Share on facebook
لە سمیلان 14 پڕۆژەی ئاو بە هۆی لافاوەوە پەكیان كەوتووە
دووشەممە, 06 ئاب 2018 08:15

یونس ئەمین _ سمیلان :

لە 8 ی ئایاری ئەم ساڵ بە هۆی لافاوێكی بەهێز كە شارەدێی سمیلانی گرتەوە بوە هۆی پەكخستنی 14 پڕۆژەی ئاو، نزیكەی 11 گوندی بێ سەرچاوەی ئاو كرد لە شارەدێی سمیلان، هەریەك لە سەنتەری سمیلان  گوندەكانی ،برایەتی ، ماوان ، شیوێ ماوان، دارەگرد، مامەخەتیب، چۆمانی سمایل ئاغا، درێشكە، بن قەڵات ، پیرئۆمەر، ئاشیبێكۆر، گرتك، روست، زۆرترین زیانیان بەركەوت ،دوای تێپەر بوونی سێ مانگ لەم كارەساتە سروشتییە تاوەكو ئێستا هەندێك لەو پڕۆژانەی  ئاو نۆژەننەكراینەوە و پەكیان كەوتوە، هاووڵاتیانی ئەم سنورە دەخوازن بەزووترین كات گرفتی ئاویان بۆ چارەسەر بكرێت.

لەسەرەتادا ڕزگار حوسێن دانیشتووی گوندی برایەتی بۆ زاری كرمانجی گووتی: نزیكەی سێ مانگ دەبێت كە لافاوێكی بەهێز سنوری سمیلانی گرتەوە بەمەش بووە هۆی پەكخستنی پڕۆژە ئاوییەكان، بە تایبەت ئاوی خواردنەوە كە تاوەكو ئێستا ئێمە ئاومان بە تانكەر بۆ دابین كراوە، هێنانی ئاو لە سۆران بە تانكەر زۆر ئەستەم و ناخۆشە زۆر جار بێ ئاو دەبین یان تانكەرێك فریای هەموو ماڵێك ناكەوێت، ئەگەر لە بەر تەنكەری ئاو نەبێت گوندەكەمان بێ ئاو دەبێت، چونكە پڕۆژەی ئاومان پەكی كەوتووە و وەك پێویست ئاو ناێت بۆ گوندەكەمان.

شادیە ئەحمەد رەسوڵ كە لە دەم ڕووبار خەریكی سۆندەی ئاو بوو بۆ زاری كرمانجی هاتە ئاخاوتن و گووتی : لە راستی ژیان بێ ئاو ناكرێت زۆر ئەستەم و گرانە لە ئێستادا وەرزی هاوینە زۆر گەرمە پێویستمان بە ئاوە بۆ ماڵ شوشتن و پاككردنەوەی ناو ماڵ بۆ موبەریدە بۆ خۆ شوشتن،زیاتر لە هەموو وەرزێك پێویستیمان بە ئاوە بە تایبەت ئاوی ماڵان كە زۆر پێویستە" ئەمەیە ئاوی ڕووبار دەكێشم بۆ ماڵ هەر چەندە پیسە و تەندروست نیە ، بەڵام ناچارییە تانكەریش هەندێك ڕۆژ دێت هەندێك ڕۆژ ئاوی پێنامێنێت یان ئاوێكی كەمت پێدەدات كە بە شی پێداویستی ڕۆژانە ناكات،

شادیە ئەحمەد گووتیشی " داواكارم لە حكومەتی هەرێم لە یەكەی ئیداری سنوری باڵەكایەتی ئەم كێشەیەمان بۆ چارەسەر بكەن ، بەراستی زۆر پێزار بووینە لە دەستی بێ ئاوی، دەخوازم ئاورێك لە سنوری سمیلان بدەنەوە، چونكە ئەگەر بێت و ئەم بێ ئاویە بەردەوام بێت ئەگەری چۆڵ بوونی سنورەكە هەیە، ژیان و گوزەرانیش بێ ئاو ناكرێت ئاو وەكو هیچ پێداویستێكی تر نیە.

سولێمان حمەد ئەمین دانیشتوی گوندی شیوێ ماوان بۆ زاری كرمانجی لەسەر ئەم بابەتە دەڵێت : سمیلان خۆی كێشەی ئاوی هەبوو لە گەڵ ئەم لافاوەش هەر بە جارێ بێ ئاوو و بووەبە قەیرانی ئاو لەم سنورە، دەبوایە حكومەتی هەرێم هەر زوو ئەم كێشەیەی چارەسەر كردبا ، لە وەتەی مانگی ئایارەوە زۆرێك لە گوندەكان بێ ئاون لە ناچاری ئاوی ڕووبار و ئاوی بیرەكان بۆ خواردنەوە بە كار دەهێَنن" بەراستی لە وەرزی هاوین بێ ئاوی زۆر ناخۆشە، زۆرێك لە خەڵك لە سەر گیرفانی خۆیان سەرچاوە ئاوویەكانی ئاودێری ڕەزو باخەكانیان هێنایتەوە، ئەگەر پڕۆژەی ئاویش لەم سنورە چاككرابێتەوە  زۆر كەمەو وەك پێویست  نیە.

سەبارەت بە كێشەی ئاو لەم سنورە رووی پرسیارمان ئاراستەی بەرێوەبەری فەرمانگەی ئاوی سمیلان  سلاح روستایی كرد  ناو براو بە زاری كرمانجی ڕاگەیاند" بە هۆی ئەم لافاوەی كە لە ئایاری ئەم ساڵ سنوری سمیلانی گرتەوە، بووە هۆی تێك چوونی 14 سەرچاوەی چاو  زیاتر لە 11 گوندی بێ ئاو كرد، بەڵام خۆشبەختانە لە لایەن بەرێوەبەراتی ئاوی دەوروبەری هەولێر 57 ملێۆن دینار بۆ نۆژەنكردنەوەو چاككردنەوەی پڕۆژە ئاویەكانی ئەم سنورە دەرچوو كە بەر زیانی لافاو كەوتوون، هەر لە ڕۆژی لافاوەكە تاوەكو ئێستا ئێمە وەك فەرمانگەی ئاوی سمیلان بە تانكەر ئاومان بۆ هاووڵاتیان دابین كردوە.

بەرێوەبەری فەرمانگەی ئاوی سمیلان ئەوەشی باسكرد" لە ئێستادا هەندێك سەرچاوە لە قۆناغی كۆتاین، وەك ئاوی درێشكە ، پیرئۆمەر ، بنقەڵات ، برایەتی، ئەوەی زۆر زیانی پێكەوتوبێت سەرچاوەی ئاوی سەنتەری سمیلان و بنقەڵاتە كە سەرچاوەی ئاوەكەیان خەزانە لە ناو ڕووبار بوون، لافاو هەمووی بردوە و زیاتر لە 300 مەتر لە بۆریەكانی سەرووچاوە، خەڵك مافی خۆیەتی داوای ئاو بكات وەرزی هاوینە و گەرمایە خەڵك زۆر ئاو بە كار دەهێنێت، بەڵام لێرەوەو لەرێگای زاری كرمانجییەوە  دڵنیایان دەكەمەوە لە ماوەێكی نزیك كێشەی ئاو لە سمیلان  نامێنێت، ئێمەش هەر ئەوەندەمان لە توانادایە ، بە جارێ فریای هەموو پڕۆژەكان ناكەوین" ئەم بڕە پارەیە كە لە لایەن ئاوی دەوروبەری هەولێر دەرچووە بە هاوبەشی لە گەڵ فەرمانگەی ئاوی سمیلان بۆ نۆژەنكردنەوەی ئەو سەرچاوانە كە زیانیان پێكەوتوە خەرج دەكرێت، منیش وەك بەرێوەبەری فەرمانگەی ئاوی سمیلان ئەندامم لەم لێژنەیە.