Share on facebook
ئەنجوومەنی باڵای خانمان: كاتی ئەوەیە چالاكوانان ژیانی ئافرەتان بەرەو ئاییندەیەكی گەش بگۆڕن
پێنج شەممە, 08 ئازار 2018 10:46


ئامادەكردن شێروانی
ئەنجوومەنی باڵای كاروباری خانمان، بە بۆنەی ڕۆژی جیهانی ئافرەتانەوە، پەیامێكی بڵاو كردەوە و ڕایگەیاند، ئێستا كاتیەتی چالاكوانانی لادێ و شار پێكەوە، ژیانی ئافرەتان بەرەو ئاییندەیەكی گەش بگۆڕن.

دەقی پەیامەكە:
مانگی ئادار، مانگی فیداكاری و ڕاپەڕینەكانە. هاوكات ڕۆژی جیهانیی ئافرەتان بۆ ژنانی كوردستان تایبەتمەندییەكی زۆری هەیە، چونكە لە لایەك مانگی یادەوەرییە خەمناك و ناخۆشەكانە، لە لایەك مانگی ڕاپەڕین و رزگاریی گەلی كوردستانە لە دەستی دكتاتۆرییەت، لە لایەكی تر یادێكی مەزنی جیهانی دەكاتەوە كە تایبەتە بەو تیكۆشان و فیداكاری و خەباتە مەدەنییەی بە درێژایی قۆناغەكانی مێژوو لە پێناو دەستەبەركردنی مافە سیاسی، مەدەنی، یاسایی، ئابووری و كۆمەڵایەتییەكانی، خەباتی بۆ كردووە. بۆیە ئەم یادە بەرهەمی خەبات و ڕەنجی سەدان ساڵی ژنانی ڕزگاریخوازی گشت پێكهاتە و نەتەوەكانی دونیایە لە پێناوی نەهێشتنی هەموو جۆر و شێوازەكانی جیاكاری و چەوساندنەوە. بۆیە ژنانی جیهان بە گشتی و ژنانی كوردستان بە تایبەتی، شایانی ڕێز و خۆشەویستین لە پای هەموو هەوڵ و خەبات و تێكۆشان و فیداكارییەكانیان.

بۆیە دەڵێین: ئێستا كاتیەتی ژنان و پیاوان  پێكەوە كار بۆ بەرەوپێشبردنی كۆمەڵگە بكەن لەسەر بنەمای نەهێشتنی جیاكارییەكان و بەرەنگاربوونەوەی توندوتیژییەكان بێ جیاوازیی ڕەگەزی، هەنگاوەكان بۆ خاڵیكردنەوەی كوردستان بێت لە تەواوی كردار و پەرچەكردارە ناپەسەندەكانی كۆمەڵگە بە هەموو شێوازەكانییەوە.
جەژنتان پیرۆز بێت ژنانی تێكۆشەر و فیداكاری كوردستان. سەری ڕێز و نەوازش دادەنەوێنین بۆ شەهیدان، خانەوادەی سەربەرزی شەهیدان، ژنانی قوربانی دەستی ڕژێمەكان و گرووپە تیرۆریستییەكانی وەك داعش و هاوشێوەكانی و قوربانیانی دەستی توندوتیژییەكان.
سەربەخۆیی و ئازادی بۆ ئافرەتانی كوردستان.
كوردستان لە هەموو كات زیاتر پێویستی بە دەستی كاری ژنانی گوند و شارەكانە لە پێناو دەربازبوون لەو قەیران و ئاستەنگانەی ڕووبەڕووی كوردستان بوونەتەوە. كەواتە كاتیەتی: زەمینەسازی بۆ ڕەخساندنی دەرفەتەكان بچێتە قۆناغی كردارییەوە و ئەو هێز و توانا خەوێنراوەی ژنانی گوند و شار ببووژێنرێتەوە و كوردستان لە تواناكانیان سوودمەند بێت و ببنە بەشێك لە چارەسەر و هێز و تواناكانیان نیشانی كۆمەڵگە بدەن تا متمانەی زیاتری خۆیان و هاوپیشە و خێزان و دامەزراوەكانیش مسۆگەر بكەن.

بۆیە ئافرەتان چاویان بڕیوەتە داهاتوو تا لە پڕۆسەی پەرەپێدان و پێشخستنی كوردستان ڕۆڵی سەرەكییان هەبێت، هەروەك چۆن لە سەرخستی شۆڕش و ڕاپەڕینەكان ڕۆڵی گرینگیان هەبووە، هەر وایش باوەڕمان وایە بەشداریی ڕاستەقینەی ژنان لە پرۆسەكانی پەرەپێدان و بەشداریی زیاتری ئافرەتان لە تەكنەلۆژیای زانیارییەكاندا، گەرانتیی سەركەوتن و پێشخستنی كوردستان زیاتر دەكات.

بە كاری پێكەوەیی ژنان و پیاوانی چالاك و هۆشیار، دەتوانین كوردستان پێشبخەین. بۆیە پێویستە ئافرەتانی گوند و شار دەرفەتی كارگێڕیی زیاتر و زەمینەسازی بۆ ڕەخساندنی ژینگەیەكی كاری تەندروست بۆیان بڕەخسێنرێت لە بازاڕەكانی هەرێم تا بتوانێت ڕۆڵی كارا ببینێت لە زیادكردنی بەرهەم و بەرهەمە ناوخۆییەكان گەشەی پێبدات بە تایبەت بۆ هەر ژنێك پێگەیەك و كارێكی شاییستە دەستەبەر بكرێت، كەواتە بۆ ئەوەی ئەم ئامانجانە بەدی بهێنین ژنان پێویستیان بە پاراستنی كۆمەڵایەتی و هەنگاونانە بەرەو ئاسۆیەكی ڕوونتر كە داهاتووی لە كوردستانێكی گەشەسەندوودا دەبینێتەوە.

كاركردن بۆ ئەم پەیامانە بەرپرسیارێتییەكی هەمەلایەنەیە هەم لە ڕووی بابەتی و هەم لەڕووی كردارییەوە كە ئێستا لە هەموو كات زیاتر كاتیەتی. لە هەمان كاتدا مافی ئافرەتانی ئاوارە و پەنابەر لە كاركردن و بەگەڕخستنی تواناكانیان یەكێكە لەو ڕێگایانەی كە مافە شاییستەكانی ژنانی ئاوارە و پەنابەر بەدی دەهێنێت و لە هەمان كاتدا دەیگوازێتەوە بۆ ژینگەیەكی جیاواز لەوەی تێیدا دەژی، بەمەیش گیانی متمانەبەخۆبوون و هاوبەشیی ڕاستەقینە لە ئەرك و مافەكانیان بۆ دەستەبەر دەكات. كاریگەریی ئەرێنی لە ڕووی دەروونی و كۆمەڵایەتی دروست دەكات، بەمەیش پارێزگاریی كۆمەڵایەتی و سەقامگیری و ئاشتیی كۆمەڵایەتی بەدی دەهێنرێت.

كەواتە با پێكەوە ئەم بەرپرسیارەتییە لە ئەستۆ بگرین و كوردستان بگوازینەوە بۆ قۆناغێكی گەشەسەندووتر.

سەركەوتوو بێت ئیرادەی ژنانی خۆڕاگر و فیداكار.

پێكەوە مافە زەوتكراوەكانمان بە دەست دێنینەوە و بە ئاشتی و ئازادی ژیانمان رێك دەخەینەوە بەرەو كوردستانێكی گەشەسەندووتر.



ئەنجوومەنی باڵای كاروباری خانمان

حكوومەتی هەرێمی كوردستان

هەولێر – 8ـی مارسی 2018