Share on facebook
مرۆڤەكان لە چی ژیانیان پەشیمانن
دووشەممە, 03 کانونی یەکەم 2018 08:25



" لە هیچ كارێك پەشیمان نیم،

باش و خەراپ هەر دووكیان هۆكاری سەركەوتنم بوون ".


ئا/ حەلیمە عەلی

 

نەزیرا ئیدریس، قوتابییەكی زانكۆیە لە بەشی جیۆلۆجی نەوت، ئەو تەمەنی 20 ساڵە و نەچووتە ژیانی هاوسەرگیرییەوە، پێوایە زۆر شت لە رابردوو هاتوونەتە پێش و روویاندایەوە كە بە حەز و ویستی ئەو نەبوونە و ئێستا لێیان پەشیمانە. نەزیرا ئەم قسانەی لە نێو راپۆڕتێكی زاری كرمانجی كرد كە لە بارەی  (لە چی پەشیمانی) بوو. ئەو زیاتر گووتی " لە ژیانی خۆم لەهەموو شتێك پەشیمانم, لەبەر ئەوەی زۆر شت لە رابردوودا لەبەر بیركردنەوەی هەڵە رویدا ئێستا دەبنە ئاستەنگ لەژیانم".
پەشیمانی ئەو هەستەی مرۆڤە بە هۆی رازی نەبوون بەو كردارانەی لە رابردوو ئەنجامی داون، ئێستا بە هۆیانەوە هەستێكی تێكەڵ بە شەرم و دڵتەنگی و تاوانباری دەكات و هەموو دەم بیر لەوە دەكاتەوە كە خۆزگە ئەو كارەم نەكردبا.
پەشیمانی جگە لەوەی بۆ ئەنجام دانی كارێك هەست پێ ئەكرێ زۆر جار  ئەنجام نەدانی هەندێ كرداریش بە پەشیمانی هەژماردەكرێ، كە مرۆڤ بیر لەوە دەكاتەوە خۆزگە ئەوەم ئەنجام دابا، پەشیمانی هەستی تاوانباریش لە خۆ دەگرێت، بەڵام بە مانای گشتی تاوانباری جیاوازە, پەشیمانی جگە لەوەی هەستێكی نەخۆشە، بەڵام بە بەراورد لەگەل پەشیمانی هەستێكی بچووك و كاتییە.
زۆر جار مرۆڤەكان لە هەندێك هەڵسووكەوتی خۆیان پەشیمانن، هەندێكیشیان لە داوا كردنی كارێك لە كەسێك پەشیمانن، هەروەك ئەحمەد سالار، كە كوڕە گەنجێكی دانیشتووی شارۆچكەی خەلیفانە و نەچۆتە ژیانی هاوسەرییەوە گووتی " ئەو شتەی تا ئێستا لێی پەشیمان بم ئەوەیە كە داوای هاورێیەتیم لە كەسێك كرد كە نەدەبوو داوام لێ كردبا، چونكە ئەو كارەی من بۆی چووم بەرامبەرەكەم بە شتێكی دی لێكی دایەوە ".
شەرم كە هەستێكە بەهۆی كلتوور و تێروانین كۆمەڵگا دێتە ئاراوە، دەبێتە هۆی ئەوەی كەسێك لە رەفتارێكی پەشیمان بووبێت و ئێستا شەرم لە خۆی بكاتەوە، ئەمەش كاریگەری لە سەر  هاندان بۆ پەشیمانی دروست دەكات.
ئەلینا عیسا، تەمەن 35 ساڵە و مامۆستایە ئەو لەمبارەوە  گووتی " هەموو مرۆڤێك لە ژیانی زۆر هەڵە دەكات, زۆر جار بە خۆی دەڵێتەوە ئەگەر ژیانم بگەرێتەوە دوواوە ئەو كارە دووبارە ناكەمەوە".
زۆر جار مرۆڤەكان لە شێوازی هەڵسووكەوتكردن لەگەڵ كەسێك پەشیمانن، هەروەك  ئەلینا گووتی " كەسێك لە ژیانم بوو ئەگەر دووبارە بژیم دەڵێم با دیسان بێتەوە ناو ژیانم، بەڵام ئەوەی دووبارە ناكەم ئەوەیە كە ئەو جارە زۆر بەهێز دەبم و دەزانم چۆن رەفتاری لەگەڵ بكەم و چۆن پێی بڵێم بە خێرچی، واتا ئەوەی لێی پەشیمانم رەفتارم بوو لەگەڵ ئەو كەسە، ئەگەر ژیانم دووبارە بێتەوە هەرگیز ئەو رەفتارە هەڵەیە ناكەم, من ئێستا هەست دەكەم ئەوە گەورەترین هەڵەی من بوو و زۆرجار ناتوانم لە خۆم ببورم".
رەئوف كەمالیش كە كوڕە گەنجێكی تەمەن 25 ساڵە و كاری وێنەگری دەكات، دەڵێت لە تێكەڵ بوونم لەگەڵ هەندێك كەس پەشیمانم و گووتی " ئەو كەسانەی لەگەڵیان تێكەڵ بووم  و باش نەمناسین ئێستا پەشیمانم، چونكە ئەو كەسانە دوو روو بوون".
زۆر كەسیش لە لەدەستدانی ئەو ساتانە پەشیمانن كە دەیانتوانی سوودی زیاتری لێ ببینن و كاریگەری زیاتر لە ئێستای ژیانیان هەبێت، بە تایبەتی لە بواری خوێندنەوە، هەروەك رەیان یونس، تەمەنی 21 ساڵ كە دەرچووی پەیمانگای تەكنیكی سۆرانە، گووتی" پەشیمانم لەوەی كە لە پۆلی دوانزدە لە ئاست خوێندن كەمترخەم بووم، ئەمتوانی زیاتر بخوێنم بۆ ئەوەی لە شوێنێكی باشتر وەرگیرابام و پەشیمانم لەوەی كە زوو ئاشنای كتێب نەبووم، چونكە بەڕاستی دەركەوت كە باشترین هاورێی مرۆڤە".
هەندێك لە مرۆڤەكانیش لە هەست و رەفتارە سۆزدارییەكانیان پەشیمانن، وەك دلۆڤان حەسەن، گووتی" لە خۆشەویستی پەشیمانم لەبەر ئەوەی ژیانی منی وێران كرد، كاتێكی زۆری لێ بردم بەفكر كردنەوە لە كەسێك كەمنی لا گرنگ نەبوو لەبەر ئەوەی هەموو كارێكم كرد لە پێناوی بەس ئەو منەتی پێ نەبوو".
زۆر كەس دوای لەدەستدانی كەسێكی خۆشەویست لە رەفتارەكیان لە ئاستی پەشیمانن وەك، سیبەر ئەحمەد گووتی "من لەوە پەشیمانم كاتێ دایكم لە ژیاندا مابوو، زۆر رەخنەم لێی دەگرت و بە هیچ رازی نەدەبووم، ئەگەر ژیان دووبارە ببێتەوە قەت ئەو هەڵانە دووبارە ناكەمەوە".
هەندێك لە هاووڵاتییان پێیان وایە پەشیمانی لە كارێك چەندە ناخۆش بێت لە هەمانكاتدا، دەشێ ببێتە وانەیەك بۆ داهاتوو، هەروەك شادیە محەمەد، گووتی" هەموومان لەژیان زۆر كار دێیتە بەردەممان, دەیكەین  لێی پەشیمان نابین، بەڵام كاتێك سوودی لێنابینین پەشیمان دەبینەوە، كە هەڵەمان كردووە، هەموو دەم مرۆڤی ئێستا زۆرینەی لێی بپرسین دەڵێی ئایا لەهیچ پەشیمانی لەوانەیە باسی كارێك بكات كە گوناهە و كردوویەتی، ئیستا  لێی پەشیمانە یا هاورێیەتی كردن، چونكە هاورێیەتی كە لەگەڵت نابێت دەڵێی پەشیمانم لەهاورێیەتی كردن، یا لەوكاتەی كە لەگەڵی بووم. بەڵام هەردەم ئەو شتانەی رابردوو ناینەوە، پەشیمانیش بێ سوودە، بەڵام وانەیە، بۆیە دەتوانین بڵێین پەشیمانی زۆر جار یەكسانە بەفێربوون بۆ داهاتوو".
دیار جەمال، مامۆستایە لە پەیمانگای تەكنیكی سۆران، لە هیچ شتێكی ژیانی رابردووی پەشیمان نییە و وەك خۆی گووتی " لە هیچ كارەكی ژیانم پەشیمان نیم، بە باش و خراپەوە، چونكە باشەكان منیان بەرەو پێش برد و خراپەكانیش وایان لێكردم زیاتر هەوڵ بدەم هەر دووكیان هۆكاری سەركەوتنم بوون ".