Share on facebook
لەرۆژی خاوەن پێداویستی تایبەتگرنگیدان بەقوتابی خاوەن پێداویستی تایبەت نەك بەزەیی
دووشەممە, 03 کانونی یەکەم 2018 06:49

 

 

ئاری ئاغۆك

لەنێو هەموو كۆمەڵگایەكدا مرۆڤی خاوەن پێداویستی تایبەت بەدی دەكرێت , بەڵام لە كۆمەڵگایەك بۆ كۆمەڵگایەكی تر جیاوازی هەیە , لە شوێنێك بۆ شوێنێكی تر جیاوازی هەیە ,  لەگەڵ هەموو جیاوازیەكان شوێنێك هەیە , جێگای بایەخ پێدانی زیاتر و بەردەوامی تاكەكانی كۆمەڵگایە  , جگە لە كەسی ئاسایی ئەوا مرۆڤی خاوەن پێداویستی تایبەتیش پێویستی بەو شوێنە هەیە لەپێناو بایەخی زیاتر  , ئەویش پێ ی دەڵێن قوتابخانە.

بێگومان قوتابخانە وەك مەڵبەندێكی گرنگ بۆ دروستكردنی كەسایەتی منداڵ و پەروەردەیەكی باش جێگای خۆشحاڵیە , لەنێو ئەم كەسە جۆراو جۆرەكانی نێو قوتابخانە , كەسانێك هەن , پێیان دەگوترێت خاوەن پێداویستی تایبەت ,  وەك قوتابی ئاسایی نین , بەڵكو بەشێك لەئەندامی جەستەیان نیە ,   یاخود حالەتی عەقڵی و بیركردنەوەیان كاڵترە لە كەسی ئاسایی , بەڵام  لەناوەندی خوێندن دا ئەوانیش مافی خوێندن و زانست و زانیاری و پەروەردەو فێركردنیان هەیە , رەنگە لە شوێنێك بۆ شوێنێكی تر جیاوازی هەبێت , بەڵام لە قوتابخانەدا هەمووان یەكسانن , نابێت هیچ جیاوازیەك بەدی بكرێ لەنێوان قوتابیەكی كەمئەندام و قوتابیەكی ئاسایی , چونكە وەك ئاماژەمان پێكرد , ئەركی  پەروەردەو فێركردنە , هەمووان وەك یەك (ماف و ئەركەكان) دەستنیشان بكات , نەك جیاوازی تاكەكەسی ! بۆیە لە رۆژی جیهانەی خاوەن پێداویستی تایبەت كە لە ٣- ١٢ ی هەموو ساڵێك وەزارەتی كاروباری كۆمەڵایەتی و وەزارەتی پەروەدەو رێكخراو وسەنتەرەكان , یادی ئەو رۆژە دەكەنەوە بە ووتار و مەراسیمی تایبەت , بەڵام ئەوەی گرنگە ئاماژەی پێ بكەین تا پەروەردەكاران و مامۆستایان هەڵوەستەی لەسەر بكەن , بریتیە لەبایەخدان و گرنگی پێدان بەو قوتابیە خاوەن پێداویستیە تایبەتیانەی كە لە ناوەندەكانی خوێندن دا  بەدی دەكرێن و لەتەك قوتابی ئاسایی وانە دەخوێنن , بەڵام ئەوەی زۆرگرنگە بریتیە لە خراپ لێكدانەوەی مامۆستاو كارگێری قوتابخانەو بەشێك لەقوتابیان  , بەرامبەر بە ژیانی قوتابی خاوەن پێداویستی تایبەت , كە بە چاوی سۆز و بەزەیی لێیان دەروانن ! لەكاتێكدا لوتكەی مرۆڤبوون بریتیە لە رێزگرتن و ویژدان و بایەخ پێدان و گرنگی پێدان وەك مرۆفێكی ئاسایی و قوتابیەكی ئاسایی نەك بەهۆی كەمئەندامی جەستەیی یا هەر هۆكارێكی تر بەزەییمان پێیاندابێتەوەو خوێندن و زانست و زانیاری و فێركردن هەمووی وەلاوەبنێین و بیكەینە قوربانی حالەتێكی جەستەیی ! نەخێر پێویستە لەناوەندی خوێندن دا وەك قوتابی ئاسایی مامەڵەیان لەگەڵ بكرێت نە فەرامۆشیان بكەین , نەهەوڵی خۆرازیكردنی خۆمانیان لێ بكەین ! بەڵكو ئەو توێژە گرنگەی كۆمەڵگا پێویستیان بەبەردەوانی هەیە , چونكە لە پرۆسەی پەروەردەدا نابێت بە چاوی كەمئەندامی و جەستەیی لە قوتابی بروانین , چەندین قوتابی هەبوە توانیویەتی خۆی دروست بكات و ببێتە ( پزیشك , پارێزەر , ئەندازیار , مامۆستا , فەرمانبەر ... هتد )  لەتەك ئەوەش دا قوتابی ئاسایی هەبوە لەگەڵ قوتابی خاوەن پێداویستی تایبەت لەیەك پۆڵ بوونە , هیچ كێشەیەكی عەقڵی و جەستەیی نەبوە , هیچ كەم و كوریەكی لە ژیان نەبوە , رەنگە باری ئابوری لە قوتابی تر زۆرباشتر بێت , بەڵام لەخوێندن سەركەوتوو نەبوەو لەیەكێك لە وێستگەكانی خوێندن وەستاوەو وازی لە خوێندن هێناوە , بەڵام قوتابی خاوەن پێداویستی تایبەت بەردەوامی هەبوەو توانیویەتی كەسایەتی خۆی و ژیانی ئایندەی دروستبكات , ئێستاش یەكێكن لە ناوە دیارەكانی بواری (زانستی و پزیشكی و ئەدەبی و هونەری و رۆشنبیری ) كەواتە پێویستە ساڵانە لەم رۆژەدا هەڵوەستەیەك لەسەر ئەم حالەتە بكەینەوەو ئێمەی پەروەردەكاریش هەمیشە بەو روانگەوە هەوڵی بایەخدان بەم توێژە گرنگەی كۆمەڵگا بدەین , نەك بە شێوەیەكی سادەو ساكار و مەراسیمی دوبارە و قسەی هەزاربارە ! نەخێر ئێمە دەمانەوێ لە شەقامی ژیان و پەروەردەو فێربووندا هەموومان وەك یەك بین , نەك سۆزو بەزەیی زاڵبێت بەسەر بیركرنەوەمان , چونكە لە نەخشەرێگای ژیانی تاكە كەسی خاوەن پێداویستی تایبەت , ٣ خاڵ هەیە دەبێت بەبایەخ و گرنگیەوە وەك ئەرك و ماف بۆیان دابین بكەین ئەوانیش بریتین لە ( چاودێریكردنی بەردەوامی تەندروستی , پرۆسەی پەروەردەو خوێندن , دامەزراندن .