Share on facebook
سێ ساڵە حكوومەت یەك لیتر نەوتی بە خەڵكی هەریر نەداوە
دووشەممە, 24 کانونی یەکەم 2018 16:43


راپۆرت محەمەد ئامۆكەیی_ هەریر: بۆ سێ ساڵ لەسەر یەك بەشە نەوتی سپی بەسەر هاووڵاتیانی شارەدێی هەریر دابەش نەكراوە، هاونیشتیمانیانی شارەكە داوادەكەن پەلە بكرێت لە دابەشكردنی بەشە نەوت، ناحیەی هەریر ژمارەی دانیشتوانەكەی نزیك 25هەزار كەس دەبێَت و لە رووی ئیدارییەوە سەر بەقەزای شەقڵاوەیە". ساڵانە بە دەبە بەهۆی هەژاریەوە ناچارام نەوت بكڕم سەیرە لەسەر بیری نەوت بی دۆخمان بەو جۆرە بێت، ئەمە قسەی هاوولاتێكی شارەكەیە، زاری كرمانجی لەسەر هۆكاری دوا كەوتنی بەشە نەوتی سپی قسەی چین و توێژەكانی هەریر و بەرپرسی ئیداری شارەكەی وەرگرتوە.
هەردی جەلال هاووڵاتێكی هەریرە دەڵێت"بۆ ساڵی سێیەمە بەس گوێم لێ ئەبێ چاو نەیبینیوە دەڵێن ئەم ساڵ بەشە نەوت دابەش دەكرێت كەچی بەس قسەیەو هیچمان نەبینیوە، ناكرێت حكومەت بەو جۆرە وا لە خەڵكی خۆی بكات، بەرگەی زۆر شتمان گرت قەیرانی دارایی بوو وتمان دۆخی حكومەت باش نیە خۆ ئێستا دۆخەكە گۆڕاوە زۆر جیاوازی هەیە لەگەڵ سێ ساڵ پێش ئێستا نرخی نەوت بەرز بۆتەوە هەناردەكردنی نەوتیش زیاتر بووە، حكومەت ئەتوانێت یەك رۆژ نەوتی خۆی بۆ هەموو كوردستان تەرخان بكات بەوەش كێشەی بەشە نەوتی هاووڵاتیان نامینێت، ئاگادارین لە زۆرێك لە گوندو ناحیەكانی تر نەوت دابەشكراوە تەنیا هەریر و باسرمە نەبێت كە سێیەم ساڵە بێ بەشكراوە بۆیە داواكارین لە لایەنی پەیوەندی داری شارەكەمان هەرچی زوە پەلە بكەن لە دابەشكردنی نەوت.
كەریم عومەر كاسبكارێكە لە هەریر گووتی" بە سەدان ماڵی هەژار هەیە لە شارەكەمان توانای كڕینی پێداویستیەكانی رۆژانەی نیەو نازانێت لەم دۆخە چیبكەین، بۆیە وەك خۆم بۆ سێ ساڵ دەچێت بە دەبە ناچار بوومە نەوت بكڕم، ئەوەش بەهۆی دەست كورتیەوەیە ئەگەر نا ئێمەش حەزدەكەین وەك خەڵكانی تر بە بەرمیل نەوت بكڕین، پێم سەیرە مانگانە حكومەت ئاماری هەناردەكردنی نەوت بڵاو دەكاتەوە بەردەوامیش نرخی لە گران بوون دایە كەچی بەڕەوای نابینێت بەرمیلێك نەوت بەسەر خەڵكە خێر لە خۆ نەدیوەكەی دابەش بكات.  
خەدیجە رەسوڵ چالاكوانێكی ژینگەیە لە هەریر گووتی" سستی دابەشكردن لە بەشە نەوتی ماڵان لە هەموو كوردستان زیانێكی زۆری بە ژینگە گەیاندوە هەریریش بێ بەش نەبوە لەو زیانە ژینگەیە، خەڵكانێك بەهۆی نەبوونی نەوتەوە ناچار بونە داری تەڕ ببڕن ئەوەش بۆتە جێگای نیگەرانی ئێمە، چەندین جاریش بەرپرسانی ئیداریمان لەو كێشەیە ئاگادار كردۆتەوە ئەوانیش بیانویان هەیەو دەڵێن لە دەستەلاتی سەروی ئێمەیە، بۆیە ئەگەر وابڕوات نەوت دوابكەوێت زیانی زیاتر بە سروشتی ناوچەكە دەكەوێت، ئەو چالاكوانە زیاتر دەشڵێت" هەلكەوتەی جوگرافیای هەریر وایە پشتی چیایەو زۆرترین دار بەڕوی هەیە ئەوەش لە ئێستاو لە سالانی داهاتوو كاری گەری زۆری دەبێت بۆ لە نێو چوونی ئەو دارستانانە، نەبوونی پۆلیسی دارستانیش هۆكارێكی ترە بۆ ئەوەی خەڵكانێك بە ئارەزوی خۆیان داری تەڕ ببڕن و ناشكرێت لێرە خەڵكی تاوان بار بكەین چونكە دۆخی خەڵكیش خراپە، تەنیا داوا كاری ئێمەی چالاكوانی ژینگەی ئەوەیە هەرچی زوە دەست بكرێت بە دانی نەوتی سپی.
لای خۆشیەوە حامد كاكەیی بەڕێوەبەری ناحیەی هەریر بە زاری كرمانجی راگەیاند" ئاگاداری ئەوەین  بۆ سێ ساڵ دەچێت نەوت بەسەر خەڵكی هەریر دابەش نەكراوە،  هەروەها زۆربەی قوتابخانەكانی سنورەكەشمان نەوتیان نەبوو بۆیە ئێستا قوتابخانەكان نەوتیان پێدراوە ئەوەش لۆدێكی زۆری دروست كردبوو وایكرد ئەو بەشە نەوتەی هەیە سەرەتا بۆ قوتبخانەكان بێت دواتر ماڵاكان، هەروەها ئێستاش بەڕێوەبەرایەتی سوتەمەنی هەولێر بە شێوەی تیرو پشك نەوت بەسەر بریكارەكانی خۆراك دابەش دەكات، لەسەر دواكەتنی بەشە نەوتی ماڵانی هەریر چەندین جار لەگەڵ جێگری پارێزگاری هەولێر قسەم كردوە، ئەوانیش وەزارەتی سامانە سروشتیەكانیان ئاگادار كردۆتەوە بۆ دابین كردنی نەوتی سپی بۆیە هەوڵەكانیشمان بەردەوام دەبن بۆ ئەوەی هەر هیچ نەبێت لەم وەرزە بتوانین بەرمیڵك نەوت دابین بكەین بۆ هاوولاتیانی شارەكەمان.