Share on facebook
بێریڤان دۆسكی: ئیش و كاری ماڵەوەش ئەنجام دەدەم
دووشەممە, 04 حوزەیران 2018 08:56

 


بێریڤان دۆسكی، كچە راگەیاندكار و بێژەر‌ لە رادیۆی زاگرۆس و پێشكەشكار لە تەلەڤزیۆنی (ئیفێكت)، دەڵێت "جگەلە كاری راگەیاندن، كاری ماڵەوەش ئەنجام دەدەم و چونكە كچ بەئیشی ماڵەوە و كاری چێشتخانەوە جوانە.
بێریڤان ئەحمەد حوسێن، ناسراو بە بێریڤان دۆسكی،‌‌‌‌ كچە راگەیاندكار و بێژەر‌ لە رادیۆی زاگرۆس و پێشكەشكار لە تەلەڤزیۆنی (ئیفێكت)، رایدەگێنێت: ”زیاتر لە دوو ساڵە هاتوومەتە ناو كاری ڕاگەیاندن، كاری بێژەری خەونی منداڵیم بوو، سوپاس بۆخوا دوو ساڵ پێش ئێستا ئەو خەونەم هاتە دی وەك بێژەر لە ڕادیۆی زاگرۆس دەست بەكاربووم، لەئێستاشدا بێژەری سیاسیم لە رادیۆی زاگرۆس، هەروەها لە تەلەفزیۆنی ئیفێكتیش پێشكەشكارم".
بێریڤان دۆسكی، دەشڵێت "‌ لەئێستا قوتابی دوا قۆناغی كارگێڕی كارم، هەروەها لە كاری ڕاگەیاندنیش بەردەوام و هەموو هەوڵم تەواوكردنی خوێندنەكەم بووە بەسەركەوتووی، ڕەنگە دوای تەواوكردنی خوێندنم پەرەی زیاتر كاری ڕاگەیاندن بدەم‌، بەپێی ئەوەی كاتی زیاترم دەبێت ڕەنگە بە هەندێك بەرنامەی تازە و بەشێوازێكی جیاواز بێمە خزمەت خەڵكی خۆشەویستی خۆمان".
دۆسكی، لەبارەی ژیانی هاوسەگیری لە داهاتوو و كاریگەری لەسەر كاری راگەیاندن، ئەوە دەخاتە روو ”‌بڕواناكەم هیچ بەربەستێك دروست بێت، چونكە هەر كەسێك بیەوێت لەگەڵم بژیت دڵنیام وەك خۆی قبوڵم دەكات، لەگەڵ ئەوەشدا ئیش و كاری ماڵەوەش ئەنجام دەدەم، چونكە كچ بەئیشی ماڵەوە و كاری چێشتخانەوە جوانە، منیش كچی گەورەی ماڵم ئەگەر دەوامم نەبێت و لەماڵەوە بم هەموو ئیشەكانی ماڵەوە دەكەم، خواردنیش دروست دەكەم، بەتایبەتیش شرینی خۆشیش دروست دەكەم".
ئاشكراشی كرد، كە‌ وەك ئافرەتێك شانازی بەخۆیەوە دەكات‌‌‌، سەركەوتووانە كارەكانی ئەنجامداوەو لەخۆی ڕازییە، دەشڵێت: ”بەڵام زۆر خەونی ترم هەن، هەوڵ دەدەم و بەردەوابم و هیوادارم لە داهاتوو بتوانم و دەرەفەتم بۆ بڕەخسێ بۆ ئەنجامدانی كارو بیرۆكەی داهاتووم.