Share on facebook
بەشی ساڵنامەو بەناو كردنی ئۆتۆمبێڵ بۆنەكراوەتەوە
سێ شەممە, 11 کانونی یەکەم 2018 07:13

 

محەمەد ئامۆكەیی- سۆران:

نزیكەی ساڵێك دەبێت بڕیاری كردنەوەی ساڵنامەو بەناو كردنی ئۆتۆمبێڵ بۆ قەزای سۆران دەرچووە، بەڵام هەتا ئێستا بڕیارەكە نەچۆتە واری جێ بەجێ كردنەوە، بەكردنەوەی بەشی ساڵنامەو بەناو كردنی ئۆتۆمبێل كار ئاسانیێكی زۆر بۆ خاوەن شوفێرەكان  دروست دەبێت، زاری كرمانجی لەسەر ئەم پرسە بۆچونی شوفێر و چالاكوانی مەدەنی و لایەنی پەیوەندی داری وەرگرتوە لەسەر نەكردنەوەی بەشەكە.

عیسا یاسین پیشەی شوفێرەو دەڵێت" سنوری سۆران پێویستی بەكردنەوەی بەشی لەم جۆرە هەیە لەبەر ئەوەی دەبێت هەموو خاوەن ئۆتۆمبێلێك رووبكاتە هەولێر بۆ بەناوكردن و نوێكردنەوەی ساڵنامە، ئەوەش لە رووی داراییەوە بۆ ئێمەی شوفێر گرفتە خۆتان دەزانن هێشتا هەر قەیرانەو باریی دارایی خراپە، دەكرێت حكومەت رەچاوی ئەم دۆخەش بكات و ئەو بڕە پارەیەیی لە نوێكردنەوەو بەناو كردن وەردەگیرێ زۆرە، ئەگەر هاتوو ئەو بەشە كرایەوە گومانی تیانیە كار ئاسانێكی زۆر بۆ شوفێران دەبێت، لەبەر ئەوەی سنوری سۆران خۆی لە هەریەك لە قەزاكانی چۆمان رواندز مێرگەسۆر رواندز دەبینێتەوە دەبوا بەرپرسانی سۆران هەوڵی جدیان بدابە بۆ كردنەوەی، كەچی خۆیان بێ دەنگ كردوە نەك ئەو بەشە زۆر شتی تر پێویستە دەكرا ئەو ئەندام پەڕلەمانانەی بەدەنگی سۆران دەرچونە یاخود خەڵكی ئێرەن زۆر شتیان بۆ ئەم دەڤەرە بكربا بۆیە دەخوازین هەرچی زوە پەلەبكرێت بۆ كردنەوەی ئەم بەشە.

تەها مەهدی بەرپرسی رێكخراوی رۆشنبیری هاتوو چۆ كە بارەگای سەرەكی لە سۆرانەو لە ساڵانی رابردوو چەندین چاڵاكیان ئەنجام داوە تایبەت بە بواری هاتوو چۆ گووتی" زیاتر لە هەشت مانگە بڕیاری كردنەوەی ساڵنامەو بەناوكردنی ئۆتۆمبێل بۆ سۆران دەرچوە كەچی تا ئێستاش بەرپرسانی و یەكەی ئیداری ئەم شارە هەولێكی جدیان بۆ نەداوە، كە زیاتر لە ۱٠٠ هەزار ئۆتۆمبێلی تابلۆ هەولێر لە سنوری دەڤەری سۆران هەیە،  دەكرا تا ئێستا شوێنێكی تایبەتیان بە بەشی هونەری یاخود ساڵنامەی ئۆتۆمبێل  تەرخان كرابا بۆ ئەوەی زیاتر خەڵكی ئەم دەڤەرە روونەكەنە پارێزگای هەولێر بۆ ئەم مەبەستە، سەرەڕای ئەوەی خەڵكی ئەم سنورە هەمووی پێشمەرگەو هەژارن، كاتێك روودەكەنە پارێزگای هەولێر، بڕە پارەێكی زۆر خەرج دەكەن، چونی ئەو هەموو شوفێرەش وادەكات لۆدێكی زۆر بێخنە سەرشەقامەكان و بەڕێوەبەرایەتی گشتی هاتووچۆ ئەمەش دەبێتە هۆی ئەوەی رووداوی هاتووچۆی زۆر رووبدەن، بۆ ئەم مەبەستە دەبێت بەڕێوەبەرایەتی هاتووچۆی سۆران و یەكەی ئیداری سۆران هەولێكی زیاتر بدەن هەم لەگەڵ بەڕێوەبەرایەتی هاتووچۆی هەولێر و وەزارەتی ناوخۆ، بۆ ئەوەی چەندی زوو ئەم بەشە لە سۆران بكرێتەوە، چیتر هاونیشتمانیان روونەكەنە پارێزگای هەولێر وەك رێكخراوی رۆشنبیری لەگەڵ بەرپرسانی هاتوو چۆ قسەمان هەبووە داوامان كردوە خەمێك لە كردنەوەی ئەم بەشە بخۆن و لە داهاتووش ئەگەر ئەو بەشە نەكرایەوە بەردەوام دەبین لە هەوڵەكانمان بۆكردنەوەی، سۆرانیش وەك رانیەو گەرمیان مافی خۆیەتی بكرێت بە ئیدارەێكی سەربەخۆ و ئەوكات وەك پارێزگا دەبێت هەموو جۆرە خزمەتگوزاریێكی تێدابێت بۆ خزمەتی هاووڵاتیان.

عەمید عوسمان مەمەدەڕەش بەڕێوەبەری بەڕێوەبەرایەتی پۆلیسی هاتوو چۆی سۆران بۆ زاری كرمانجی گووتی" پاڵپشت بەو دەسەلاتەی كەهەمانە دوامان لە بەڕێوەبەرایەتی گشتی پۆلیسی هاتوو چۆی هەرێم وەزارەتی ناوەخۆ كرد، رەزامەندیمان پێبدرێت بۆ كردنەوەی بەشی ساڵنامەو بەناو كردن و نوێ كردنەوەی ئۆتۆمبێڵا، ئەوەبوو وەزارەتی ناوەخۆ بڕیاری كردنەوەی بەشەكەی داو چەندین جار قائیمەقامی سۆرانمان ئاگادار كردەوە بۆ ئەوەی شوێنێك دابین بكەن بۆ ئەم بەشە، بەڵام هەتا ئێستا هیچ شوێنك دابین نەكراوە هەركات شوێنمان بۆ دابین كرا لە نێو بەڕێوەبەرایەتیەكەمان مامەڵەی خەڵك رای دەكەین.

لای خۆشیەوە كرمانج عێزەت قائیمەقامی قەزایی سۆران بە زاری كرمانجی راگەیاند" دوای دروست بوونی قەیرانی دارایی ناچار بووین زۆربەی دام دەزگا حكومیەكان لە چەند بیناێك كۆ بكەینەوە، بەڕێوەبەرایەتی پۆلیسی هاتوو چۆی سۆرانیش یەكێك بوو لەو بەڕێوەبەرایەتیانەی كە جێگامان لە نەو نەخۆشخانەی سۆران بۆ كردنەوەو نزیكەی سەتا70ی بینایەكە بۆ ئەوان بوو، دواتر بڕیاری كردنەوەی بەشی ساڵنەمەی ئۆتۆمبێل دەرچوو بۆ سۆران، ئاگادار كراینەوە بۆ ئەوەی شوێنێك بۆ ئەو بەشە دابین بكرێت، ئەوەبوو چوار ژورمان بۆ دابینكردن و ئەوان وتیان كەمە بەشی ئێمە ناكات، بۆیە نەكردنەوەی ئەو بەشە خەتای ئەوانە نەك ئێمە لەبەر ئەوەی شوێنمام بۆ دابین كردون ئەوان خۆیان نایانەوێ بكەنەوە.