Share on facebook
لە مەراسیمێكدا ڕێز لە ١٦٧ پڕۆفیسۆر گیرا كە لە زانكۆكانی سنوری پارێزگای هەولێر دەوام دەكەن
دووشەممە, 02 تەمموز 2018 08:16


راگەیاندنی وەزارەتی خوێندنی باڵاو توێژینەوەی زانستی
لەمیانی مەراسیمی ڕێزلێنان بۆ هەڵگرانی پلەی زانستی پڕۆفیسۆر، كە لەئێستادا لەزانكۆكانی سنوری پارێزگای هەولێر خزمەت دەكەن هات، كە رۆژی چوارشەممە (27/6/2018) لەهۆڵی سێنتەری ڕۆشەنبیری و كۆمەڵایەتی زانكۆی سەڵاحەدین  بە ئامادەبون و چاودێری د.یوسف گۆران وەزیری خوێندنی باڵا و توێژینەوەی زانستی و سەرۆك زانكۆ و نوێنەری سەرۆك زانكۆكان یاریدەدەری سەرۆكی زانكۆ و ڕاگری كۆلێژەكان و ڕاوێژكاران و بەڕێوەبەرانی گشتی وەزارەت بەڕێوەچوو.
لەكاتی پێشكەشكردنی وتارێكیدا د.یوسف گۆران وتی: پێخۆشحاڵم جارێكی دیكە لەبۆنەیەكی تایبەت و ڕێزلێنان لەئێوەی قەدرگران لەگەڵتاندابم، پێموایە كەمترین شت كە ئێمە بتوانین لەگەڵ ئێوەی بەڕێزدا كە دەیان ساڵی تەمەنی خۆتان بۆ خزمەت كردنی زانست و قوتابیان و خوێندكارانی ئەم وڵاتە تەرخان كرد كەوا ئێمە ئەمڕۆ بێین ساتێكی خۆمان بۆ ئێوە تەرخان بكەین و ئەو دیدارەتان بۆ ڕێك بخەین.
هەر لە وتەكەیدا د.یوسف گۆران ڕاشیگەیاند: ئەوەی كە ئەمرۆ دەیكەین تەنها شتێكی سیمبولیە، تەقدیر و وەفای ئێوە بەهیچ شێوەیەك و بەهیچ موناسەبەك ناكرێت، وتیشی: ئێمە ئەزانین لە چ دۆخێكدا مامۆستایان هاتن و ئەركی زانستی و كارگێڕی خۆیان جێبەجێ كرد، د.یوسف گۆران ڕوونیشی كردەوە كە لەسەرەتای پرۆسەی خوێندن لەكوردستان 157 مامۆستامان هەبوە لەیەك زانكۆ، بەڵام ئێستا نزیكەی 170 پڕۆفیسۆر ڕێزلێنانیان بۆ دەكرێت، ئەمە خۆی لەخۆیدا ئەوە پیشان دەدات كە كوردستان چ گەشەیەكی كردووە.
لەبەشیكی دیكەی قسەكانیدا وەزیری خوێندنی باڵا و توێژینەوەی زانستی وتی: چۆن لە ڕابردودا نەیانتوانی ڕەوتی زانستی ئێمە ڕابگرن، لە قۆناخی نوێشدا نەیانتوانی بەو هەموو گەمارۆ سیاسی و ئابوری و دەرونیەی كردیانە سەرمان چۆكمان پێ دادەن، ڕاشیگەیاند: ئەوەی كەنەیهێشت گەمارۆی زانستی بخرێتەسەر هەرێمەكەمان و گەنجان و قوتابیان و خوێندكارانمان ئێوە بوون، بۆیە ئەتوانین بڵێین ئێوە سەرمەشقی ئەو قافڵەیە بوون كەنەتانهێشت پڕۆسەی خوێندن و لاوازكردنی كوردستان لەڕووی زانستییەوە سەربگرێت.
هەر لەو مەراسیمەدا د.ئەحمەد دزەیی سەرۆكی زانكۆی سەڕحەدین لەوتەیەكدا ڕایگەیاند: ئەمرۆ رۆژێكی پیرۆز و خۆشە لای ئێمە كە وەزارەتی خوێندنی باڵا بڕیاری ئەوەی داوە لەخزمەتی ئێوەدا بێت و ڕێزلێنان و خەڵات بۆ ئێوە ئەنجامدا، هەرچی بكرێت بۆ ئێوە هەر كەمە چونكە ئێوە زیاتر لە ٣٠ ساڵی تەمەنی خۆتان بەخشیوە بەزانست .د.ئەحمەد دزەیی وتیشی: لەپاش راپەرینەوە تەنها یەك زانكۆمان هەبوو لەگەڵ ١٥٧ مامۆستا، بەڵام ئێستا زیاتر لە ٣٠ زانكۆی حكومی و تایبەت و زیاتر لە هەشت هەزار مامۆستامان هەیە و، زیاتر لە 130 پرۆفیسۆرمان تەنها لەزانكۆی سەڵاحەدین هەیە.
هەر لەمەراسیمەكەدا پ.د.ئازاد فەیزوڵڵا بەنوێنەرایەتی پڕۆفیسۆرانی زانكۆكانی سنوری پارێزگای هەولێر وتارێكی پێشكەشكرد و  بەناوی ئامادبووانەوە دوای ئەوەی سوپاس و پێزانینی ئاراستەی وەزارەت كرد بۆ ئەو ڕێزلێنانە وتی: ئەم بۆنەیە هاندەرێكی مەعنەوی گرنگە بۆ ئێمە، ئەوەشی ڕاگەیاند ئەو مامۆستایانەی كە ئەمڕۆ ڕیزلێنان و خەڵاتەیان پێشكەش كرد، كە جێگایان لەپڕۆسەی زانست و فێركردندا دیارە، چونكە ئێوە لە دژوارترین ساتەكانی ئەو میللەتە كۆڵتان نەدا، بۆ ئەوەش ڕایگەیاند:ئەمە هاندەرە بۆ بەردەوامی.
هەر لە مەراسیمی ڕێزلێنان بۆ هەڵگرانی پلەی زانستی پڕۆفیسۆر، كە لەئێستادا لەزانكۆكانی سنوری پارێزگای هەولێر خزمەت دەكەن ، كە ژمارەكەیان 167 پرۆفیسۆر بوو، د.یوسف گۆران وەزیری خوێندنی باڵا و توێژینەوەی زانستی خەڵات و ڕێزلێنان و سوپاس و پێزانینی وەزارەتی لەبەرامبەر ئەو خزمەتی چەند ساڵەی ڕابردوو كە پێشكەشی پڕۆسەی خوێندن و بەرەو پێشبردنی زانست لەكوردستان بردوو، پێشكەش كردن.