شێخو شێر ئێدلبی پیاوك لە پۆڵا بە هێزتر
چوار شەممە, 12 ئەیلول 2018 08:20



بەرەڤان شاكر سلێمان لاچ – سۆران.


وەك هەڵویەكی باڵ شكاو لە پەنجەرەی ژورەكەیدا سەیری باڵا بەرزەكەی چیای زۆزكی دەكرد، ئەو چیایەی رۆژانێك هێلانەی ئەو هەڵویە باڵ شكاوە  بووە ، بە دەیان بیرەوەری لەو چیایەدا لای گەڵالەبوون. لە سیمادا شێخو شێر پیاوێكی ٩٠ ساڵانی دەست بڕاو و ڕوخسارێكی چیایی دەنگێكی بەرز تاخمێك جلوبەرگی كوردی ئەو باڵا بەرزیەی مام شێخوی داپۆشیوە، باڵا بەرزەكای مام شێخو پڕە لە شوێنەواری برینداربوونی، پڕە لە چیرۆك، شێخو شێر ئێدلبیی ئەو پێشمەرگەیەی نزیكەی ٦٠ ساڵە لە خەباتكردن بەردەوامە، بە رۆح و گیان خۆی فیدای نیشتیمان كردووە، مام شێخو لە بەهاری ساڵی ١٩٣٢ لە گوندی ئێدلبیی سەر بە دەڤەری بارزان لە دایك بووە .

بەو پێیەی باوكی پێشمەرگەی شێخ ئەحمەد بارزانی بووە، شێخو شێر لەگەڵ بنەماڵەكەی تەمەنی منداڵی خۆی لە ئاوەرەی و دەربەدەری بەرێ كردووە، دوای دەست پێكردنی شوڕشی ئەیلول لە ساڵی ١٩٦١ مام شێخو چەكی شەڕەف لە شان دەكات و بڕیاری بوون بە پێشمەرگە  دەدات، لەگەڵ كاروانی ئازادی خوازانی كوردستان هەنگاو بەرەو دەڤەری بادینان دەهاوێژێت.

داستانی چیای پیرس یەكەم شەڕ بووە شێخو شێر بەشدار بووە تێیدا،  ئەو داستانەی مێژوو شاهیدی بۆ ئازای و چاونەترسی پێشمەرگە دەدات، شێخو شێر ئاوا باس لە داستانی پیرس دەكات و دەڵێت" بەرە بەیان بوو فەیلەقی ٥ی سەربازی عێراقی  بە تەواوی چەك و جبەخانەكانیەوە لە دوو لاوە دەستی بە هێرشكردن كرد، هەر بۆیە ئێمە دابەشكراین بەسەر ئەو دوو ئاراستەیەی شەڕ، بۆ من كە دەستپێكی بوون بە پێشمەرگایەتیم بووبۆ من  جێی سەرەنج بوو، كە هەرچەند ژمارەی پێشمەرگە نزیەكی١٠٠ پێشمەرگە دەبوو، ژمارەی ئێمە بە بەراورد لە گەڵ  سەربازە عێراقیەكان زۆر كەمتر بوو، بەڵام دەمبینی قارەمانەكان چوون دەجەنگان، دەنگی بڕنۆی پێشمەرگە دوڵ و نەهالی پڕ كردبوو، سەربازە عێراقیەكان بەرگەیان نەگرت تا نیوەرو ژمارەیەكی زۆری سەربازمان كوشت و هەندێكیان هەڵاتن و چەكی خۆیان لە مەیدانی جەنگ بە جێ هێشت، وەك هەردەم پێشمەرگە بە تەنها و بێ بەرامبەر لە مەیدانی شەڕدا مایەوە، ورە و وزەی پێشمەرگە ئەوەندە زۆر بوو هیچ هێزێك توانای سەركەوتنی بەسەر پێشمەرگەدا نەبوو''.

مام شێخو بە هەڵكێشانی هەناسیەكی قوڵ گووتی '' ئێمە لەو داستانەدا ٧ شەهیدمان هەبوو، لەگەڵ هەندێك بریندار، بارزانی نەمر فەرمانی كرد بریندارەكان بگەینە لای نەخۆشخانەكانی شوڕش و شەهیدەكان بە خاك بسپێرن و خۆتان رێك بێخەنەوە، بە دەم ناشتنی ئەو شەهیدانەماندا پیاوێكی سوار چاك و لەسەر خوو باڵا مام ناوەند و هەروەك لە روخساریەوە دیاربوو بە جەرگ بوو بە خۆی و كۆمەڵێك پێشمەرگە  گەیشتە لامان، ئەو بارزانی نەمر بوو، من یەكەم جارم بوو بارزانی ببینم بۆ من و تەواوی پێشمەرگەكان هاتنی بارزانی نەمر و دەست خۆشیەكەی لە هەمبەر ئەو خوڕاگریە گەورەیەدا بۆ ئێمە جێگای دڵخوشی بوو، ورە و وزەیەكی تر بوو بۆ ئێمە''.

ئەو بە دەم قەسەكردندا دارجگارەیەكی  لە دەستدا بوو ،جگارەكەی دەكێشا وگووتی'' ماوەیەك لە دەڤەری بادینان مامەوە دواتر لەسەر فەرمانی بارزانی نەمر گوازرامەوە بۆ دەڤەری مزوری باڵا و كرام بە بەرپرسی ‌‌هێزێك كە بارزانی خۆی ناوی نابوو هێزی تۆفان، لەگەڵ مندا ٨ كوڕ و نزیەكەی ٤٠ برا و برازای خوم لەگەڵم بوون،رۆژێك بارزانی داوای كرد بچمە خزمەتی، بە خزمەتی گەیشتم و ووتی شێخو ‌هێزەكەی خوت ببە پشت گوندی هویپەی لەوێ هێزێكی زۆری سەربازی دێت نامەوێت بچنە ناو گوند، منیش فەرمانەكەم وەرگرت لەگەڵ دوو چەكی جۆری دۆشكە لە بەرزای پشتی هویپەی دووشكەكەمان دانا و خۆمان دابەشكرد بەسەر دوو گروپدا، هەندێك پێشمەرگە لە بەرزای دەمانەوە و بە دۆشكە و هاوەن قەسفی دوژمنیان دەكرد، وە هەندێك پێشمەرگەی تر دەچوونە نزیك دووژمن و چاوەرێی كاتژمێری سفریان دەكرد، من خۆم لەسەر دوشكەی ١٤ ملیم بووم دوژمن بە چوار فەوجی سەربازی خەریكی خو ئامادەكردن بوون بۆ ناو گوند بەڵام بەر لە بەڕێكەوتنیان بە هاوەن و دوشكە هێرشمان كردە سەر دوژمن، تاكو گروپی دووەم بە تەواوی گەیشتە ناو دوژمن، سەربازە عێراقیەكان توانای خۆ راگرتنیان نەبوو، بۆ ئەوان جێی سەرسورمان بوو چونكە پێشتر پێشمەرگە لەو بەرزایە نەبوون بەڵام گورزێكی زۆر گەورەمان لە دوژمن دا، من ئەوەندە گوللە دۆشكەم تەقاندن خوێن لە گوێچكەم دەهات و فیشەكێك بەر دەستم كەوت و كورێكم بە ناوی سەردار بریندار بوو، بە فەرمانی بارزانی نەمر دەبوایە بە زوترین كات سەرداری كورم ببەینە وڵاتی ئێران بۆ چارەسەری، هەر بۆیە لە دەڤەری بارزانەوە تاكو شاری ڕەزاییەی ڕۆژهەڵاتی كوردستان بە دارەبەست و چیا بە چیا ڕۆیشتین، لەسەر ڕاسپاردەی بارزانی بردمانە نەخۆشخانەی ڕەزایە و دوای چارەسەركردنی، شوكر سەردار تەندروستی باش بوو و دوای ماوەیەك گەڕاینەوە، بارزانی نەمر لە هەمبەر ئەو شەڕەی هویپەی دەست خوشی لێ كردم و بە خەنجەرێك و ١٢ پاكیت فیشەك و بڕنۆیەك و دەستێك جلی كوردی خەڵاتی كردم، ئەو خەڵاتەی بارزانی بۆ من جێ شەڕەف بوو''.

شێخو شێر هەرچەند وەك فەرماندەیەكی پێشمەرگە جەختی لەسەر ئەوە دەكردەوە كەوا بۆ یەك جاریش سەنگەرم چوڵ نەكردووە و چۆكم لە بەرامبەر دووژمن دانەداوە، ئەمەش لە بارزانی فێر بووم، هەروەك سەردار كوری گەورەی مام شێخو دەڵێت'' باوكم بۆ ئێمە قوتابخانەیەك بووە هەردەم وا پەروەردەی كردووین خوراگر بین و چۆك لە بەردەم دووژمندا نەدەین و خەبات لە پێناو پاراستنی كوردستان بكەین، خومان فیدای كوردستان بكەین، من تەمەنم ١٤ ساڵ بوو باوكم منی ناردە خزمەت بارزانی نەمر بۆ ئەوەی ببم بە پێشمەرگە، بارزانی نەمر وتی هەرچەند تەمەنت بچوكە بەڵام لەسەر راسپاردەی باوكت ئەوا شەڕەفی پێشمەرگە بوونت پێ دەسپێرم'' كورێكی شێخو شێر بە ناوی كاوە شێخو لە بەهاری ساڵی ١٩٩٤ شەهید دەكرێت و ئەمەش كاریگەری راستەوخۆی لەسەر تەندروستی شێخو دەكات بەو پێیەی شەهید كاوە زۆر لە باوكی نزیك بووە و پێشمەرگەیەكی قاڕەمان و چاونەترس بوویە.

لە بارەی خۆشترین و ناخۆشترین رۆژەكانی ژیانی پێشمەرگایەتی شێخو دەڵێت"لە تەواوی تەمەنی پێشمەرگایەتیمدا زۆر خۆشی و ناخۆشیم بینیوە، زۆر جار لە مردن نزیك بوویمە، بەڵام نسكوی شوڕش ئەو ڕووداوە بوو كەوا جگە لەوەی پیلانێكی نێودەوڵەتی بوو لە هەمبەر شۆرشی ئەیلول، بۆ من یەك لە ناخۆشترین ڕووداویی ژیانم بووە، هەر بە راستی خەمابری كردین و زۆری پێ نەچوو هەواڵی وەفاتی بارزانی نەمرمان پێ گەیشت، ئەو هەواڵەی توانای لە جەستەماندا نەهێشت، ناخ هەژێن بوو، من هەژدە جار بریندار بوویمە و كورێكم شەهید بووە بەڵام هیچ كامێك بۆ من وەك ئەو دوو ڕوداوە نەبووینە، بەڵام بارزانی نەمر وا پەروەردە كردووین لە تەنگانەترین رۆژەكانی ژیاندا خۆ ڕاگر بین و چوك دانەدەین، بەردەوامی بەو رێبازە پیرۆزە بدەین. خوشترین ڕوداوی ژیانم ئەو كاتە بوو كەوا سەرۆك بارزانی فەرمانی كرد خۆمان رێكبخەین و ئامادەكاری بكەین بۆ ڕاپەرینی سەرتاسەری، سەركەوتنی ڕاپەرین بۆ من بۆ بە هوكار تا تەواوی نەهامەتی و ناخوشیەكان لە یاد بكەم، چونكە ساڵانێكی زۆر بوو ئێمە بۆ ئەوە خەباتمان كرد، هەربوویەش لە ڕاپەریندا سەرۆك بارزانی چەندین ئەركی پێ سپاردم بە ئامانەتەوە ئەركەكانم بە جێ هێنا، بە هەمان وزە و توانای سەردەمی شوڕشی ئەیلول و گوڵان''.

لە پڕۆسەی رزگاری عێراق لە ساڵی ٢٠٠٣ لە ژێر دەستی رژێمی بەعس، شێخو شێر بە هەماهەنگی وەجی بارزانی بەشداری دەكات و چەندین بەرپرسیاریەتی پێی دەسپێردرێت، دوای هێرشی چەكدارانی داعش بۆ سەر سنورەكانی كوردستان لە ساڵی ٢٠١٤جارێكی تر  شێخو شێر دەچێتە بەرەكانی جەنگ و ئامادەی خۆی دەردەبڕێت بۆ بەشداری كردن لە پاراستنی دەسكەوتەكانی كوردستان.

لە بەرامبەر ئەو رەنج و ماندوبوونەی دا شێخو شێر لە لایەن سەرۆك بارزانیەوە خەڵاتی بارزانی نەمر پێ دەبەخشرێت، لە كۆتایدا مام شێخو شێر زۆر خۆشحاڵ بوو بەوەی كوردستان ئازادە و خەڵكی كوردستان بە ئازادی دەژیت، جەختیشی كردەوە  خودای گەورە پشت و پەنای كوردە و هەر سەردەكەوین هیوای تەمەن درێژی بۆ سەرۆك بارزانی خواست و دووپاتی كردەوە هەروەك فەرماندەیەكی پەكەوتوی پێشمەرگە و باوكی شەهیدێك لەو تەمەنەشدا هەر ئامادەیە بچێتە سەنگەرەكان و خۆی بكات بە قەڵغان بۆ پاراستنی دەسكەوتەكانی كوردستان و زۆر خۆشحاڵ بوو بەوەی بەرهەمی رەنج و ماندووبوون و شەهیدانی كوردستان ئێستا ئاوەدانی و ئازادی لێ بەرهەم هاتووە.