Share on facebook
جێگری سەرۆكی فراكسیۆنی پارتی لە پەرلەمانی كوردستان : دروستكردنی حكومەتی ڕزگاری نیشتمانی تەنیا بۆ كات كوشتنە
یەک شەممە, 26 تشرینی دووەم 2017 21:56

ZKW : چاوپێكەوتن- ڕائیب شێروانی: ئامینە زكری، جێگری سەرۆكی فراكسیۆنی پارتی لە پەرلەمانی كوردستان لە چاوپێكەوتنێكی تایبەتدا لەگەڵ هەفتەنامەی زاری كرمانجی دەڵێ" تا ئێستا ئێمە لە مەبەستی هەندێك لایەنی سیاسی لە دروستكردنی حكومەتی كاتی، یان ڕزگاری نیشتمانی تێنەگەیشتووین، ئێستا حكومەت لەگەڵ لایەنە سیاسییەكان لە گفتوگۆدایە، مەبەستی ئەوان لەو حكومەتە ئەوەیە كە وەكو كارتێكی هەڵبژاردن بەكار بهێنن، بۆ ئەوەی بەشدار نەبن و نەهێنە پێشەوە و بیكەنە بیانوو، لەگەڵ ئەوەی ئەو حكومەتە كاتییە، كاتێكی دەست نیشانكراو هەیە و ئێستا دیراسەتی ئەوە دەكرێت رۆژی هەڵبژاردن دیاری بكرێت، واتە حكومەتی هەرێم، بەخۆی حكومەتێكی كاتییە".
ڕوونیشیكردەوە" عەقلییەتی عێراق، هەمان عەقلیەتە، بەڵام شێوازی مامەڵە كردنیان لەگەڵ كورد جیاوازە، ئەگەرنا هەمان عەقلیەتی سەدام حوسێن بەرامبەر بە كورد پەیڕەو دەكرێت.
ئامینە زكری، دیاریكرد" تا ئێستا ئێمە لە مەبەستی ئەوان لە حكومەتی كاتی، یان ڕزگاری نیشتمانی تێنەگەیشتووین، ئەو حكومەتە لەو كاتەدا پێك دێت كە هەموو لایەنە سیاسییەكان بەشدار نەبن لە حكومەت، بۆ ئەوەی هەموو لایەنەكان بەشدار بن، قۆناغێكی گواستنەوە پێكدەهێندرێت، حكومەتی هەرێمی كوردستان، كابینەی هەشتەم لە هەموو لایەنەكان و پێكهاتەكان پێكهاتووە و دروست بووە، واتە كەس خۆ لە دەرەوەی ئەو حكومەتەدا نابینێتەوە، هەر لەبەر ئەوە بە بینینی من تەنیا ئەوە بۆ كات كوشتنە، هەر چەندە من نامەوێت پێش رووداوەكان بكەوم، بەڵام ئێستا حكومەت لەگەڵ لایەنە سیاسییەكان لە گفتوگۆدایە، بۆیە بە بینینی من تەنیا مەبەستی ئەوان لەو حكومەتە ئەوەیە كە وەكو كارتێكی هەلبژاردن بەكار بهێنن، بۆ ئەوەی بەشدار نەبن و نەهێنە پێشەوە و بیكەنە بیانو، ئەگەرنا حكومەتی ئێستا هەم پاڵپشتی خەڵكی كوردستان، پەرلەمانی كوردستان، هێز و لایەنە سیاسییەكان، نەتەوە یەكگرتووەكان و ئەمریكا و وڵاتانی ئەوروپا و هەموو لایەنەكانی بە دەست هێناوە و پشتگیری دەكەن، ئەگەر ئامانج ئەوەیە حكومەتێك پێك بهێنن كوردستان لەو قەیرانانە ڕزگار بكات، ئەوا حكومەت هەیە و پێویست بە هیچ حكومەتێكی دیكە ناكات، سەرۆكی حكومەت بە رۆحێكی وەرزشی لەگەڵ ئەوان مامەڵە دەكات بۆ ئەوەی چاكسازی بكرێت، حكومەت بۆ ماوەیەكی زۆرە دەستی بە چاكسازی كردووە، ئەگەر مەبەستی ئەوان ئەوەیە وەزیرەكان بگۆڕدرێن و وەزارەتەكان نوێ بكەنەوە و هەندێك دەموچاو بگۆڕدرێن، ئەوە شتێكی زۆر نۆرمالە و با پێشنیارەكانی خۆیان بدەنە حكومەت، ئەگەرنا لە رووی ئابوورییەوە، ئەو حكومەتەی ئەوان داوای دەكەن بە كولفەیەكی زۆر گەورە لەسەر هەرێمی كوردستان دەكەوێت، ئێستا هەموومان دەزانین هەرێمی كوردستان لە قەیرانی داراییدایە، هەم كاتێكی دوور و درێژ دەبات تا ئەو حكومەتە پێك دەهێنرێت، لەگەڵ ئەوەی ئەم حكومەتە بەخۆی كاتییە، كاتێكی دەست نیشانكراو هەیە و ئێستا دیراسەتی ئەوە دەكرێت كە رۆژی هەڵبژاردن دیاری بكرێت، واتە حكومەتی هەرێم، حكومەتێكی كاتییە".
جێگری سەرۆكی فراكسیۆنی پارتی لە پەرلەمانی كوردستان ئاماژەی بۆ ئەوە كرد" هەموو كاتێك هەندێك لایەنی سیاسیی رەخنەیان لەوە دەگرت كە لایەنە سیاسییەكان كێشە بۆ پرۆسەی سیاسی دروست دەكەن، بەتایبەتی كۆمەڵی ئیسلامی و بزووتنەوەی گۆڕان، شێوازی دانوستاندن و گفتوگۆییەكان گۆڕانكاری بەسەردا هاتووە، لە جیاتی ئەوەی لایەنە سیاسییەكان سەردانی یەكدی بكەن و كاتێكی زۆر بكوژن، كە بینیمان لە دوو ساڵی رابردوودا پارتی چەندین جار هەوڵی دا و سەردانی لایەنە سیاسییەكانی كرد و پێداگری لەسەر ئەوە دەكرد كە پەرلەمان كارا بكرێتەوە، سازانێكی نیشتمانی دروست بێت، بەڵام لایەنەكانی دیكە كاتیان دەكوشت و لە هەمان كاتیشدا موزایەدەی سیاسی زۆریان ئەنجام دەدا، بەڵام ئێستا گۆڕانكاری لەو سەردانانەدا كراوە و حكومەتی هەرێم بەخۆی سەردانی لایەنە سیاسییەكان دەكات و دانوستاندن و گفتوگۆ لەگەڵ لایەنەكان دەكات، كات زۆر كەمە، ئێمە ناتوانین یاری بە كات بكەین، هەر لەبەر ئەوە پێویستە بڕیارێكی بە پەلە بدرێت، لایەنە سیاسییەكان ئەگەر بەرنامەی خۆیان هەیە بۆ پشتگیری كردن لە حكومەتی ئێستا بەردەوامی دان بەو حكومەتە، پێویستە بە پەلە بەرنامەی خۆیان پێشكەش بكەن، گەشبینیم حكومەتی هەرێمی كوردستان دەتوانێت ئەو پرۆسەیە یەكلا بكاتەوە و كێشەكان چارە بكات".
سەبارەت بەوەی ئێوە وەكو پەرلەمان دەتانەوێت لەم قۆناغەدا چی بكەن، ئامینە زكری، رایگەیاند" ئەو كارانەی كە ئەولیەتی پەرلەمانە، ئەو یاسانەن كە گرێدراون بە هاووڵاتیانی كوردستانەوە، وەكو یاسای خانووبەرە، پەسەندكردنی كاتی لیژنەی دەستووری، ئەگەر ئێمە وەكو كوردستان دەستووری خۆمان هەبووایە، زۆر لە كێشەكانی یاسایی چارەسەر دەبوون و هەر لایەنێكی سیاسی بە كەیفی خۆی نەیدەتوانی كار بكات، دەستوور چارەسەری ئەو كێشانەی دەكرد، هەر لەبەر ئەوە یەك لە پێداگرییەكانی ئێمە لەسەر ئەوە دەبێت، هەروەها یاسای تیرۆر و یاسای لیبوردنی گشتی لەبەر دەستی پەرلەمانە، هەروەها ئێمە وەكو فراكسیۆنی پارتی، بەتایبەتی پێشنیاری ئێمە ئەوەیە كە ئەو یاسانەی بە پێی ماددەی 114ی دەستووری عێراق، ئەو یاسانەی هاوبەشن لە نێوان هەرێمی كوردستان و عێراق، دەبێت هەرێمی كوردستان ئەو فەراغە یاسانە پڕ بكاتەوە، بۆ نموونە وەكو یاسای دەروازە سنوورییەكان.
لەسەر كاراكردنەوەی لیژنەكانی پەرلەمان، جێگری سەرۆكی فراكسیۆنی پارتی لە پەرلەمانی كوردستان، ئاشكرای كرد" لیژنەكانی پەرلەمان بڕبڕەی پشتی پەرلەمانن، ئەو مەتبەخەیە كە ئامادەكاری بۆ ئەنجامدانی كۆبوونەوەكانی پەرلەمان دەكات، هەر لەبەر ئەوە كارابوونەوەی ئەو لیژنانە كارێكی پێویستە، لە ماوەی رابردوو هەندێك لیژنە هەبوون بەردەوام كاری خۆیان ئەنجام دەدا، تا ئێستاش بەردەوامن و لەكار نەكەوتوونە، بەڵام هەندێك لیژنە، بەتایبەتی ئەو لیژنانەی كە سەرۆكایەتی ئەو لیژانە لە دەست هەندێك لایەنی سیاسی بوو، بەتایبەتی گۆڕان و كۆمەڵی ئیسلامی، هیچ كۆبوونەوەیەكیان ئەنجام نەداوە، هەر لەبەر ئەوە ئێستا دەستەی سەرۆكایەتی پەرلەمان هەموو هەوڵەكانی خۆی خستۆتەگەڕ، لیژنەكانی پەرلەمان بكەونەوە كار و كارەكانی خۆیان ئەنجام بدەن، لەسەر ئەو بابەتەش كۆبوونەوە كراوە.
لە كۆتاییدا ئامینە زكری، جێگری سەرۆكی فراكسیۆنی پارتی لە پەرلەمانی كوردستان، گوتی" لە ساڵی 2014 عێراق سزای سیاسی هەرێمی كوردستانی دا، كە لەو كاتە نە هەرێمی كوردستان نەوتی ڕەوانە دەكرد، نە هیچ، بەڵام عێراق بوودجە و مووچەی كوردستانی بڕی و سزای سیاسی كوردستانی دا، پاش ساڵی 2005  هێزی پێشمەرگە كە بەشێكە لە سیستەمی وەزارەتی بەرگری، یەك دیناری بۆ دابین نەكراوە، ئەگەر ئێمە بەشێك بین لە عێراق پێویست  بوو عێراق بە پێی دەستوور هەموو ئەو شتانەی كردبایە، هەروەها ماددەی 140 جێبەجێ نەكرا، لە ساڵی 2012ـەوە تا ئەمڕۆ چ مالیكی، چ حەیدەر عەبادی، بەردەوام هەڕەشە لە كوردستان دەكەن و بە تۆپ و تانك هەرێمی كوردستان بۆردومان دەكەن، واتە عەقلیەتی عێراق، هەمان عەقلیەتە، بەڵام شێوازی مامەڵە كردن جیاوازە، ئەگەرنا هەمان عەقلیەتی سەردەمی سەدام حوسێن لە عێراق بەرامبەر بە كورد پەیڕەو دەكرێت، كە هەر یەك بە شێواز و ڕەنگی خۆی، لە كاتی خۆی ڕژێمی پێشوو بە تانك و تۆپ ئەنفال و كیمیاباران، ئێستا مالیكی و عەبادی، بە جێبەجێ نەكردنی دەستوور و لە ڕێگەی هێز، دەستووری عێراق ڕێگە بەوە نادات كە مووچە و بوودجەی خەڵكی كوردستان ببڕدرێت، یەك لە ئەولیەتەكانی ئێمە ئەوەیە كە بە گفتوگۆ كێشەكان لەگەڵ عێراق چارە بكەین، لەگەڵ ئەوەی ریفراندۆم مافی خەڵكی كوردستان بوو و بە بڕیارێكی دادگا هەڵناوەشێتەوە، تەنیا گەلی كوردستان دەتوانێت بڕیار لەسەر هەلوەشاندنەوە، یان هەڵنەوەشاندنەوەی ریفراندۆم بدات، بۆیە نە حكومەتی هەرێم، نە حكومەتی عێراق ئەو مافەی نیە بڕیار لەسەر ریفراندۆم بدات".