Share on facebook
تا كەركووك بە داگیركراوی بمێنێتەوە پارتی بۆی ناگەڕێتەوە
یەک شەممە, 19 تشرینی دووەم 2017 20:55


ZKW : عەدنان كەركووكی، گوتەبێژی ئەنجوومەنی سەركردایەتیی كەركووك-گەرمیانی پارتی دیموكراتی كوردستان لە چاوپێكەوتنێكی تایبەتدا لەگەڵ هەفتەنامەی زاری كرمانجی دیاركرد" لەسایەی ئەو داگیركاریەی كە لە لایەن حەشدی شەعبی و سوپای پاسدارانی ئێرانەوە كراوە، دۆخی كەركووك ئێستا زۆر خراپە و ترس و تۆقاندن بەردەوامە، میلیشیاكانی حەشدی شەعبی لە كەركووك قەناس بەدەستیان لەسەر باڵەخانەكان داناوە، سیاسەتی تەعریبكردن لە ناوچە داگیركراوەكان پەیڕەو دەكرێت، كەركووك لە ژێر هەڕەشەی دووبارە تەعریب كردنەوەدایە، كە ئامانج لێی لەباربردنی ئەزموون و خەباتی كورد و پێشمەرگەیە كە لە پێناو كوردستانیبوونی ئەو شارە بە  هەزاران قوربانیان داوە. ڕوونیشیكردەوە"رۆژانە 260 هەزار بەرمیل نەوت بە تانكەر لە سنووری باشماخەوە ئاودیوی ئێران دەكرێت، كە ئەو سنوورە هەر لەبەر ئەوە كراوەتەوە، دیارە گروپی خیانەتكاری 16ی ئۆكتۆبەریش بەشی خۆیان لەو بڕە هەیە.
كەركووكی، رایگەیاند" دۆخی كەركووك ئێستا زۆر خراپە، لەسایەی ئەو داگیركاریەی كە لە لایەن حەشدی شەعبی و سوپای پاسدارانی ئێرانەوە كرا، ترس و تۆقاندن بەردەوامە، لە رووی ئەمنییەوە، لە هەموو گەڕەكە كوردییەكان مەفرەزەكانی حەشدی شەعبی دابەش بوونە و ماڵ بە ماڵ دەگەڕێن و ماڵی هاووڵاتیان تاڵان دەكەن و لەسەر بینا بەرزەكانیش قەناس بە دەستیان داناوە، بۆ ئەوەی هەر جوولەیەك لەلایەن كوردەوە هەبێت لێیان بدەن، ئەوەش بۆ ترس و تۆقاندنی خەڵكە، ئەوەش وای كردووە كە خەڵك هەست بە نائارامی بكات، بەتایبەتی شەوان خەڵك دەگرن و هێرشیان دەكرێتە سەر.
گوتەبێژی ئەنجوومەنی سەركردایەتیی كەركووك-گەرمیانی پارتی دیموكراتی كوردستان ئەوەشی گوت" حەشدی شەعبی لەگەڵ خەڵك كۆبوویەوە و بە خەڵكیان گوتووە، بۆچی ئێوە تەقە لە ئێمە دەكەن، لە كاتێكدا ئێمە خزمەتی ئێوە دەكەین، بەڵام دیار بوو خەڵكەكە بە ئەوانیان گوتووە ئێوە بۆ خزمەتی ئێمە نەهاتوون، بەڵكو ئێوە هاتوونە هەموو رۆژێك ئازارمان بدەن و هێرشمان بكەنە سەر، ئەگەر ئەوە خزمەتكردن بێت، ئەو جۆرە خزمەتەمان ناوێت و نابێت لێر بمێنەوە، لەلایەكی دیكەوە زۆربەی زۆری قوتابیانی كورد لە زانكۆ و پەیمانگاكانی كەركووك لە ترسی حەشدی شەعبی ناوێرن بگەڕێنەوە و تا ئێستا دەوامیان نەكردووە.
عەدنان كەركووكی، گوتەبێژی ئەنجوومەنی سەركردایەتیی كەركووك-گەرمیانی پارتی دیموكراتی كوردستان زیاتر گوتی" وەزیری نەوتی عێراق سەردانی كەركووكی كرد و لەو سەردانەدا گوتویەتی، ئێمە زەوی دابەشی سەر فەرمانبەرانی كۆمپانیای نەوتی باكوور دەكەین، بەڵام زۆربەی هەرە زۆری فەرمانبەرانی كۆمپانیای نەوتی باكووریش عەرەبی هاوردەن و ڕەنگە خەڵكی عەرەبی تریش بگوازنەوە بۆ كەركووك، ئەمەش دەبێتە تەعریبێكی نوێ لە شارەكە، وەكو سەردەمی رژێمی پێشوو كە چی بەسەر خەڵكی كەركووك هێناوە، دووبارە دەكەنەوە.
عەدنان كەركووكی، ئاشكراشی كرد" نەوتی كەركووك رۆژانە بە سنووری باشماخ  ئاودیوی ئێران دەكرێت، كە ئەو سنوورە هەر لەبەر ئەوە كراوەتەوە، دیارە گروپی 16ی ئۆكتۆبەریش بەشی خۆیان هەیە لەو نەوتە، بۆ ئەوەی لە مەرزی باشماخەوە ئاودیوی ئێران بكەن، ئەوەی عێراق ئاشكرای كردووە رۆژانە 30 هەزار بەرمیل نەوت ڕەوانەی ئێران دەكرێت و بەرز دەكەنەوە بۆ 60 هەزار بەرمیل، بەڵام ئەوەی كە لای من هەیە رۆژانە 260 هەزار بەرمیل نەوت بە تانكەر ڕەوانەی ئێران دەكرێت، تانكەرەكانیش زۆربەیان هی وڵاتی ئێرانن، شەو و ڕۆژ نەوت لە كەیوانەوە دەگوازنەوە، كە لە كەیوان 16 شەمعە هەیە،  بۆ پڕكردنی ئەو تانكەرانە لە نەوت، كە هەر شەمعەیەك لە ماوەی 20 خولەك تانكەرێكی 36 هەزار لیتری پڕ دەكات لە نەوت، لە هەر 20 خولەكێكدا 16 تانكەری 36 هەزار لیتری لە نەوت پڕ دەكرێت، ئەگەر لە ماوەی 24 كاتژمێردا ئەوانە ئەو كار بكەن، زیاتر لە 260 هەزار بەرمیل نەوت رۆژ و شەو لە كەركووكەوە ڕەوانەی ئێران دەكرێت، بەڵام چۆن و بە چ شێوەیەك دەفرۆشرێت ئەوە دیار نیە، بەڵام ئەوەی كە لێ دڵنیاین، ئەوە بە هیچ شێوەیەك لە چوارچێوەی پارەی پتڕۆدۆلار نادرێت بە ئیدارەی كەركووك، ئەوەش ئێران و ئەو دەسەڵاتەی كە لە كەركووكە لە پشتەوەیەتی، چونكە وەكو گوتم، كردنەوەی مەرزی باشماخ بەس بۆ ئەوەیە نەوت رەوانەی ئێران بكەن، كە پێشووش هەر بەو شێوەیە ڕەوانە دەكرا، حكوومەتی عێراقیش ئاگادارە، چونكە بە نیازە بۆڕیەكی نەوت لە كەركووكەوە بۆ كرماشان ڕابكێشن و ڕۆژانە 650 هەزار بەرمیل نەوت لەو ڕێگەیەوە ڕەوانەی ئێران بكەن.
گوتەبێژی ئەنجوومەنی سەركردایەتیی كەركووك-گەرمیانی پارتی دیموكراتی كوردستان دەڵێ" كەركووك بە داگیركراوی دەزانین، هەر لەبەر ئەوەش بڕیارمان داوە تا كەركووك داگیركراو بێت، نەگەڕێینەوە، ئەمڕۆ حاكمی سەربازی لەوێ حوكم دەكات، دوای 16ی مانگی رابردوو بە هیچ جۆرێك ڕێگە نەدراوە و هەتا ئێستا چالاكی سیاسی، مەدەنی لە كەركووك ئەنجام بدرێت، دەبێت تۆ بچیە ژێر مەرجەكانی ئەوانەوە، ئەمانە كۆمەڵێك ئیجرائاتی توندی تەعەسوفی دیكتاتۆرییە، كە لە كەشێكی لەو شێوەیە چۆن دەتوانی كاروچالاكی سیاسی خۆت ئەنجام بدەی، بۆیە دەبێت كەشێكی سروشتی بێت، ئەو كاتە بە پێی یاسای حزبەكان، كە هەموو حزبەكان بۆیان هەیە كاروچالاكی خۆیان ئەنجام بدەن، ئێستا ئەوە نیە و حاكمێكی سەربازی هەیە و بە كەیفی خۆی بڕیار دەردەكات و ڕێگەت لێ دەگرێت و  دەرفەتی ئەوە نادات كاری خۆت بكەین، هەر شوێنێكیش كە داگیر كراوبێت دەرفەتی چالاكی سیاسی نامێنێت.
لە كۆتاییدا عەدنان كەركووكی، گوتەبێژی ئەنجوومەنی سەركردایەتیی كەركووك-گەرمیانی پارتی دیموكراتی كوردستان گوتی" بڕیار دراوە هاووڵاتیانی عێراقی ئازادن ئەگەر ماڵەكانیان بگوازنەوە بۆ كەركووك، هەویەی خۆیان بگوازنەوە بۆ سەر كەركووك، ئێستا ئەو بڕیارە چووەتە واری جێبەجێ كردنەوە، دوای ئەوەی وەزارەتی ناوخۆی عێراق نووسراوی بۆ هەموو پارێزگاكان كردووە كە ئاسانكاری بۆ ئەو هاووڵاتیانە بكرێت كە دەچنە كەركووك، بەوەش سیاسەتی بەعس و تەعریبكردن لە ناوچە داگیركراوەكان پەیڕەو دەكرێت، زیاتر تەركیزیان خستۆتە سەر پارێزگاكانی باشوور و هانی خەڵك دەدەن كە روو لەو شارەكە بكەن، هەروەها دەستیان بە كڕینی خانووی كوردەكان كردووە، دواتر تاپۆ دەكەن، بۆیە كەركووك لە ژێر هەڕەشەی دووبارە تەعریب كردنەوەدایە، كە ئامانج لێی لەباربردنی ئەزموون و خەباتی كورد و پێشمەرگەیە كە لە پێناو كوردستانیبوونی ئەو شارە بە  هەزاران قوربانیان داوە".