Share on facebook
بەڕێوەبەری ناحیەی شێروان مەزن : دەروازەی زێتێ لە نێوان هەرێمی كوردستان و توركیا دەكرێتەوە
یەک شەممە, 07 تشرینی یەکەم 2018 18:48


چاوپێكەوتن- ڕائیب شێروانی
كۆڤان ڕەشید، بەڕێوەبەری ناحیەی شێروان مەزن لە چاوپێكەوتنێكدا لەگەڵ هەفتەنامەی زاری كرمانجی دیاركرد، زێتێ، وەك یەكەمین دەروازەی سنووری هەولێر لەگەڵ توركیا دەكرێتەوە و هەوڵدەدەین پێش هاتنی وەرزی زستان ڕێگاكە تەواو بكەین، بۆ ئەوەی جموجۆڵی گەشتیاری و بازرگانی لەو سنوورە دەست پێ بكات. لەگەڵ ئەوەی چەندین پرۆژەی خزمەتگوزاری لە سنووری ناحیەكەمان جێبەجێ دەكرێن.
دەروازەی سنووری زێتێ لەنێوان هەرێمی كوردستان و توركیا دەكەوێتە سنووری قەزای مێرگەسۆر و دووری 150كم باكووری رۆژهەڵاتی هەولێری پایتەخت، بەكردنەوەی ئەو دەروازە سنوورییە وێڕای فراوان بوونی ئاڵوگۆڕی بازرگانی و گەشتیاری نێوان هەردوولا، ئابووری دانیشتوانەكەی دەبوژێتەوەو ئاوەدانی زیاتریش روو لەناوچەكە دەكات.
كۆڤان ڕەشید، گوتی:" دەست بە دروستكردنی ڕێگاكە كراوە، ئێستا مەكائینێكی زۆر لەسەر ئەو ڕێگایە كار دەكەن، هەوڵدەدەین پەلەی لێ بكەین، بۆ ئەوەی پێش هاتنی بەفر و باران ئەو ڕێگایە تەواو بكەین و جموجۆڵی گەشتیاری و بازرگانی لەو سنوور دەست پێ بكات و خەڵك هاتووچۆ بكات، چونكە لە دیوی باكووری كوردستان، لە توركیا پێش ئێمە ئامادەكاریی كراوە، لە ساڵی 2014 كاتێك كە پارێزگاری هەولێر سەردانی باكووری كوردستانی كرد و لەگەڵ واڵی جۆلەمێرگ كۆبوویەوە، ئەو كاتەی پڕۆتۆكۆڵەكە ئیمزا كرا، ئەوان دەستیان بە دروستكردنی ڕێگاكە كردووە.
كۆڤان ڕەشید، بەڕێوەبەری ناحیەی شێروان مەزن گوتیشی:" ئەو سنوورە زۆر گرنگی خۆی هەیە، لە رووی كۆمەڵایەتییەوە، خەڵكی هەر دوو دیو خزمایەتیان لەگەڵ یەكدی هەیە، ئەگەر ئەو سنوورە بكرێتەوە ئەو كێشانەی كە لەو سنوورە هەن، كە هەتا ئێستا خەڵك زۆر بە زەحمەت هاتووچۆی دەكرد، لە هەموو خۆشی و ناخۆشییەكانی یەكدیدا نەیان دەتوانی بەشدار بن، بەڵام ئەگەر سنوورە بە فەرمی كرایەوە، ئەو كێشانە نامێنن و خەڵك زۆر بە ئاسانی دەتوانێت هاتووچۆ بكات، لە رووی سیاسی و ئاوەدانكردنەوە ئەو گوندانەی چۆڵكراون، وەكو زێتێ، هوپە، ئێدلبێ، هەتا بەنان و ئەرگۆش خەڵك دەتوانێت بگەڕێتەوە و جارێكی دیكە ئاوەدانی بۆ ئەو گوندانە بگەڕێتەوە، هەتا لە رووی بازرگانی و گەشتیاری زۆر گرنگی خۆی هەیە،  چونكە لە نێوان هەرێمی كوردستان و توركیا جموجۆڵی بازرگانی و گەشتیاری لە ڕێگەی ئەو سنوورە دەست پێ دەكات.
بەڕێوەبەری ناحیەی شێروان مەزن ئاماژەی بەوەش كرد:" هیوادارین پەكەكە نەبێتە ڕێگر لە كردنەوەی ئەو سنوورە، چونكە ئەو سنوورە لە بەرژەوەندی هەموو لایەكدایە، بەتایبەتی لە بەرژەوەندی هەرێمی كوردستاندایە، تۆپباران بەردەوامە، رۆژانە توركیا ناوچەكە تۆپباران دەكات، بەڵام بە كردنەوەی ئەو سنوورە ڕەنگە ئەو تۆپبارانە نەمێنێت، داواش لە پەكەكە دەكەین نەبێتە سەر ئێشە و كێشە بۆ خەڵكی كوردستان، بەتایبەتی خەڵكی ناوچەكە، بۆ ئەوەی خەڵكی ناوچەكە بگەڕێتەوە سەر گوند و ئاواییەكانی خۆیان و ئەو گوندانە ئاوەدان بكرێنەوە، لەگەڵ ئەوەی مەیدانی خەباتی ئەوان هەرێمی كوردستان نیە، بەڵكو باكووری كوردستانە.
كۆڤان ڕەشید، بەڕێوەبەری ناحیەی شێروان مەزن ئەوەشی گوت:" هەتا ئێستا دەست بە  پرۆژەكان نەكراوە، بەڵام زۆر پرۆژە لە سنووری ناحیەی شێروان مەزن دروست دەكرێن، زۆر لەو پرۆژانە، پرۆژەی ستراتیژینە، شەقامێكی 20 مەتری كە بە دەوری ناحیەی شێروان مەزندا دەسووڕێتەوە، 600 مەتر درێژە، هەروەها پرۆژەی قەڵاتۆك- بێخشاش دروست دەكرێت، ئەو پرۆژانە ئەگەر دروست بكرێن، خزمەتێكی زۆری هاووڵاتیان دەكەن، بەتایبەتی پرۆژەی دروستكردنی شەقامی قەلاتۆك- بێخشاش لە رووی ئیدارییەوە، گوندەكانی بێخشاش، بیێ، كانی بۆت و بێدیال بە ناحیەی شێروان دەبەستێتەوە، لەم رۆژانەدا كەشف بۆ رێگاكە دەكرێت و دەست بە دروستكردنی پرۆژەكە دەكرێت، لەگەڵ چەند پرۆژەیەكی دیكەی خزمەتگوزاری".