گوڵزار جەلال: بەهۆی كورد بوونمەوە زۆربەی نوسینەكانم ئەنفال كراون
دووشەممە, 24 کانونی یەکەم 2018 16:31


دیمانە محەمەد ئامۆكەیی _ سلێمانی:
لە دیدارێكی هەفتەنامەی زاری كرمانجیدا، خانمە شاعیر گوڵزار جەلال لاپەڕەی ژیانی خۆی هەڵدەداتەوەو باس لە نوسین و ئازارو مەینەتیەكانی دەكات و دەڵێت" بەشێكی تەمەنی گەنجیەتیم بەهۆی كورد بونەوە لە زیندانیەكانی رژێمی بەعس بردۆتە سەر و هەرگیز پەشیمان نیم لەوەی نوسیومە، گوڵزار لە دایكبوی گەڕەكی سابونكەرانی سلێمانیەو فەرمانبەرە لە بەڕێوەبەرایەتی رۆشنبیری سلێمانی، بەر لە 55 ساڵ، لە خێزانێكی رۆشنبیرو كورد پەروەر چاوی بە ژیان هەڵێناوە، لە قۆناخی خوێندنی سەرەتاییەوە خولیای نوسین و خوێندنەوە بووە، بەتایبەتی شیعرو چیڕۆك لە هەردوو بواری منداڵان و گەورەدا ئەنوسێت، بۆ زاری كرمانجی دەڵێت" باوكم هاندەری سەرەكیم بووە، هەمیشە بخوێنمەوە و بەردەوام بم لە نوسین، یەكەم شیعری منداڵانم لە پۆڵی پێنجەمی سەرەتایی نوسی بە ناوی بوكە شوشەكەم، یەكەم قەسیدەشم ساڵی ۱۹۸۰ بەناوی ئەسپی خەیاڵ بوو، بەهۆی ئەوەی لەخێزانێكی تێكۆشەر بوین بەخێزانەوە ڕاپێچی زیندانەكانی ڕژێمی بەعس كراین و زۆربەی نوسینەكانم ئەنفال كران، بۆیەش ئێستا زیندانی سیاسیم". خانمی شاعیر گووتیشی" سێ كتێبی چاپكراوم هەیە بەناوەكانی دیوانی ژوان، كۆتری خرپن، كۆمەڵە چیرۆكی منداڵان، سۆزی دایك، كۆمەڵە شیعری منداڵ، دیوانی دووەمیشم ئامادەیە بۆ چاپ، چەندین قەسیدەم وەرگێردراوەتە سەر زمانی عەرەبی لەوانە عیشق كرستالی تعزرینی و هەتا ئێستاش بەردەوامم لە نوسین".  گوڵزار زیاتر ئیشی نوسینە دەڵێت" پێش هەمو شتێك نوسەر یان شاعیر دەبێ ڕاستگۆبێ چونكە شاعیر پەیامەكەی لە ڕێی تیكستەكانیەوە ئەگەیەنێت و گووتی". شیعر دەتوانێ ژیانی مرۆڤەكان بگۆڕێ ئەوەش بە رۆشنبیری و ئازایی و بوێری رادەربڕین لەبوارەكانی كومەڵایەتی، ژنان رۆشنبیری، منداڵان، رۆمانسیەت و پێشكەوتنی كومەڵگەو ناساندنی بە ووڵاتانی دونیا لە ڕێی وەرگێڕانەوە، لێرەدا ئەتوانم بڵێم" شاعیر موڵكی میللەتە نوسەر و شاعیر مێژووی میللەتن چونكە پێشكەوتنی ووڵات لە ئەدەب و نوسینەوە ئەناسرێت، مەرج نیە شیعر تەنیا گواستنەوەی جوانیەكانی ژیان بێت، شیعر گواستنەوەی جوانیەكانەو لە هەمان كاتیشا ئەبێ نیشاندەرو دەربڕینەكانی  ئێش و ئازارو خەمەكانی ژیان بێت، بە دەربڕینی بەشێوەیەكی هونەری فەنتازی لە فەزای جوانی و كێشەكانی ژیان، ئەو خانمە شاعیرە زیاتر گووتیشی"مرۆڤ لە ژیانی رۆژانەی خۆیدا دەبێت كاتەكان دیاری بكات منیش وەك هەر كەسێكی تر كاتەكانم دابەشكردون، كاتی دیاریكراوم هەیە بۆ خوێندنەوە، بەڵام كاتی دیاریكراوم نیە بۆ نوسین چونكە نوسین یا شیعر نوسین كات و ساتی نیە وەك وێنەی ژانی منداڵبوون وایە كەی هات لەدایك ئەبێت، شیعر نانوسرێ خۆی دێت وێنەكانی دەڕژێتە سەر لاپەڕە سپیەكان لە كۆتاییدا  ئەمە تۆی ئەی خواوەندی شیعر، ئەو لە بارەی ئەو بەهرەمەندو شاعیرانەی لە دوای ساڵەكانی (2000) هاتونەتە مەیدان دەشڵێت"ئەو نەوەیە نوسەری زیرەك و بوێرو دڵسۆزن كەم تا زۆر تێكستی جوانیان لە بوارەكانی ڕۆمانسیەت و كۆمەڵایەتی، نیشتمانی پێشكەش كردوە، بەڵام هەندێكیان پەلە ئەكەن لە نوسین و دەركەوتنیان، ئەوان كەسانی بەهرەدارو نوسەری زیرەكیان تیایە هیوادارم ئەو نەوە جوانە زیاتر گرنگی بە خوێننەوە بدەن، ووتەیەك هەیە ئەڵێت" ئەگەر ئەتەوێ مێژووی میللەتێك بزانی ئەوا ئەدەبەكەیان بخوێنەوە، بەڵێ جێگەی ئومێدە كە ئەوان تەواوكەری نەوەكانی پێش خۆیانن، هیوادارم زیاترو باشتر گرنكی بە ووشەی كوردی و مێژوی میللەتەكەمان بدەن، چونكە میللەت پێویستی بەكەسانی رۆشنبیرو نوسەرو  شاعیرانی دڵسۆز هەیە بۆ پێشكەوتنی ئەدەب و شیعری كوردی". ئەو لە بارەی جیاكردنەوەی ئەدەبی ژنانەو پیاوانە لە تێكست و نوسینەكاندا دەڵێت" پێم وایە من و ئەوان وەك مرۆڤ دەنوسین لەبەر ئەوە جیاوازیەكی وا نابینم چونكە هەردوو كیان نوسەرو شاعیرن و تەواو كەری یەكترین، نوسینیش لای شاعیران سنووری نیە نوسینەوەی هەستەكانیش لە هەردوو رەگەزدا جیاوازی نیە پێویستە رەگەزەی مێ نوسینەكانی ژنانە بێ و هەروەها رەگەزی بەرامبەریش". گوڵزار لە بەردەوامی قسەكانیدا دەشڵێت" لەو دونیا تایبەت و جوانەی شیعر دەمەوێت لەڕێی تێكستەكانمەوە خۆشەویستی بوێری جوانی و ئێش و ئازارەكانی ژیان و ژنی كوردستان و خۆشەویستی نیشتمان، خاك، منداڵان، باڵندەكان، بابەتەكۆمەڵایەتیەكان، بۆ مێژووی میللەتێكی تێكۆشەر و بەش بەشكراو بە خوێنەر بناسێنم و دەمەوێت پێ یان بڵێم ئێمەی كورد میللەتێكین دەبێ لەڕێی ئەدەب و هونەرو مێژوومان بیسەلمێنین بۆ هەموو جیهان كە میللەتێكی ئاشتی خوازین بۆ خاكو نیشتمان و كوردستانە ئەزیزەكەمان هەمیشە گیان فیداین.