندایەكیش هەبێت كە قسەی لەسەر بكەین، نەك وەكو میوانداری بێت و شتێكی فەرمی نەبێت، بۆیە دەبێت ئەجندای ئێمە ئاشكرا بێت كە لەسەر چی دادەنیشین و گفتوگۆ دەكەین، چونكە ئەوان باس لە هەڵوەشاندنەوەی ریفراندۆم دەكەن، ئایا كوردیش بەوە ڕازی دەبێت، كە ئەوە دەنگی خەڵكی كوردستانە كە داوای كردووە دەمەوێت سەربەخۆ بم، ئێمە دەتوانین هەڵبوەشێنینەوە، ئەوە لە دەسەڵاتی حكوومەتی هەرێمی كوردستاندا نیە، پێشتر لە دەسەڵاتی سەرۆكی هەرێمی كوردستانیشدا نەبوو، ئەگەر بە ریفراندۆمێكی دیكە ئەو كارە بكرێت، بۆیە نابێت ئێمە لەسەر ئەوە سازش بكەین، سڕكردنی ریفراندۆم شتێكی ئاساییە، چونكە نەخۆشێك كاتێك كە نەشتەرگەری بۆ دەكرێت سڕ دەكرێت، پاشان نەشتەرگەری بۆ دەكرێت و بە تەندروستییەكی باش دەردەچێت، ئێستا كە ریفراندۆم سڕكراوە، لە داهاتوو بە باشی لێ دەردەچین، ئەگەر ڕەوشی ناوخۆمان چاك بێت و  وەزعی نێودەوڵەتیش لەبار بێت.
سەرۆكی حزبی چاكسازی و گەشە ئاشكرای كرد" كۆمەڵگەی نێودەوڵەتی عادەتەن دیفاكتۆ لەگەڵ هێزی وڵاتان دەكات، لە هەموو دنیا هەر وا بووە، ئەمریكا زۆر بڕیاری نێودەوڵەتی پێشێل دەكات و كەس ناتوانێت پێی بڵێ بۆ وا دەكەی، لەبەر ئەوە دەبێت ئێمە وەكو دیفاكتۆ مامەڵە بكەین، ئێستا هەڵوێستی كورد لاواز نیە پاش ئەو بەرگرییەی كە لە پردێ و ناوچەی بادینان كردی، هەڵوێستی كۆمەڵگەی نێودەوڵەتیش گۆڕانكاری بەسەر هاتووە، بۆیە نابێت كورد بە لاوازی تەماشای خۆی بكات، هەتا لە دانوستاندنیش لەگەڵ بەغدا كە ئەگەرێكی زۆرە نەخشەی سیاسی ناوچەكە گۆڕانكاری بەسەردا بێت، ئێستا وڵاتانی ناوچەكە دژایەتی ئێران دەكەن، ئەگەر ئێرانیش بێهێز بێت، نەیارانی كوردیش بێهێز دەبن، چونكە نەیارانی كورد پشت بە ئێران دەبەستن، چونكە فراوانبوونی ئێران زیان لە ستراتیژی ئەمریكا و كۆمەڵێك وڵاتی دیكە دەدات، بۆیە نابێت لە دانوستاندنەكان هەڵوێستێكی لاواز بنوێنین، بەڵكو دەبێت بەهێزەوە بچینە دانوستاندن و گفتوگۆ.
سەبارەت بەوەی ئەنجامدانی ریفراندۆم بڕیارێكی هەڵەبوو، یان ڕاست بوو، محەمەد بازیانی، دیاركرد" بڕیاری ئەنجامدانی ریفراندۆم بڕیارێكی زۆر ڕاست و دروست بوو، ئەگەر ریفراندۆمیش ئەنجام نەدرابایە، ئەوان هەر لە بەهانە دەگەڕان، بەتایبەتی دواخستنی ڕزگاركردنی شاری حەوێجە، چونكە كوكردنەوەی هێز بۆ حەوێجە نەبوو، بەڵكو بۆ سەر كوردستان بوو، بۆیە ئەوەی من تێدەگەم بڕیاری ئەنجامدانی ریفراندۆم بڕیارێكی زۆر ڕاست بوو، لە مێژوودا دەنوسرێتەوە كە كورد داوای سەربەخۆیی خۆی كرد و نزیكەی 3 ملیۆن كەس دەنگی دا و 93% خەڵكی كوردستان گوتیان دەمانەوێت سەربەخۆ بین، بەڵام حكوومەتێكی تائیفی لە بەغدا هەوڵیدا ئیرادەی میللەتێك بشكێنێت، كە ئیرادەی گەلی كورد بە كەس ناشكێت، بۆیە وەكو وەسیقەیەكی مێژووی دەمێنێتەوە، نەك هێرش برایە سەر كورد هیچ قەزیەكی نەبوو، بەرگری لە خۆی كرد، ئێستا ئێمە قەزییەكمان هەیە كە بەرگری لێ بكەین، ئەویش قەزیەی ریفراندۆم و سەربەخۆیی كوردستانە، كە مافێكە هەم خوا داویەتی بە ئێمە، هەم یاسا نێودەوڵەتییەكان.
محەمەد بازیانی، سەرۆكی حزبی چاكسازی و گەشە لە كوردستان ڕوونیكردەوە" زوڵمێكی زۆر گەورەیە كە كورد دەوڵەتی خۆی نەبێت، بەڵام نەیارانی كورد پێیان خۆش بێت و پێیان نەخۆش بێت كورد دەبێتە دەوڵەت، چونكە لە هەر چوار پارچەی كوردستان كورد ژمارەیەكی زۆر گەورەیە و حساب بۆ كراوە، كورد قورسایی لەناوچەكە هەیە، بۆیە كورد یاریزانی سەرەكی دەبێت و سوودمەندی یەكەم دەبێت لەو گۆڕانكاریانەی كە دەكرێن.
سەبارەت بە تەعریبكردن و ئەو كاوڵكاریەی كە حەشدی شەعبی لە كەركووك و ناوچەكانی دیكە ئەنجامی داوە، سەرۆكی حزبی چاكسازی و گەشە رایگەیاند" ئەوە شتێكی كاتییە، چۆن هاتوونە، هەر بەو شێوەیە دەگەڕێنەوە، چۆن سەرای سەلام سەر بە موقتەدا سەدر گەڕانەوە، كە گەورەترین هێزە لەناو حەشدی شەعبی، ئەوانی دیكەش دەگەڕێنەوە، حكوومەتی عێراق یەك چارەسەری لەبەردەمە، كە ئیدارەدانی ئەو ناوچانەی بۆی هاتووە بە هاوبەشی ئیدارە بكرێن، كە ئەو مافە لەسەردەمی سەدام حوسێن لە ساڵی 1975 بە ئێمە دراوە، كە ئەمریكا بەخۆی دەڵێ، نەمان هێشت كوردەكان گفتوگۆ لەگەڵ بەغدا بكەن، نە ئەو بەڵێنانەی پێمانیشدان جێبەجێمان كردن، ئەمجارەش نابێت زۆر بڕوا بە ئەمریكا بهێنین، چونكە ئەمریكا دوو فاقییە، وڵاتێكە هەردەم لە پشتەوە خەنجەرت لێ دەدات، هەتا لە نەیارەكانی خۆی دەدات، بۆیە لەوانەیە سیاسەتی نێودەوڵەتی پێویست بكات كورد بگەڕێتەوە ئەو ناوچانە، چونكە حكوومەتی عێراق ناتوانێت ئیدارەی كەركووك و ناوچەكانی دیكە بە تەنیا بكات، هەتا لە ڕووی ئەمنییەوە، ئێستا ڕۆژانە خەڵكیان لێ دەكوژرێن، چونكە سنوورەكان كراوەن، واڵا بوونە بۆ داعش، بۆ هەندێك گروپی توندڕەو، لەگەڵ هەندێك گروپی دیكە كە كەس نازانێت ئەوانە كێن و لە كوێ هاتوونە، بۆیە دەبێت یان ئەوانە ناوچەكە بەجێ بهێڵن، یان پەنا ببەنە بەر كورد كە ئاسایشی ئەو ناوچانە بپارێزێت، بۆیە بە سەد ڕجا و تكا داوا لە كورد دەكرێت كە بگەڕێتەوە و ئەمن و ئاسائیشی ناوچەكە بپارێزێت.
لە كۆتاییدا، محەمەد بازیانی، سەرۆكی حزبی چاكسازی و گەشە گوتی" عێراق ئێستا خۆی ئەزمەیەكی ئابووری زۆر گەورەی هەیە، ئەگەر ئەو پارەی كە بە شێوەیەكی یەدەك لەبەر دەستدایە نەبێت، كە نزیكەی 90 ملیار دۆلار هەبوو، ئێستا تەنیا 37 ملیار دۆلاری لەبەر دەست ماوە، ئەگەر ئەو پارەی نەبووایە، ئەو پارەی لە داهاتی نەوت بە دەست دەكەوێت بەس بەشی قەرزەكان و كۆمپانیاكان دەكات، بۆیە من زۆر بڕوام بەوە نیە عەبادی بتوانێت مووچەی فەرمانبەرانی كوردستان بدات، وەكو وەرەقەیەك یاری پێ دەكات، ڕەنگە ئەگەر زۆری بۆ بێت بەشێك ڕەوانە بكات، بەڵام هەمووی هەر نادات، لەگەڵ ئەوەی دەبێت زۆر پشت بە نەوت نە بەستین، ئەوە نەوت نەما چی دەكەین، دەبێت پەڕە بە كەرتی كشتوكاڵی و گەشتیاری بدەین، دەبێت ئاشتەوایەكی كۆمەڵایەتی تەواو دروست بكەین، دەبێت هەوڵی ئەوە بدەین مووچە لە كاتی خۆیدا دابەش بكرێت، لە هەمان كاتدا دەبێت ئێمە پشتگیری لە هێزی پێشمەرگە بكەین، خەندەقەكانیان بەردەوام خواردنی باشیان تێدا بێت، دەبێت هیچ كاتێك كە پێشمەرگە لە سەنگەرە بیری لای ماڵ و منداڵی نەبێت، بیری لای ئەوە بێت چۆن چۆك بە دوژمن دێنێت و بەرگری لە خاكی كوردستان دەكات".