Share on facebook
سەیارەی مۆدێل ٢٠١٨ و عەقلیەتی ١٩٩٢
دووشەممە, 10 ئەیلول 2018 07:43



ئەمجەت باڵەكی

هەركاتێك بمانەوێت لە ماڵەوە بە ئۆتۆمبێل دەربچین یان پیاسەیەكی ناو شار بكەین دەبێت كۆمەڵێك شتی سەیر و سەمەرە و نامۆ بێنینە بەرچاومان كە رەنگە لە رێگادا رووبەرویان ببینەوە. بەشی زۆری ئەو رووداو و كارەساتانەی كە لەم ولاتە روودەدەن بۆ نەبوونی رۆشنبیری هاتووچۆ و رەچاونەكردنی رێنماییەكانیەتی.

ئەگەر سەیری ئاماری رووداوەكانی هاتووچۆ بكەین دەبینین لە ئاستێكی یەكجار مەترسیدار دایە، رۆژ نیە گوێبیستی مەرگی هاونیشتیمانیانمان نەبین، ئەگەر بەراوردی ولاتانی دەورووبەر و ولاتانی رۆژئاوایی بكەین دەزانین كە لەرووی هاتووچۆوە چەندە دواكەوتووین. بێگوومان خراپی رێگاوبانەكانی كوردستان هۆكارێكن بۆ ئەو رووداوانەی كە روودەدەن بەلام من پێموایە هۆكاری یەكەمی ئەو روداوانە بۆ كەمی رۆشنبیری و كەمتەرخەمی شوفێران دەگەرێتەوە، چونكە ئێستاشی لەگەل بێت كە بەرەو كۆتایی ٢٠١٨ دەرۆین، شوفێرانمان هەر بە عەقلیەتی ١٩٩٢ ئۆتۆمبێل لێدەخورن. زۆربەی شوفێران رەچاوی رێنماییەكانی هاتووچۆ و شێوازی وەستان و لادانی ئۆتۆمبێل و رێژەی خێراییەكەی ناكەن، لەم هەرێمە هەرچەند شوفێرێكی وریا و پابەند بیت دوورنیە لەهەر ئانوساتێكدا توشی روداوێكی نەخوازراو ببیەوە، ئەو شوفێرەی لە دواوەت یان لە پێش و تەنیشتەكانتەوە دەروا مەرگ بكاتە میوانت. بەگشتی شوفێرانمان لە پێشبركێن و هەموویان دەیانەوێت زووبگەن. لەكاتێك دا ئەوەندە رۆشنبیریمان لاوازە لەسەر فوول لاییتێك یان بەپێشكەوتنەوەیەك شەری بنەمالە و خێل دروست دەبێت و مرۆڤەكان دەبنە قوربان .

بە گشتی ئەوەی لە رێگاكان و لەنێو شوفێران دەگوزەرێت پێویستی بە ریفۆرمێك هەیە كە ولات لەو تەنگەژە و نا رۆشنبیریە رزگار بكات ناكرێت سالانە هەزاران هاونیشتیمانی ببنە قوربانی هاتووچۆ. بێگومان حكومەت لەم نێوەندەدا لە باش و خراپی بەشی خۆی بەردەكەوێت هەرچەندە من رۆشنبیری تاك بە چارەسەر دەزانم كە پێویستە كاری لەسەر بكرێت، بە رێكخستنی كۆر و سمینار و بلاوكراوە بۆ ئەوەی رۆشنبیری شوفێران بەرز بكرێتەوە. وە ئەركی حكومەتە كە پێداچوونەوەیەك بە پێدانی مۆلەتی شۆفێری بكات، چونكە مەرجەكانی وەرگرتنی مۆلەت لە ئاستێكی زۆر نزم دان. رەنگە لەرووی پراكتیكەوە بە هەندێك فلتەردا تێبپەرن، بەلام لەرووی زانیاری و هۆشیاری شۆفێری یەكجار كەمتەرخەمی دەكرێت. بۆیە ناكرێت هەموو كەسێك وا بە ئاسانی بتوانێت مۆلەتی لێخورین وەربگرێت. لە لایەكی تر پێویستە زیاتر كار لەسەر سزاكان بكرێن، سزاكانی هاتووچۆ زیاتر و توندتر بكرێن، ئەوكەسانەی كەمتەرخەمن و كارەسات دەخولقێنن روبەرووی سزای زۆر توند ببنەوە و تەنها بە پێبژاردنی برێك پارە نەبەخشرێن.

هەرچەندە كوردستان رۆژ بەرۆژ لە بەرەو پێشچوونە بەلام دەكرێ هەنگاوەكانی پێشكەووتن خێراتر بكرێن بۆئەوەی زووتر بە ئامانج بگەین، بێگوومان پێش هاوێشتنی هەر هەنگاوێكیش پێویستە هووشیاریمان لەو بوارە پەرەپێبدەین و بگەینینە لوتكە، هەموو پشكەووتنێك لە هەنگاوی یەكەم دەستپێدەكات بۆیە پێویستە وەزارەتی پەروەردە هووشیاری هاتووچۆ تێكەل بە پرۆگرامەكانی خوێندن بكات بۆئەوەی هەر لە مندالیەوە رۆشنبیری هاتووچۆمان بەرزبكەینەوە و بناغەیەكی تەندروست دروست بكەین وە رۆلی رێكخراوەكانی مەدەنی و چالاكوانان و بەرێوەبەرایەتیەكانی هاتووچۆیە كار لەسەر ئەو هووشیاریە بكەن و چالاكی و كۆر و خول بۆ شوفێران بكەنەوەو كەنالەكانی نێوخۆیی لەبری دراما بێكەلكەكان كار لەسەر ئەو بوارانە بكەنەوە بۆئەوی گیانی هاونیشتیمانیانمان بپارێزین و داهاتوو بۆ كوردستانێكی ئاوەدان بنیات بنێن.