Share on facebook
رۆژی جیهانی خاوەن پێداویستیە تایبەتەكان لە كۆمەڵەی سۆران بەرز راگیرا
یەک شەممە, 03 کانونی یەکەم 2017 17:30

 

سوبحان شكۆ- سۆران: ئەمڕۆ یەك شەممە، بەبۆنەی هاتنی رۆژی جیهانی خاوەن پێداویستە تایبەتەكان، كۆمەڵەی سۆران بۆ چاودێری پەككەوتوان یادی ئەم رۆژەی كردەوە وپێشوازی لە سەرجەم چین و توێژەكانی دەڤەرەكە كرد.

نێچیرڤان گوانی كوری سەرۆكی پێشووی كۆمەڵەی سۆران بۆ چاودێری پەككەوتوان بە زاری كرمانجی ڕاگەیاند:"بە بۆنەی هاتنی رۆژی جیهانی خاوەن پێداویستە تایبەتەكان، لە بارەگای كۆمەڵە پێشوازیمان كرد لە لایەنە سیاسی و بەپرسانی حكومی و رێكخراوەكانی كۆمەڵی مەدەنی بە مەبەستی پیرۆز كردنی ئەم رۆژە لە ئەندامانی كۆمەڵەی سۆران".

گوتیشی:"وێرای بوونی قەیرانی دارایی لە هەرێمی كوردستان، كۆمەڵەی سۆران توانیویەتی بەردەوامی بدات بە چالاكی و خزمەتاكانی ئەمەش بەهۆی دوربینی سەرۆكی پێشووی كۆمەڵە كە توانیویەتی بناغەیەكی سەربەخۆ و خودی بۆ كۆمەڵە دابنێت و ببێت بە خاوەنی داهاتی مانگانەی خۆی، چالاكی و خزمەتەكانی كۆمەڵە خۆی دەبینێتەوە لە سەنتەری ڕاهینانەوەی منداڵانی پەككەوتە و گیرۆدە بە نەخۆشیە درێژ خایەنەكان، سەنتەری چارەسەری سروشتی و هەبوونی بنەكەی تەندروستی بەبێ‌ بەرامبەر بۆ ئەم چینە گرنگەی كۆمەڵگە".

شایەنی باسە، كۆمەڵەی سۆران لە بەرواری 16ی 11ی 1999 لەسەر دەستی خوالیخۆشبوو(عەبدولواحد گوانی) دامەزراوە، ناوبراو بە دریژایی 18 ساڵا خۆبەخشانە سەرۆك و سەرپەرشتیاری كۆمەڵە بوو تا رۆژی كۆچكردنی.