Share on facebook
وەزارەتی‌ پەروەردە‌ مەرجەكانی‌ موڵەتی‌ بێ‌ موچەی راگەیەند
دووشەممە, 09 تەمموز 2018 21:36


دانان شێروانی
وەزارەتی پەروەردەی حكومەتی هەرێمی كوردستان مەرجەكانی پێدانی مۆڵەتی بێ مووچەی بۆ مامۆستایان بڵاوكردەوە و ڕایگەیاند پێویستە لە كاتی وەرگرتنی مۆڵەتدا بەرێوەبەری پەیمانگا یان ناوەندەكانی خوێندن ڕەزامەندی دەربڕن لەسەر مۆڵەتەكە و بەڕوونی ئاماژەی پێ بدەن كاریگەری لەسەر میلاك نابێت بە تایبەت لە ڕووی پسپۆریەوە.

وەزارەتی پەروەردەی حكومەتی هەرێمی كوردستان لە نوسراوێكدا كە واژۆی پشتیوان سادق وەزیری پەروەردەی لەسەرە ئاماژە بە ئەوە دەكات، مامۆستایان دەتوانن داواكاری پێشكەش بكەن بۆ وەرگرتنی مۆڵەتی بێ مووچە  لە   بەرواری 10 / 7 / 2018 هەتا بەرواری 15 / 9 / 2018 بەمەرجێك داواكار خۆی ئامادەبێت، مامەڵەكان بە بریكارنامە ناكرێت.

ئەوەش هاتووە، لە كاتی پێشكەشكردنی داواكاری پێویستە ڕەزامەندنی بەرێوەبەری پەیمانگا و ناوەندی خوێندن و لێپرسراوی میلاك و بەرێوەبەری پەروەردە هەبێت، بە روونی ئاماژە بۆ ئەوە كرابێت،  كە كاریگەری لە سەر میلاك نەبێت بە تایبەت لە ڕووی پسپۆریەوە.

هەر لە نوسراوەكەی وەزیری پەروەردەی حكومەتی هەرێمدا ڕوونیشكراوەتەوە، ئەو مامۆستایانەی كە پێش بەرواری 12/20/ 2015 مۆڵەتی بێ مووچەیان وەرگرتووە مافی وەرگرتنی دوو ساڵ مۆڵەتیان هەیە، بەڵام ئەوانە دوای ئەو بەروارە مۆڵەتی بێ مووچەیان وەرگرتووە مافی یەك ساڵیان هەیە مۆڵەتی بێ موووچە وەربگرن.

ئەوەش خراوەتەڕوو، ئەو مامۆستایانە كە لە ڕەگەزی مێن و مۆڵەتی دایكایەتیان وەرگرتووە، مافی وەرگرتنی مۆڵەتی بێ مووچەیان هەیە بە مەرجێك ماوەی دەستبەكاربوونی لە 10 رۆژ تێپەری نەكردبێت و كاریگەری لەسەر میلاك دروست نەكات.

باس لەوەش كراوە، بە هیچ شێوەیەك نابێت مامۆستا دەست لە كار هەڵبگرێت هەتا مۆڵەتەكەی لەلایەن وەزراەتەوە وەرنەگیرێت فەرمانی بۆ دەرنەچێت، لە هەمانكاتیشدا پێویستە لە دوای حەوت رۆژ لە دەرچوونی دەست لە كار هەڵبگرێت بە پێچەوانەوە بەرێوەبەری خوێندنگا و لێپرسراوێتی خۆیەتی و بەرێوەبەری پەروەدەی قەزاكان لێی بەرپرسیار دەبن.