Share on facebook
نووێنەری خەڵك یان فەرمانبەری حزب
دووشەممە, 06 ئاب 2018 07:47

زێرەڤان جەوهەر

ئەمە دۆخی بەشێكی زۆری كاندیدانی حزب و لایەنە سیاسیەكانە لە كاتی بانگەشەی هەڵبژاردن ، كاندیدەكان لەكاتی بانگەشەكاندا وەك فرۆشیارە گەڕۆكەكان كۆلان بەكۆلان و ماڵ بەماڵ دەگەرێن بۆ ئەوەی خەڵك دەنگیان پێ بدات، باڵەخانە و ستوونەكانی كارەبا و بینایەكی بڵند نابینی كەوێنەی ئەوانی پێوە نەبێت، لەو نێوەندا چەندین بەڵێن و قسەی گەورە گەورە دەبیستی لە دەمی ئەوانەوە, وەك ئەوەی كە ئەو بەڕێزانە بگەنە پەرلەمان هەرچی بۆ خەڵك نەكراوە ئەو بەڕێزانە بۆیانی دەكەن، بەشێك لەو كاندیدانە هەندێك بەڵێن بەخەڵك و هەوادارانی خۆیان دەدەن، زۆرجار عەقڵی مرۆڤیش توانای ئەوەی نییە ئەو قسە و بەڵێنانە وەگرێت ، لە كاتێكدا پەرلەمان خۆی وەك دەزگایەك توانای جێ بەجێ كردنی ئەم بەڵێنانەی نیە،بەواتاێكی تر كەی كاری پەرلەمانتار قێرتاوكردنی شەقامەكان و دامەزراندنی خەڵكە ئەمە و چەندین بەڵێنی تری كاندیدان؟ خەڵكیش بەبێ ئەوەی بیربكاتەوە، ئایە بەڕاستی كاری پەرلەمانتار چیە؟ بۆچی دەچێتە پەرلەمان؟ لێرەدا دەكەونە ژێر كاریگەری قسەو دەم لوسی ئەو بەرێزانە، دەنگیان پێ دەدەن، بەشێك لە كاندیدەكان لەدوای دەرچوونیان و گەیشتنیان بۆ نێو هوڵی پەرلەمان سەرەتا دەست دەكەن بە گۆڕینی ژمارەی تەلەفۆنیان، ئوتۆمبێڵی بڵند و شوقەی ئامادەكراو، ئیتر لێرەوە نوێنەری ڕاستەقین و داكۆكیكەری مافی خەڵك دەبێتەوە فەرمانبەر و  موخلیسی حزب و ئاڵای ڕەنگی فلان و فلان، بەبێ ئەوەی بیر لەوە بكاتەوە چەند ڕۆژێك لەمەوپێش چەندین بەڵێنی بەخەڵك و جەماوەرداوە، لەوەش زیاتر كاتێ لە سەر شاشەی تیڤیەكان دەردەكەون بەجۆرێك خۆیان نیشان دەدەن كە دڵسوزی خەڵك و كۆمەڵگان، وەك ئەوە ئەوان كە  ئیش و كاریان هیچ نەبێت جگە لە پشتیووانی داخوازیەكانی گەل و گەیاندنی داواكاریەكانی ئەوان بۆ نێو هوڵی پەرلەمان و گفتۆگوكردن لەسەریان، بێ ئاگایەلەوەی تەنیا وەك بۆكەڵەیەك لەسەر كورسی پەرلەمان دانیشتووە، تەنیا جار نە جارێك دەستی بەرزدەكاتەوە, ئەویش نەك لەبەر بەرژەوەندی خەڵك و گەل ، بەڵكو بۆ بەرژەوەندی حزبەكەی و چەند كەسێك لەنێو حزبەكەی،ئیتر لێرەوە شتێك نەما بە ناوی نوێنەری ڕاستەقینەی خەڵك ، بەڵكو ئەوەی دەمێنێتەوە تەنیا فەرمانبەری حزبێكە, زۆر لەوە دڵنیام بەشێكی زۆری كاندیدانی حزب و لایەنە سیاسیەكان نازانن بۆچی دەبنە پەرلەمانتار یاخود لە پەرلەمان كاریان چیە! ئەمەش كارەساتە گەورەكەیە كە گەلی كورد بەسەر خۆیدا دێنێت، لەگەڵ ئەوەی گەل هەر خەریكی نارەزایی دەربڕینە لە ئەدای كاركردنی بەرێز جەنابی پەرلەمانتار، بەڵام بەرێزیان رازیكردنی دڵی بەرپرسێكی باڵای نێو حزبەكەی بۆ ئەوەی جارێكی تر دەرفەتی خۆ پاڵاوتن و كاندیدكردنی بۆ بڕەخسێنێ پێ باشترە لە دەنگی زیاتر لە ١٠ بۆ ١٥ هەزار كەسی وڵاتەكەی، كاتێ ئەم هەلەیان بۆ دەرەخسێنن, بەشێكیان بێ شەرمانە دێنەوە نێو خەڵك داوا لە هاوڵاتیان دەكەن دووبارە دەنگمان پێ بدەنەوە، هەر ئەمەش دەبێتە هۆی ئەوەی بەشێكی زۆریان لە خولی دووەمی هەڵبژاردنەكان دەرنەچن، بۆیە لەهەرێمەكەی خۆمان وەك پێشینان گووتویانە " قسە هەزارەو دووانی  بەكارە" بۆیە داوا لە كاندیدانی پەرلەمانی كوردستان دەكەم جۆرە بەڵێنێك بەخەڵك نەدەن كەلەكۆتاییدا ببێتە هۆی سەر شۆری و زەلیلی بۆ خۆیان و ناوبانگیان.