Share on facebook
چۆن كەلتووی جەماوەرییمان بپارێزین
دووشەممە, 06 ئاب 2018 07:22

توێژەری كۆمەڵایەتی: ڕەنجدەر نوری مەولود

كەلتوور چییە ؟ هەركەسێك لە بارەی كەلتوورەوە نوسیبێ یان پێناسەی كردبێ ئاماژەی بەوە داوە بە ئالۆزی لەم چەمكە دەگەین، بەڵام لە راستیدا بە هۆی زۆری و فراوانی پێناسەی كەلتوورەوە دەتوانین كەلتوور بە مانا گشتیەكەی و بە كورتی پێناسە بكەین، كە ئەویش بریتیە لە پرۆسەیەكی بێ كۆتا بەردەوام لە نوێ بوونەوەدایە. واتە كەلتوور ئەوە ڕەتدەكاتەوە كە هەر كۆمەڵگەیەك گەیشتبێتە ئاستێكی بەرزی زانست و پێشكەوتن لەم رووەوە خۆی لە لوتكەی رەوشت بەرزی كەلتوور ببینێت، لە راستیدا هەر كۆمەڵگەیەك خاوەنی كۆمەلێك بەهای جوان و پۆزەتیڤ بن كە رێز لە مرۆڤ و كۆمەڵگە بگرێت، ئەمە واتا ئەم كەلتوورە شایەنی پارێزگاری كردنە، هەر كۆمەڵگایەك لە ئاستێكی بەهێز و ئابوری گەورە دابێت نابێت بە چاوێكی كەم سەیری كۆمەڵگاكان و كەلتوورە جیاوازەكان بكات،دەبێت خاوەنی رێز بێت لەبەرامبەریاندا .

ئەگەر بێتو كۆمەڵگاكانی دراوسێ و كەلتوورە جیاوازەكان هێرشێكی فراوانیان كردە سەر كەلتووری كوردەواریمان كە كردوویانە ئێمە چۆن پارێزگاری لێ بكەین؟ چۆن كەلتووری جەماوەرییمان بپارێزین ، لە ڕاستیدا ئەگەر باس لە چەمكی كەلتووری جەماوەری بكەین دەتوانین بلێین یەكێك لە چەمكە گرنگ و ئامادەكانی ئەمڕۆمانە و چەمكێكی سەردەمی و هاوچەرخە ، كەلتووری جەماوەری واتە كەلتووری میدیاكان كە لە ئێستادا هەم لە تیڤیەكان و هەم لە سۆشیاڵ میدیا و ماڵپەرە ئەلیكترۆنیەكان هەموو بوارەكانی ڕِاگەیاندن كاری پێدەكرێت، بەداخەوە جۆرێك لە نارێكی یان پرۆسەیەكی تێكدانی كەلتووری لە هەرێم دەبینرێ ، جگە لە بەشێك لە تیڤی و سایت و پەیجەكان تاڕادەیەك هەست بەرپرسیاریەتی دەكەن، هەوڵی بە رٍِۆشنبیركردنی تاكی كوردی و كەلتووری نەتەوەكەمان دەدەن. بەڵام لەبەرامبەر ئەمەدا بە پاساوی پێشكەوتن و نوێ خوازی كۆمەلێك میدیا و پەیجی بێ خاوەن لە سۆشیاڵ میدیا كار بۆتێكدانی هزری تاكی كوردی دەكەن ، ئەمەش لە رێگای دۆبلاژی فیلم وزنجیرە ئەفلامەكانی توركی و فارسی و عەرەبی هتد..... كە لە كەناڵە لۆكاڵیەكان زیاتر پیشان دەدرێ بە پرۆسەیەكی بەرنامەدارێژراو كار بۆ پەكخستنی بەها و ئاراستە كەلتوورییەكانی كوردی دەكەن، لەبەرامبەر ئەمەدا پێویستە هەم لایەنی پەیوەندیدار هەم كەسە ڕۆشنبیرەكان و هەم مامۆستایانی ئاینی بە جدی كار بۆ پاراستنی كەلتووری كوردەواری و نەتەوەیمان بكەن لە رێگای میمبەرە جیاوازەكان، ئەوەی شایەنی باس كردن بێ ئێمە خاوەن كەلتوورێكی پڕاو پڕین لە ئەدەب و هونەر و میوزیك و وێژەیی هتد... چونكە هەر كۆمەڵگایەك ئەگەر بێتو كەلتووری جەماوەری خۆی نەپارێزێت مەترسی لە سەر ئاسایشی نەتەوەیی دروست دەبێ، تاكەكان ئینتیمایان لاواز دەبێ لەبەرامبەر خاك و نیشتیمان ، لەبەر ئەوەی ئەم كەلتوورە پرۆسەیەكی بەردەوامە واتا هەموو چینێكی نوێ ئاشنای دەبێت ، ئەگەر نەوەی تازە و گەنج و لاوەكانمان ئاشنا بكەین بە كەلتووری نەتەوەییمان ئەوا بە دڵنیاییەوە ئینتیمای تاكەكانمان بەرز دەبێت، بۆیە پیوستە لەسەر هەموومان كاربكەین  بۆ بەرزكردنەوەی هۆشیاری كۆمەڵایەتی و سیاسی و ڕەخساندنی ژینگەیەكی گونجاو تەندروست بۆ داهاتووی نەوەكانمان، بواری كرانەوەی ڕۆحی و وە ڕێكخستنی سیمینار و بەرهەم هێنانی كۆمەلێك كورتە فلیم كە ئاماژە بێ بۆ كەلتوورێكی جوانی كوردەواریمان ، هەروەكو چۆن پیرەمێردی شاعیر دەڵێ" كاولەی وەتەن هێندە شیرینە .....ژەهری دووپشكی عەرەبەت هەنگوینە" دەبێ ئێمە بەرامبەر هەموو ئەو كەسانە بوەستینەوە كە بۆ خواستی بازرگانیان كار بۆتێكچوونی كەلتووری جەماوەری و نەتەوەییمان دەكەن ، بۆیە پێویستە لەسەر هەر تاكێكی خاوەن ویژدان و هەڵوێست ڕێز لە كەلتووری وڵات بگڕێت و هەوڵی بەرەو پێشچوونی بدەین لە چوارچیوەیەك بێ كە كەرامەت و رێزگرتنی یەكتری تێدابێ.