Share on facebook
دەگوندی سیدەكان داوای چاككردنی رێگای سەرەكیان دەكەن
سێ شەممە, 09 تشرینی یەکەم 2018 08:23

 

موڕشید برادۆستی – سیدەكان :

هاووڵاتییان و دانیشتووانی ژمارەیەك گوندی سیدەكان داوای چارەسەر كردنی رێگای سەرەكی گوندەكانییان دەكەن كە بەهۆی ئەو رێگایەەوە كێشەی زۆری هاتووچۆییان بۆ دروست بووە . بەڕێوەبەری ناحیەی سیدەكانیش دەڵێت " هەوڵی تەواومانداوە بۆ قیڕتاوكردنەوەی رێگاكە و دەرخەستەیەكمان ئامادەكردوە .

رێگای سەرەكی سۆران – كەژەك – سیدەكان بە درێژای 12 كیلۆمەتر لە دووڕییانی تاوكان تا دووڕییانی سریزبار  هەڵكەوتووە،  لەساڵی 1979 تا 1981 لەسەردەمی حكومەتی عێراق دروست كراوەو قیڕتاوكراوە .ڕێگای سەرەكی 10 گوندی دەڤەرەكەیە كە هەریەك لە گوندەكانی، تاوكان، پەنجاڕ، كەژەكی سەروو، كەژەكی خوارو، كانی باخان، بێزەفەران، هەوێڵان، هەڕین، سەرگرد، خۆڕاگر  لەخۆدەگرێت، جگە لەوەی كەڕێگایەكی سەرەكی هاتووچۆیە لەنێوان سۆران و سیدەكانیشە .

كەریم حەسەن موختاری گوندی كەژەك بە زاری كرمانجی گووت " ئێمە وەكو دانیشتوانی گوندی كەژەك و جوتیاران، لەبەر سەختی و تێك چوونی ڕێگاكەمان گواستنەوەی بەرهەمە كشتوكاڵەیەكانمان بۆ شار لێ بۆتە گرفتێكی زۆر گەورە، تەنانەت دەیان حاڵەتی ڕووداوی نەخوزراو نەخۆشی  هەبووە لەبەر سەختی ڕێگاكەو نەگەیشتنی ئۆتۆمبێل بەخێرای بۆ فریاكەوتنی سۆران و سیدەكان تووشی گیان لەدەست دان ‌و خراپترین حاڵەتی تەندروستی بوونەتەوە.

زیاتر گووتی " تەنانەت كرێی هاتووچۆی هاوڵاتیانیش زۆر زیاترە لەسۆران بۆ كەژەك لەوەی لەسۆران بۆ سیدەكان شوفێرەكان لە سەرنشینانی وەردەگرن بەشێوەك، كرێی گواستنەوەی هاوڵاتییان لە سۆران بۆ سیدەكان تەنها 5 هەزار دینارە. بەڵام لەسۆران بۆ كەژەك 7 هەزار بۆ 10 هەزارە لەكاتێكدا رێگاكەنزیكتریشە بەڵام بەهۆی خراپی رێگا شوفێران كرێی زیاتر وەردەگرن .

شایەنی باسە، گوندی كەژەك و دەورووبەری بەهۆی هەڵكەوتەی جوگرافییای، وەك  ناوچەیەكی گەشتیاری و دڵڕفێنی‌و پڕاوپڕ لە گژوگیای بەهاران ڕۆژانە بەتایبەت رۆژانی هەینی سەدان خەڵك ڕووی تێ دەكەن كەچی لەبەر ناخۆشی و تێك چوونی ڕێگاكە و تێك چوونی ئۆتۆمبێلەكانیان بەرەبەرە گەشتیاران كەم دەبنەوە .

بەهۆی نەبوونی قوتابخانەی ئامادەیی، قوتابیانی ئەو گوندە ناچارن بۆ بەردەوامی خوێندن روو لە سەنتەری ناحیەی سیدەكان بكەن، داماو عەبدولواحید دانیشتوو و قوتابیەكی گوندی كەژەكە ئەو لەگەڵ هاوپۆڵەكانی روو لە سیدەكان دەكات بۆ زاری كرمانجی گووتی " كەژەك نزیكەی كیلۆمەتر لە سیدەكان دوورە و  رێگاكەشی زۆر ناخۆشە، زۆر قوتابی تووشی دواكەوتنی لەوانەی یەكەمی بووەتەوە بەتایبەت لەزستانان. هەروەها بەهۆی ناخۆشی رێگاكە كرێی هاتووچۆی یەك قوتابی لەكەژەك بۆ سیدەكان 35 هەزار تا 45 هەزارە هۆكاری گرانی هاتووچۆ كردنیش تەنها خراپی رێگایە ئەگەرنا بەو شێوەیە دوور نییە، بۆیە داوا لە لایەنی پەیوەندی دار بەتایبەت بەڕێوەبەری ناحیە دەكەین هەوڵی تەواومان بۆ بدات بۆ چاككردن و نۆژەن كردنەوەی رێگاكەمان .

لەلای خۆشیەوە، ئیحسان چەلەبی بەڕێوەبەری ناحیەی سیدەكان لەبارەی چاككردن و نۆژەن كردنەوەی رێگای گوندەكانی كەژەك،  لە لێدوانێكیدا بە زاری كرمانجی راگەیاند " لە ماوەی دەست بەكار بوونم وەك بەڕێوەبەری ناحیە دووجار كەشف و دەرخەستەی تەواو بۆ ریگای كەژەك و ئەو گوندانە كراوە كە دەكەونە سەر رێگاكە و هەموو هەوڵێكمان داوە لە لەلایەن بەڕێوەبەرایەتی رێگا و بان و كەرتی چواری سۆران بەمەبەستی چارەسەر كردن و نۆژەن كردنەوەی رێگاكە .

زیاتر گووتی " ئەو رێگایە پێویستی بە دووبارە بە قیڕتاو كردنەوە هەیە چونكە كەلكی چاككردنەوەی نەماوە، بەپێی ئەو دەرخەستەی كە ئامادەكراوە رێگاكە بۆ قیڕتاو كردنەوەی پێویستی بە 130 قەڵابی قیڕ هەیە ئەمەش بڕە پارەیەكی پێویتسە كە تا ئێستا نەتوانراوە پارەكەی بۆ دابین بكرێت .

گووتیشی " وەكو بەڕێوەبەرایەتی ناحیە لە هەوڵی بەردەوام دەبین و ئومێدی زۆرمان هەیە رەزامەندی چاككردنی رێگاكە وەربگرین چونكە بار و دۆخی ئابووری كوردستان بەرەو باشتربوون دەچێت .