Share on facebook
هۆشداری دەدرێتە لایەنە پەیوەندارەكانی دەڤەری سۆران
سێ شەممە, 05 کانونی یەکەم 2017 18:55

بە هۆی هاتنی وەرزی سەرما و سۆلە هەرێمی كوردستان كەوتوەتە ژێر كارێگەریشەپولێكی بەفر و باران بە هاتنی یەكەم بەفر بارینی ئەم ساڵا لە ناوچە شاخاوییەكان وا چاوروان دەكرێت هاتنە خوارەوەی ئاژەڵ و پەڵەوەرە كێوییەكان لە چیا سەختەكان دەست پێ‌ بكات و  بێنە نێزیك ئاوەدانی و گوند و دێهاتەكان، خوشبختانە هەڵكەوتەی جیوگرافی دەڤەری سۆران بە بارزان و برادۆست و  باڵەكایەتیەوە بە هەبوونی چەندین چیای سەخت و كوێستان و دارستان وایكردووە كە بە رێژەیەكی زۆر باڵندە و ئاژەڵی كێوی لەم ناوچانەدا بژین، ساڵانە چ بە هۆی توپپارانی ولاتانی ئیران و توركیا سوتانی ناوچە شاخاوییەكان  چ بە دەستی ئەنقەست بەردانی ئاگر بە ناوچە سەختەكان رێژەییەكی زۆر بالندە و ئاژەڵە كێوییەكان لە ناو دەچن بە تایبەت خشوكەكان .

لە لایەكی دیكەش ئەوەی جێگای داخە، دوای دروستبوونی شەری داعش و چوونی هێزەكانی پێشمەرگەی پاراستنی ژینگە بۆ بەرەكانی جەنگ و كەمبوونەوەی چاودێری، و نەبوونی بنكەكانی پولیسی دارستان و ژینگە لە باڵەكایەتی و كەمی میلاك و نەبوونی پێدوایستی گونجاو بۆ بەرێوەبەرایەتی پولیسی دارستان و ژینگەی سۆران ، بە تایبەتی لەو دوو ساڵەی دوایدا كەسانێكی بێ‌ ئینتیما دزە دەكەن، هەڵدەستن بە راو كردنی ئاژەڵی كێوی و تێكدانی هاوسەنگی ژینگە، دیاردەیی راوكردنی ئاژەڵە كێوییەكان لە ناوچە شاخاوییەكان دەست پێدەكاتەوە.

بۆیە رێكخراوی وار بۆ پاراستنی ژینگە هوشداری دەداتە "دەستەی ژینگەی هەرێم  و  فەرماندەی پێشمەرگەی پاراستنی ژینگە "و پولیسی دارستان ژینگەی هەرێم و بەرێوەبەرایەتی پولیسی دارستان و ژینگەی هەرێم و رێكخراوە ژینگە پارێزەكان كە هەوڵەكان توندتر بكرێن بۆ رێگری كردن لەو كەسانە كە هەوڵی راو كردن دەدەن بۆ هوشیار كردنەوەی هاووڵاتییان لە راونەكردنی ئاژەڵ و باڵندە كێوییەكان تایبەت ( كەو ) كە گرنگترین سامانی نیشتمانی و هاوسەنگی ژینگەیین، ئەو باڵندە و ئاژەڵانەی كە بە هۆی سەرما و سۆڵەوە پەراگەندە و ئاوارە دەبن و گەلی كوردستان هەر وەك  هەموو كات پەناگەی ئاوارەكان بووە با ئەمڕۆش ببێنە پەناگایەگ بۆ ئەم ئاژەڵانە و لە جیاتی راو كردن و لە ناوبردنیان "دان و خواردن " بۆیان لە هەر شوێنێك بیت دابین بكەین، راو نەكردنی گیان لەبەر و باڵندە كێوییەكان سەروەتی كوردستان زیاد دەكات لە جیاتی ئەوەی گۆیی لە دەنگی ژاوەژاوی  و هۆڕنی ئۆتۆمبێل بگرین با گوێمان لە دەنگی بولبول و باڵندەكان بێت.

هەژار ماهێر ئێدلبی

سەرۆكی رێكخراوی وار بۆ پاراستنی ژینگە لە سۆران