Share on facebook
كورسی بێزار مەكەن
دووشەممە, 06 ئاب 2018 08:05

محەممەد مەحموود

زۆرن ئەو مرۆڤانەی ئارەزوویان لە كورسییە جا بۆ لە سەر دانیشتن بێت یان وەرگرتنی دەسەڵات ،ئەوەی گرنگە لە دانیشتن لە سەر كورسی چۆنیەتی خزمەتكردنە بەخەڵك لە رێگای ئەم كورسییەوە نەك ئەو كەسە خۆی خزمەت بكات بەهۆی كورسییەوە، بەواتاییەی كورسی خزمەتكاری كەسەكە بێت ، لە كوردستانی خۆمان مرۆڤەكان كاتێك لە سەر كورسی دادەنیشن نایەنەوێت دەست بەرداری بن یان لەسەری هەڵبستن نەوەك كەسێك بێت و لە جێگای ئەوان دابنیشێت و كورسیەكەیان لێ‌ داگیر بكات ، كورسی دەسەڵات و بەرپرسیارەتی زۆر جیاواز ترە ، چ بۆ لە سەر دانیشتن یان كاركردن و چۆنیەتی بەكارهێنانی ئەم كورسییە كە بۆخزمەتی گشتی بێت نەك تایبەتی ، لە كوردستان كاتێك سەیر دەكەین لە كورسی دەسەڵاتیش مرۆڤەكان بە ئاسانی وازناهێنن و چۆڵی ناكەن بۆكەسێكی تر ، كورسی وامان هەیە دادە دادو هاوار هاواریەتی لە دەستی ئەو كەسانەی كە چەندین ساڵە بەنەشارەزایی لە سەری دانیشتووە و بۆ خزمەتی خۆیان  كورسییەكە بە كاری دەهێنێن، كەسانی وامان هەنە ئەوەندە كورسییەكە لێیان بێزارە و تاقەتی ئەوەی نەماوە چیتر بۆدانیشتن دەست بدات ، من تێناگەم ئەو مرۆڤانە چۆن لە خۆیان ڕازی دەبن دوایی مانەوەیان بۆ چەندین ساڵ لە سەر كورسی دەسەڵات ، ئەگەر بەرپرسیاریەتیەكەیان كەمیش بێت لەرووی كارگێریەوە ، كەچی نەبایان پێدادێت نە باران ، وادەزانن جگە لەوان كەسی تر نییە بێت لەسەر ئەم كورسیە دابنیشێت و خزمەت بكات ، بەشێك لەبەرپرسانمان خەریكە وەك ماسی بۆگەن دەبن لە سەر كورسییەكانیان، تخوا گۆرینیان باشترنییە لەوەی كە هیچی نەماوە بۆخزمەتكردن چەندین ساڵە ئەوەی لە خەیاڵ و هەگبەی بوو پێشكەشی كردووە ،گۆرانكاری لە ژیان زۆر گرنگە هەم بۆ مرۆڤەكان هەمیش بۆكار، بۆ ئەوەی بەرنامەو بیرۆكەی  كەسی تازە جێ دەستیان دیار بێت لەم بوارە ، كاتێك بەرهەمی گۆرانكاری دەبینین ئەوكات دەزانین چەند گرنگە گرنگی بە گۆرانكاری بدەین، لە زۆر شوێن و داموودەزگا لە دوای گۆرانكاری لە كەسی یەكەم دەبینین كاروانی كارو خزمەتگوزاری دەستی پێكردوە ، بەهەمان برە پارەو میزانییەی كە پێشتر هەبووە بگرە هیچیشی بۆ زیاد نەكراوە، بەڵام لە بەر ئەوەی كەسەكە تازەیەو دەزانێت كورسی بۆخزمەتكردنە نەك مەبەستێكی تر ،  بۆیە شەو رۆژ دەخاتە سەریەك بۆ ئەوەی گەشەی زیاتر بەكارەكانی بدات ، دەكرێت كەسانێك هەبن بڵێن هەمووكەسێك كە بۆ یەكەم جار لە كارێك دەست بەكار دەبێت بۆ ئەوەی ناوی بە باشە بڕوات هەندێ‌ كار دەكات و دواتر سارد دەبێتەوە ، دەخوازم ئەم جۆرە مرۆڤانە لەو كەسانە نەبن هەم بۆ كارو خزمەت هەمیش خۆ تووند گرتن بە كورسییەوە ، گەرنا دواتر ئەم كورسییە كەسەكان زۆر ناشیرین دەكات و رووی ئەوەیان نابێت بێنە ناو كۆمەڵگە، دواجار دەكەونە سەر زەنشتكردنی كورسییەكان لە جیاتی خۆیان ،چەند گرنگ دەبێت لە كوردستان كار بەوە بكرێت كە هەركەسێك ئەركو بەرپرسیارەتی وەرگرت لە چوار ساڵ زیاتر نەبێت، ئەگەر كەسەكە هەڵسەنگاندنی بۆكراو پەسەندكرا لە باشی و خراپی با هەوڵبدرێت بەر لەوەی ئەو چوار ساڵە تەواو بكات ،ئەگەر وەك پێویست نەبوو بگۆردرێت و كەسی شیاوتر بێتە شوێنی ، ئەگەر كەسەكەش بووە جێگای ڕەزامەندی خەڵك و توانی بە شێوەێكی باش خزمەت بكات با بۆی درێژ بكرێتەوە بۆ ماوەێكی تر، بەڵام نەبێت بەچەندین ساڵ دواتر خۆی لە خۆی و كورسییەكەش لەو بێزار بێت ، دەخوازم ئەمە لای ئێمە ببێتە كلتور بەرپرسەكان گەرسەركەوتوو نەبوون، خۆیان داوای گۆرانكاری بكەن نەك ببنە بەڵا بۆكورسییەكان و بە نەزانی خۆیان بەردەوام بن ، بۆیە گرنگە مرۆڤەكان كاتێك دەچنە سەر كورسی بالەخەمی بەرژەوەندی گشتی كاربكەن ، كورسی بۆخزمەت بەكاربهێنن نەك كورسی ئەوان خزمەت بكات و دەست بەرداریشی نەبن ،ئەوەی ئێستا بەدی دەكرێت خەڵك ئەوەندەی چاوی لە كورسیە جۆراو جۆرەكان ، وەك كورسی پەرلەمانتاری وەزیری و پلە باڵاكان بۆ وەدەست هێنانی پارەو ناو بانگ و خانەنشین بوونەكەیەتی بە مووچەێكی بەرز نەك ئەوەندە بۆخزمەت و كاری باش .

كوردەواری خۆشمان دەڵێت "( كورسی بۆكەس تاسەر ماڵ نییە ) جا كەوابێ‌ كورسی مەكە بە ماڵی خۆت چونكە ئەمرۆ تۆیت بەیانی كەسێكی تر دێت لەسەری دادەنیشت، ئەوەی بۆتۆ دەمێنێتەوە خزمەتكردنە لەرێگای ئەم كورسیەوە نەوك ئەوەندە لەسەری بمێنەوە دواتر كە ئێوە جێی نەهێڵن ئەو لە ژێرتان بڕوات .