Share on facebook
یادی راپەرینی سۆران زۆر بە ساردوسری بەرێوەچوو
یەک شەممە, 11 ئازار 2018 16:09

سوبحان شكۆ- سۆران

رۆژی شەممە 10ی 3ی 2018 لە هۆڵی بۆنەكانی سۆران لە مەراسیمێكدا یادی راپەرینی سۆران و دەورووبەری زۆر بە ساردوسری كرایەوە.

لەم بارەیەوە، كەلسوم گەزنەیی یەكێك لە رێكخەرانی ئەم مەراسیمە، بۆ زاری كرمانجی گوتی:"دوای ئەوەی یادی نەتەویی ئازادكردنی سۆران لەلایەن چەند گەنجێكی خۆبەخش بەڕێوەچوو، بەداخەوە ژمارەیەكی كەمی هاوڵاتی و بەرپرسانی حكومی و حزبی ئامادەبوون، ئەمەش لە ئەنجامی ئەوەی، چەندین ساڵە ئەو یادە بە حزبی كرابوو، بنەماڵەی شەهیدان و پێشمەرگەكان و خەڵكی تێكۆشەر لەلایەن بەرپرسانی حزبی و حكومی شارەكە فەرامۆشكرابوون، بەهۆی ئەمانە خەڵك ئینتمای بۆ نیشتمان و نەتەوە و یادە نەتەوەیيەكان نەماوە".

ئاماژەی بۆ ئەمەش كرد:" 27ساڵە بەرپرسان و لایەنی پەیوەندیدار نەیانتوانیوە پرۆژەی رۆحی نیشتمان لە رۆحی تاكی كورد بنیادبنێن، هەر خەریكی بەحزبی كردن بوونە، سەرەرای ئەمانەش ئەوقەیرانە داراییە و خراپی بارودۆخی ئابووری زیاترهەستی نیشتمانی لای تاك كاڵكردۆتەوە".