Share on facebook
شادان بەكر، بە روخسار و خەندەی سەر لێوانی سەرنجی بینەری پەلكێش كردوە
دووشەممە, 17 ئەیلول 2018 08:13

 

 

 

دیدار: جەلال سەعید

شادان بەكر ئەحمەد لە شاری سلێمانی چاوی بەدنیا هەڵهێناوە و قۆناغی سەرەتایی هەر لەوێ‌ خوێندوە، لە ساڵی 1996 هاتۆتە شاری هەولێر و قۆناغی ناوەندیشی لەشارۆچكەی پیرمام تەواو كردوە، ئێستا لە قۆناغی پەیمانگای وەرزشییە و خێزاندارە و خاوەن كورێكی خەنجیلانەیە بەناوی هێڤار، هەوڵی داوە هاوسەنگی لەنێوان كاری ماڵ و دەوامی دروست بكات بۆ ئەوەی مافی هەردوولا بدات.

شادان بەكر روخسارێكی جوان و قەشەنگ و شیرینی هەیە و حەزی بۆ وەرزش و بێژەری رووی لە كاری میدیای كردووە، كوردستان تی ڤی بۆتە بەدەرخستن و دۆزینەوەی خۆی و خۆشەویستی بۆ حەزەكانی،

پ- بۆ بوووی بە بێژەری وەرزشی؟

دەتوانم بلێم لەدەرفەتێكدا خۆم لەم بوارە بینیەوە، بیریشمان نەچێت وەرزش لایەنێكی سەرەكی و گرنگی ژیانی مرۆڤە

پ- حەز لە سەیركردنی وەرزش دەكەی و كام خولەكانی تۆپی پێی ئەوروپا سەیر دەكەی؟

بەگشتی چاودێری سەرجەم خولەكان دەكەم، چونكە ئەوە كاری ڕۆژانەیە ، بەڵام خولی ئیسپانی و ئینگلیزی جەماوەری زۆرترە لەكوردستان

پ- هاندەری كام یانە و هەڵبژاردەی؟

بەدیاریكراوی یانەیەك نیە، بەلام پێم خۆشە یانەكانی بارسەلۆنا و ریال مەدرید و مانچستەر یونایتد لەگەڵ هەڵبژاردەی ئەرژەنتین هەمیشە ئەنجامیان باش بێت

پ- هاوڕێیەتی كام رەگەزی مێ و نێر بەلاتەوە باشترە؟

ئەوەی بەلامەوە گرنگە هاورێی پاك و راستگۆ و جێی متمانە مەرج نیە جیاكاری بكرێت

پ- دەكرێت بزانین لە نێوان هاوڕێیەكانی نێر و مێ كامەت لە هەموویان خۆشتر دەوێت؟

هەمیشە رێز بۆ هەموویان دادەنیم بەتایبەت ئەوانەی كە زۆر دڵخۆشن بەهاورێیەتیم

پ- بێژەری بۆ تۆ چییەو چی پێ گەیاندی؟

كارێكی بەنرخ و بەهای تایبەتی خۆی هەیە ناوبانگ و كەسایەتیەكی پێ بەخشیوم

پ- حەز لە چ خواردن و خواردنەوەیەك دەكەی؟

لەخواردن دۆڵمە بێ ركابەرە ‌ لەگەڵ شەربەتی فرێش بەگشتی

پ- چ كەش و هەوایەكت پێ خۆشە؟

بێ گومان كەش و هەوای بەهار بەپلەی یەكەم دواتر زستان

پ- ئەگەر سەرپشكت بكەن لە نێوان هاوڕێیەكانی كچ و كور كامەیان هەڵدەبژێری؟

هەموویان بۆمن جێی شانازین جیاوازی ناكەم

پ- هۆكار چییە شرین و جوان دەر دەكەوی؟

رەنگە ئەوە كاری خوا بێت ئێمە دروستكراوی ئەوین، لەهەمووی گرنگتر مرۆڤ ناخی پاك بێت

پ- هەمیشە دەم بەخەندەو پێكەینینی؟

مرۆڤ دەبێ ئومێدی بەداهاتوو هەبێت و هەمیشە ببێتە كەسێكی رووخۆش لەگەڵ دەوروبەری

پ- جگە لە كاری راگەیاندن حەز لە چ كارێك دەكەی؟

كاری مۆدە چونكە شارەزایی باشم لەم بوارە هەیە و زۆریش دڵم بەستایلی نوێ و جوان دەكرێتەوە

پ- راگەیاندن چی پێ بەخشیوی؟ یان كێشەی بۆ دروست نەكردووی؟

كاری راگەیاندن بەرپرسیاریەتیە ، بۆیە دەبێ هەمیشە بەوریایەوە كار بكەی لەپێناو گەیاندنی زانیاری دروست و پر مانا بەتایبەت لەو بوارەی كە من هەڵمبژاردوە كە بواری وەرزشە، سەبارەت بە كێشە بێگومان ئافرەتی راگەیاندكار بەگشتی دووچاری كێشە دەبێت، چونكە مەرج نیە هەموو مرۆڤەكان وەك یەك بیر بكەنەوە، هەروەها ناتوانیت وەك كەسێكی ئاسایی هەڵسوكەوت بكەین چونكە هەمیشە چاوێكت لەسەرە.

پ- هیوا و ئاواتی داهاتووت چییە؟

سەربەخۆیی كوردستان بەدیهێنانی سەقامگیری و خۆش گوزەرانی بۆ سەرتاپای كوردستان

پ- شتێكی خۆشی ژیانی خۆتم بۆ بگێرەوە وەك بەسەر هات؟

لە كاری راگەیاندن رەنگە زوو زوو یادگاری دروست ببێت، بەلام ئەوەی هەمیشە لە یادم دەمێنێتەوە ڕۆژێ لەنێو ستۆدیۆ دووپشكێك كەوتە بەردەمم.