هاوڕێیەتی لە نێوان بەرژەوەندی تاكەكەسی پێویستی ڕۆحی
دووشەممە, 06 ئاب 2018 07:37

زێرەڤان جوهر _ سۆرا

رۆژی 30ی تەمووزی هەر ساڵێك لەلایەن رێكخراوی نەتەوە یەكگرتووەكانەوە وەك رۆژی جیهانی هاوڕێیەتی لە ساڵی 2011دا دیاریكراوە, هەر لەم رۆژەدا تاكەكان لەتەواوی جیهاندا بەشێوەی جیا جیا ئەم رۆژە یاد دەكەنەوە, لە هەرێمی كوردستانیش ئەم رۆژە كەمتر یادكرایەوە, بەشێك لەتاكەكانی كۆمەڵگەش پێیان وایە: " بۆ ئێمە هاورێیەتی زۆر لەوە گرنگتر و زیاتر تەنیا رۆژەكی  بۆ دابنێین"

ئاشتی هیوا كوڕە گەنجێكی تەمەن ١٩ ساڵە ئەو لەنێو دۆست و هاوڕێكانی بەوەناسراوە كە هەردەم هاوڕێیەكانی لەبیرە زۆربەی كات  هاوڕێیەكانی كۆدەكاتەوە لەسەر ڕۆژی جیهانی هاوڕێیەتی دەڵێت " ڕۆژی جیهانی هاورێیەتی هەرچەند لە سنووری قەزای سۆران زۆر بەكەمی یادكرایەوە، بەڵام ئەم یادكردنەوەیە لە كەسێكەوە بۆ كەسێكی تر جیاوازبوو، بەڵام من بەش بە حالی خۆم ئەم یادەم نەكردەتەوە، چونكە لای من هەموو ڕۆژێك ڕۆژی هاورێیەتی نەك تەنیا ڕۆژێك، بەڵام هندێك كەس لە رێی  نامە، یاخود سۆشیال میدیاوە ئەم ڕۆژەیان لەیەكتر پیرۆزكردوە، من پێم وایە هاورێیەتی شتێكی زۆر لەوە گەورەترە تەنیا ڕۆژێكی بۆ دابنێی، بۆ من پەیوەندی هاورێیەتی مانا و خاسیەتێكی تایبەت بەخۆی هەیە، جیاوازتر لە هەر پەیوەندیەكی تر". محمد گەردی چالاكوانی كۆمەڵگەی مەدەنی لەسەر هاورێیەتی بۆ زاری كرمانجی پەیڤاو ئاماژەی بەوەدا: "هاوڕێیەتی گرێدانی پەیوەندیەكی مرۆڤایەتییە لەنێوان دووكەس یان زیاتر لەسەر بنەمای مرۆڤبوون و ڕێزگرتن و متمانە و ڕاستگۆیی و ئەمانەت پارێزی، گرنگیدان بە كۆمەڵێ ڕەوشت و هەڵوێستی هاوبەشی نێوانیان, بەیەكێك لەگرنگترین بەخشینەكان دادەنرێ كەمرۆڤ بەدەستی بهێنێ بەوپێیەی ژیانی هاوڕێیەتی گرنگی و تایبەتمەندی خۆی هەیە كە مرۆڤ پێیدا گوزەر دەكات، جا ئەم هاوڕێیەتیە لەنێوان هاوڕەگەزی خۆی بێت یان بەپێچەوانەوە یان هاوڕێیەتی قوتابخانە یان زانكۆ یان هاوڕێی پیشە هەریەكەیان بۆمرۆڤ لە لەكات و ساتی خۆیدا گرنگیەكەی دەردەكەوێت، چونكە لە سروشت و هەست و سۆزی مرۆڤدا پاڵنەرێك هەیە وادەكات تاكەكان نەتوانن بەبێ دەوڕووبەر بژین بەوهۆیەوە بۆ پڕكردنەوەی ئەم پێداویستیە ڕووحیە پەنا دەبەنە بەر دۆزینەوەی ئەوكەسانەی لەلایەن خۆیەوە ئازیزن و خۆشی دەوێن، ئینجا خۆشەویستی لەنێوانیاندا درووستدەبێت و گەربێتو خۆشەویستییەكە توندو تۆڵبوو هیچ ڕووداوێكی نەخوازراو لەنێوانیاندا ڕوونەدات ئەم خۆشەویستی و یەكترناسینە بەتێپەڕبوونی كات یادگاری خۆش و ناخۆش بەرهەمدەهێنێ كە زادەی نێوان دوو ئەقڵی جیاوازە، ئینجا دەگوازرێتەوە بۆناو خێزانەكانیان و لەكۆتایشدا بۆ كۆمەڵگە بەگشتی، كە دواجار ئاسوودەیی و خۆشگوزەرانی ڕووحی باڵ بەسەر كۆمەڵگادا دەكێشێ و تاكەكان تێیدا دوور لەتوندوتیژی توندڕەوی پەروەرەدەكرێن. ئەو وتە گوزارشتە جوانانەی لەسەر  هاوڕێیەتی گوتراون زۆرن بەڵام ئەمانە بەڵای منەوە ناوازەبوون، كە وتراوە:" هاوڕێیەتی زەویێكی چێندراوە بەخۆشەویستی ئاودەدرێ، هاوڕێیەتی ڕاستەقینە ئەوەیە كە بۆت دێت لەكاتێكدا جیهان لێت دوردەكەوێتەوە، هاوڕێیەتی تاكە گوڵە دڕكی نەبێ!.."     بەرەڤان شاكر دەرچووی بەشی كۆمەڵناسییە ئەو باس لە كاریگەری سۆشیال میدیا دەكات لەسەر پەیوەندی هاورێیەتی دەڵێ: "سوشیال میدیا وەك هەر بوارێكی تر لایەنی باش و خراپی هەیە لەسەر پەیوەندی هاوڕێیەتی ئەمەش پەیوەستە بە ئاستی ڕۆشەنبیری و پەروەردەی كومەڵایەتی، لێرەدا ڕۆڵی سوشیال میدیا لەسەر لاوازكردن یان بەهێزكردنی پەیوەندی هاورێیەتی, خوی سوشیال میدیا هیچ سنووریك ناناسێت و دەبێت بە هوكارێك بۆ ئەوەی هاوڕێی نوێ بە یەكتر بناسێنرێن و لە كار و چالاكییەكانی یەكتر بە ئاگا بن، كەلتووری نوێ ببینێت و بناسێت، شارەزای كەلتووری نەتەوەكانی تر بێت. بۆ ئەوەی ئاستی دونیا بینینی زیاتر بێت و ئاستی ڕۆِشەنبیری بەرزتر بكاتەوە، ئەمە وادەكات هەرچەندە كەسە نزیكەكان یان هاورێیان لە لایەكی ترەوە دوور بن بەڵام لەیەكتر دانەبڕێن، زورن ئەو كەسانەی ئێستاش بەدوای هاوڕێیەكانی سەردەمی زانكۆ یان قۆتابخانەدا دەگەرێن، كەچی سوشیال میدیا بووتە هوكارێك بۆ ئەوەی  دوای تەواوبوونی ماوەیك لەگەڵ یەكتر بوون هەر ئاگاداری یەكتر بن.لە لایەكی ترەوە سوشیال میدیا دەبێت بە هوكارێك بۆ ئەوەی بێ ئاگایەك لە نێوان هاوڕێیان دروست بكات و لە نزیك بوونەوەی ڕاستەوخۆ كەمتر بێت، ئەمەش وادەكات سیلەی رەحم كەمبێتەوە و كەمتر بە ئاگابن لە ڕەوشی یەكتر.بە هەبوونی نموونەی چەند هاورێیەك هەرچەند نزیكن لە یەكتر بەڵام بێ ئاگان لە یەكتر بە هوكاری زیاتر خەریك بوون بە سوشیال میدیایەوە.