Share on facebook
نێچیرڤان بارزانی پێشوازی له شاندێكی هه‌ده‌په ده‌كات
شەممە, 07 نیسان 2018 20:43

ئامادەكردن شێروانی
لە دیداری نێوان سه‌رۆوه‌زیرانی هه‌رێمی كوردستان و شاندێکی پارتی دیموکراتی گەلانی تورکیا (هەدەپە)دا، باس لە دۆخی کورد لە تورکیا کرا و هەردوولا ‏گرینگیی چارەکردنی کێشەی کوردیان لە تورکیا بە ڕێگەی سیاسی و دیالۆگی ئاشتیانەوه دووپات کردەوە.
ئێوارەی ئەمڕۆ شەممە ٧/٤/٢٠١٨، نێچیرڤان بارزانی سەرۆکوەزیرانی هەرێمی کوردستان، ‏پێشوازی لە شاندێکی پارتی دیموکراتی گەلانی تورکیا (هەدەپە) بە سەرۆکایەتیی ‏پەروین بوڵدان هاوسەرۆکی هەدەپە و ئەندامێتیی ژمارەیەک لە پەرلەمانتارانی ئەو حزبە لە پەرلەمانی ‏تورکیا، كرد.‏
لە دیدارێکدا پەروین بوڵدان بەناو خۆی و ئەندامانی ‏هه‌ده‌په‌وه بۆ کۆچی ناوادەی خوالێخۆشبوو دلۆڤان ئیدریس ‏بارزانیی برای، سەرەخۆشی لە نێچیرڤان بارزانی کرد و هاوخەمیی خۆی لەگەڵ بەڕێزیان دەربڕی و هیوای خواست ئەمە دوایین خەمیان ‏بێت.‏
لای خۆیه‌وه سەرۆکوەزیران سوپاسی هاوخه‌مییه‌كه‌یان کرد، هه‌روه‌ها پیرۆزبایی لە بوڵدان کرد بەبۆنەی هه‌ڵبژاردنی وه‌ك هاوسه‌رۆكی هه‌ده‌په لە کۆنگرەی ئەم دواییەی حزبه‌كه‌یاندا و هیوای سەرکەوتنی لە ئەرکی نوێدا بۆ خواست.
له به‌شێكی دیكه‌ی دیداره‌كه‌دا باس لە دۆخی کورد لە تورکیا کرا و هەردوولا ‏گرنگیی چارەسەرکردنی کێشەی کورد لە تورکیا بە ڕێگەی سیاسی و دیالۆگی ئاشتیانەوه دووپات کردەوە.
تاووتوکردنی چەند پرسێكی په‌یوه‌ست به دۆخی ناوچه‌كه‌وه، تەوەرێکی دیکەی دیداره‌كه بوو.‏