Share on facebook
جەماوەر تاكە سەرمایەی یانەی سۆرانن
سێ شەممە, 22 کانونی دووەم 2019 16:58


جەلال سەعید

یانەی وەرزشی سۆران زیاتر لە 25 ساڵە بێ یاریگایە، كەچی هیچ كاتێك لە بەشداریكردنی لە خول و پاڵەوانیەتییەكان نەوەستاون.

بێ یاریگای تۆپێ پێیە و بێ بچووكترین شوێنی مەشق و راهێنانی تیپەكانی وەرزشییە.

هیچ شوێنێكی نییە بۆ ئەنجامدانی یارییەكانی فەرمی.

تیپی تۆپی پێی پارە دەدات تاكو مەشق و راهێنان و یارییەكانی فەرمی بە پارە ئەنجام دەدات.

بەرپرسانی كار بەدەست و دەستڕۆی و پێشەنگی شاریش لە جیاتی هاوكارو پاڵپشت بن بۆ چارەسەری كێشە و گرفتەكانی، بەپێچەوانەوە كۆسپ لەمپەرن و رێگرن بۆ چارەسەری كێشەكان. زۆر بەلاشیانەوە ئاساییە ئامادەی یاری ببن، گرنگ نییە نەزانن لەو دوو یانەی لە نێو گۆرەپان یاری كامەیان یانەی شارەكەیەتی، نازانی رەنگی درێسی یانەی شارەكەی چییە و چۆنە.

وەرزشی سۆران لە سایەی بەرپرسانی ئەو شارە گەیشتۆتە ئەو رۆژە، شارێك چاوی لە بەپارێزگابوون بێت و سێ‌ یاریگای كاولكراویشی هەبێ‌ كەچی گۆرەپانێكی نەبێ‌ بۆ بەرێوە چوونی یارییەكانی فەرمی، یانەكەشی بێ‌ یاریگاو بێ‌ شوێن بێ، بە پارە مەشق و راهێنان و یارییەكانی ئەنجام بدات، ئەگەر دادگایەكی وەرزشی لە كوردستان هەبوایە، بەرپرسانی ئەو شارە دادگایی دەكران و بەرپرسی یەكەمی شاریش زیندانی دەكرا.

لە ماوەی زیاتر لە 15 ساڵە دەیان جار رووبەروو پێشنیاری چارەسەری وەرزشیم بۆ وەشاندون و رێگا چارەی نەهێشتنی كێشەو گرفتەكانیشیم بۆ خستونەتە روو، لە رەخنە و توانجیشدا چ لە رووبەروویان چ لە وەشاندنی بە نووسین و بڵاوكردنەوەدا دەستە وەستان نەبووم و ناشبم.

تاكو گەیشتۆتە ئەوەی حەز بە دەم و چاوی یەكتر نەكەین بە تایبەت ئەوان حەز بە بینین و سلاو لێكردنیشم ناكەن، باكم بەوە نەبووە، چونكە دڵنیام من لە سەر راستم و خۆشم بە تەندروستر لەوان دەزانم بۆ خزمەتكردن و هەوڵدان بۆ چارەسەری كێشەو گرفتەكان.

یانەی سۆران تاكە پاڵپشت و پشتگیری یەكەم و پێشەنگ، جەماوەرو هاندەرەكانی بووە.

ئەو جەماوەرەی بۆ ساتێكیش لە هاندان و ورە پێدان بە یاریزانان نەوەستاون لە هەموو كات و سەخت و دژوەرەكانی سەرماو سۆڵ و باران و بەفر بارینیش ماندو نەبوون و كۆلیان نەداوە.

ئامادەبوونی جەماوەر و هاندەران لە یارییەكان بە بەردەوام، هۆكاری سەرەكی سەركەوتن و بەهێزی یانەی سۆران و گەیشتنی بەچوارگۆشەی زێرین بووە.