Share on facebook
شادان عەلی: ئەگەر شاعیر بنووسێت دیارە عاشقی هەموو جوانییەكانە
یەک شەممە, 17 کانونی یەکەم 2017 14:14

ZKW : دیدار- دیمانە محەمەد ئامۆكەیی:شادان عەلی خانمە نووسەر، ماوەی بیست و سێ ساڵە سەروكاری لەگەڵ نووسیندا هەیە و دەخوازێت لە ڕێی نووسینەكانییەوە وەك مێیینەیەك پەیامی تایبەت بە خۆی هەبێت و بیگەینێت. لەم دیمانە تایبەتەدا شادان عەلی شاعیر و چیڕۆكنووس باس لە ژیان و ئەزموونی نووسین دەكات.
لە دەسپێكی پەیڤینیدا، شادانە لە بارەی خۆیەوە، دەڵێت: "لە دایك بووی شاری سلێمانیم دەرچووی پەیمانگا-بەشی كارگێریم. بیست وسێ ساڵ لەمەوبەر دەستم كردوەە بە نووسین حەز و خوڵیا بۆ كارەكە، وای لێكردم ئەو دونیا جوانەی هەیە هەڵیبژێرم، چونكە مرۆڤ لەمنداڵیدا زۆر بێگەردوو پاكە، مێشكی سافە هەمیشە حەز لە بینین و داهێنان و شتی جوان دەكاتە. منیش یەكێك بووم لەو بیركەرەوانە بۆ بنووسم".
شادان عەلی گووتیشی: "دەمەوێت وەك ڕەگەزی مێ، یاخوود چاكتر بڵێم وەك مرۆڤێك دەخوازم پەیامی خۆم بگەیەنمە، چونكە هەر یەكێك، كاتێك دەنووسێت دیارە پەیامێكی هەیە تا گوێی لێبگرن".
ئەو شاعیرە لەبەردەوامی قسەكانیدا دەڵێت: "هەموو كات شیعر چێژ بە من دەبەخشێت، واتا ناخم ئارام دەكاتەوە لەبەر ئەوەی  كاتێك هەستێكی جوانت هەیە لەو كاتە دەنووسی وشەكانی دڵت هەڵدەڕژیتە سەر پارچە كاغەزێك و دەبێتە یادگاریی و دەمێنێتەوە. لەسەرتای قسەكانیشم ئاماژەم بەوەكرد حەز و خوڵیا لەمندا ڕۆڵیان هەبووە. تەمەنی منداڵم هەبوو دەمێ دەستم دایە نووسین. ئەگەر شاعیر بنووسێت دیارە عاشقی هەموو جوانیەكانە، كە خودا دەیدات و ئێمەش بەچاو دەیبینین گەرنا وشە و شیعر لە چی دێت؟".
شادان عەلی دەشڵێت: ‌"دیوانێكم هەیە  بە ناوی (تۆ دڵمی یاخاكی نیشتمانم) هەروها سیدیەكیش بە دەنگ و شیعری خۆم تۆماركردوە، ئەگەر وەك هۆكار بڵێی پرۆژەی گەورەم هەیە، بەهۆیی قەیران و نەبوونی لایەنی ماددی جارێ ماوەتەوە، چونكە بەڕاستی ئەو كارانەی من دەیكەم لە هونەر پێویستی بە ماددی زۆرە تا بە ئەنجام بگات".
لەدوای پەیڤەكایدا، گووتی: "ئەوەی شیعرەكانی منیش بخوێنێـەوە دەزانێت  من بۆ هەموو لایەنێك دەنووسم و زیاتریش لایەنی نیشتمانییە، چونكە گیان و دڵ و ڕۆحم نیشتمانمە. نیشتمانیشم واتا كوردستانە و ئاواتم ئەوەیە شەڕ و ئاوارەیی ، برسیەتی و هەژاری بەرۆكی كورد بەربدات و بەرەو نەمان بڕۆشتایە هەرگیز نەمان دەبینیەوە چ كارەساتی مرۆیی یان كارەساتی سروشتی. بەڕاستی ماندووبوین ماندوو نیشتیمانم دەناڵێنێت لە ئازاردا و ڕۆڵەكانی لە نەهامەتیدان.