Share on facebook
ئایا ئافرەتی دوو گیان دەتوانێ بە ڕۆژوو بێ ؟
یەک شەممە, 20 ئایار 2018 17:18


دكتۆرە مهاباد دلاوەر - پسپۆڕی نەخۆشیەكانی ئافرەتان

رۆژووی مانگی رەمەزان لەسەر موسڵمانان واجبێكە و بە پێی شەرعی ئیسلام دەبێت موسڵمانان لەو مانگەدا بە رۆژوو بن ، ئافرەتی دوو گیان لە چەند حاڵەتێك دا بەهۆی سەلامەتی خۆی و كۆرپەلەی ناكرێت لە چەند قۆناغێكی دوو گیانیدا بە رۆژوو ببن، بەپێچەوانەوە كاریگەری نەرێنی دەكاتە سەر ژیانی خۆی و بەتایبەت كۆرپەكەی . دینی ئیسلامیش رێگەی بەوەداوە ئەگەر عوزرێكی شەرعی هەبێت بە رۆژوو نەبێت و لەكات و ساتی تر رۆژووەكە بگرێتەوە.

لە ئێستادا لە نێو ئەومانگەداین و رۆژانە لەلایەن رێژەیەكی زۆری ئافرەتانی دووگیان روو بەڕووی ئەو پرسیارە دەبینەوە ئاخۆ ئافرەتان دەتوانن لە كاتی دووگیانیدا ئەو واجبە دینیە جێبەجێ بكەن و لە مانگی رەمەزاندا بە رۆژوو بن ؟

بەپێویستی دەزانین كورتە باسێك لەسەر ئەو بابەتە بكەین و لێرەدا بۆ ئافرەتانی دووگیان روون بكەینەوە لە چ كاتێكی دوو گیانی ئاساییە بە رۆژوو بن و لەكام حاڵەتی دوو گیانی نابێت بە رۆژوو بن .

لە سێ مانگی یەكەمی دووگیانیدا بەهیچ شێوەیەك نابێت ئافرەتان بە رۆژوو بن ، چونكە لە هەشت هەفتەی یەكەمی دووگیانیدا زۆربەی كۆئەندامەكانی كۆرپە گەشە دەكات، بە رۆژوو بوون دەبێتە هۆی زیان گەیاندنی راستەوخۆ بە كۆرپە بەتایبەتی مێشكی كۆرپە كە لە سێ مانگی یەكەم زۆر گرنگە بۆ دروست بوونی .

هاوكات، رۆژوو گرتن لە سێ مانگی دووەم ئاساییە، بە مەرجێك ئافرەتی دوو گیان پشكنین بۆخۆی و كۆرپەكەی بكات و هیچ نەخۆشی و كێشەیەكییان نەبێت ئەوا لەو حاڵەتەدا ئافرەتی دوو گیان دەتوانێ بە رۆژوو بێت و زیانی بۆ كۆرپەلە و دووگیانیەكەشی نییە .

لە سێ مانگی دووگیانیدا، لە رووی تەندرووستییەوە گونجا و تەندرووست نییە ئافرەتان لەو كاتەدا بە رۆژوو بن ، چونكە زۆربەی ووزەی كۆرپە لە شەكرەی خوێنی دایك وەردەگری ئەگەر بێتوو دایك بەرۆژوو بێت چەوریەكانی لەشی ئەتووێتەوە و ماددەی کیتون(keton) دروست دەكات كە لە رێگەی ویلداش بۆ كۆرپەلە دەگوازرێتەوە و زیان بە مێشكی كۆرپەلە دەگەینێت .

" ئەو ئافرەتانەی لە كاتی دووگیانیدا دەتوانن بەڕۆژوو بن "

ئەو ئافرەتانەی هیچ نەخۆشیەكی تایبەتیان نەبێت ، فشاری خوێنیان نۆڕماڵ بێت ، پشكنینی خوێن و میزیان نۆڕماڵ و ئاسایی بێت ، رۆژانە كاری گران نەكات و زۆر ماندوو نەبێت ، كالۆری رۆژانە لە خواردن وەربگرێت لە لایەن پزیشكی پسپۆڕ بۆی دیاری بكرێت بەپێی باڵا و كێش و هەفتەكانی دووگیان بوونی .


" چەند رێنمایەك ئافرەتانی دووگیان له کاتی به روژوو بوون، پێویستە پزیشكی پسپۆڕی لێ ئاگادار بكەنەوە "

ئەگەر بێتوو ئافرەتی دووگیان جولەی كۆرپەی كەم بوو ، هاوکات٬ هەبوونی ئازاری زۆری زك و گرژی ماسولكە پێویستە پزیشكی لێ ئاگادار بكرێتەوە چونكە ئەگەری لەدایك بوونی پێش وەخت دەبێ لەو حاڵەتەدا ، هەروەها ئەگەر ئافرەتی دوو گیان تووشی سەر ئیشە و بێ تاقەتی و نارەحەتی و ماندوو بوونی زۆر كرد پێویستە سەردانی پزیشك بكات . ئەگەر بێتوو كێشەی ئافرەتی دوو گیان لە دابەزین دابوو ئەوا لەو كاتەش پێویستە پزیشكی لێ ئاگادار بكرێتەوە ، وە ئەگەر ئافرەتی دوو گیان زۆر هەستی بە تێنوەتی كرد و میز كردنیشی كەم بوو پێویستە لە ماوەیەكی زوودا سەردانی پزیشك بكات ، ئەگەر دڵتێكچوون و رشانەوەشی لە كاتی دوو گیانی دا هەبوو ئەوا بە هەمان شێوە پێویستە خۆی بگەینێتە لای پزیشكی پسپۆڕی منداڵ بوون